“Dishinda Dya Leza Dya Būmi”
—Kitango Kya Distrike Kadi Kya Matanda Kya Mu 1998
1 Nkindi 10:29 wituvuluja’mba “dishinda dya Yehova i nsakwa mikomo.” Bine, nanshi uno mutwe wa mwanda wa kitango kya distrike kya uno mwaka—“Dishinda dya Leza dya Būmi”—i mufwaninwe mpata! Lelo uno mutwe wa mwanda ukabandaulwa namani mu bula bwa mpangiko yonso ya mafuku asatu? Batwe bonso tutengelei na kipyupyu byobya bituteakanibwe’ko. Kukaletwa milangwe ya mvubu mikatampe.
2 Kepabulwe padi bamishonele, bengidi bakwisakila ba ntanda yonso, nansha batutu ne bakaka bengidila mu matanda angi bakatanwa ku bitango bya matanda. Tukulupile’mba kukekala tununu tuvule twa banabetu bakatamba mu matanda angi bakatanwa mu bibundi mukalongelwa bitango bya matanda. Ku kino kitango kukaletwa malapolo alombola muswelo wesela Yehova mwingilo mu myaba pala pala.
3 Kulonga Buninge bwa Kukatanwa’ko Kudi na Kafwila-Midimo: Banabetu bavule ba muno mu Afrika badi mu makambakano abinebine pa mwanda wa mavita ne tuvutakanya tukambakanya bipindi bimobimo bya mu kino kifuko. Ino abo bamonanga bitango bya bantu ba Yehova bu po pemanine būmi bwabo. Bamo bendanga lwa panshi lwendo lulampe kukatanwa ku kitango kampanda, ino kebekalangapo na milangwe ya kubulwa kukatanwa’ko. Tutu umo wa myaka 73 wa mu République démocratique du Congo (mwadi mutelwa bu Zaïre) waendele lwendo lwa makilometele 450 lwa panshi mwanda wa kukatanwa ku kitango. Walēle mafuku 16 mwishinda ko kufika wafika, maulu mayule, inoko musangale pa kutanwa’ko. Kitango pa kupwa, wekwata’ko na kujoka lwa panshi lonka, papo musangale kadi mukankamikwe kumushipiditu. Ye mwalongelanga nyeke tamba myaka mivule!
4 Mu Mozambike, mutadi wa distrike umo ne wandi mukaji bakandile lūlu lulampe, batyibulula mu ntanda mutuputupu lwa panshi, baenda kukatanwa ku Kitango kya Distrike. Baendele lwendo lwa makilometele 90 mu nsaa 45. Bonso batenwe ku kitango bakankamikilwe mpata na kifwa kyabo kilumbuluke. I bisaka bivule byalongele bukomo, byakatanwa’ko. Mutadi wa distrike umo walembele’mba banabetu bamo, kubadila’mo ne mwanetu wa myaka 60, baendele lwendo lwa makilometele 200 lwa panshi!
5 Lelo kodi mukwate kala mpangiko ya kukatanwa ku kitango kya uno mwaka? Eyo, padi kiketulomba netu kwenda lwendo lulampe lwa panshi ne kulonga bukomo kampanda bwa kwipāna, mwa kukataninwa’ko pamo na kyetu kisaka. Twiteakanyei mwa kukataninwa ku mpangiko yonso tamba ku ngalwilo kutūla ne ku mfulo. Befundi ba Bible bendelelanga kumeso pano i bavule, bekankila kufikila pa lubatyijo. Kutanwa’bo ku kitango kubwanya kwibasombela ku kutyiba mbila mifwaninwe. Lelo ketudi bete bantu befundanga netu Bible ne boba basepelele musapu bakatanwe’ko pamo netu?
6 Kitango kya Mafuku Asatu: Uno mwaka kudi bitango 59 bikalongelwa mu Burundi, mu Congo-Brazzaville ne mu Congo-Kinshasa. Bino bitango bikalongwa mu Kiluba, mu Kirundi, mu Lingala, mu Monokutuba, mu Otetela, mu Swahili, mu Tshiluba ne mu Uruund, kutentekela’po ne Falanse. Mpangiko ya bifuko ne mafuku a bino bitango i myalamunwe. Talai’yo mu kapango kadi pa paje 5. Pano mubayuka kifuko kwityilwe kyenu kipwilo.
7 Musapu wa pa Bula: I kya mvubu mikatampe ukatanwe ku kitango kwityilwe kyenu kipwilo. Wivwane wikale kulēmeka ino mpangiko ne kulonda monka munenenwe, nankyo bintu byonso bikapita mungya mobyendele ne mu ndudi.—1 Kod. 14:33, 40.
8 Mu dya Butano, mu dya Mposo ne mu dya Yenga, mpangiko ikashilula na 9:30 ya lubanga. Mu dya Butano ne mu dya Mposo, mpangiko ikafula na 5:00 ya kyolwa, ino dya Yenga ikafula na 4:00 ya kyolwa. Bibelo bikashitulwa difuku ne difuku na 8:00 ya lubanga. Enka boba badi’mo na mwingilo kampanda bo bakapebwa lupusa lwa kutwela kumeso kwa kitatyi. Inoko i kutupu ukalamina ba byaba, enka ne bibwana 8:00 ya lubanga.
9 Pa kwenda ne pa kujoka ku kitango, tufwaninwe kukimba mikenga ya kupāna bukamoni bwa kiponka na ponka. Bapoteji ba esanshi, bansunga, boba bafutyija bitanshi, bakulumpe ne bengidi ba ku mahotela bakokeja kusangela musapu wa Bulopwe. Nanshi badikila kwilamija matrakte, mapepala a panopano, mikanda ne mabuku makwabo, mwa kukakwatakenya mikenga yokamona ya kupāna bukamoni ku bantu kebabwanya kutengwa na myanda miyampe mu byaba bikwabo.—2 Tem. 3:17.
10 “Dyumukai na Muswelo Omwimvwana”: I kyatunangu boba bendele ku kitango bate mutyima ku madingi adi mu Luka 8:18, BB. Bonso i bakankamikwe kupaika Bible, dibuku dya ñimbo ne ka kulemba’po. Teja na katentekeji myanda mikatampe inenwa, kadi lemba milangwe mīpi. Wiipangule muswelo okokeja kwingidija ino myanda kasuku kobe. Difuku ne difuku kupwa kwa kitango, kumeso kwa kulāla, ubulwe’po kupituluka mu byolembele ne kwibandaula shi ukilondanga senene mu dishinda dya Yehova dya būmi.—Nk. 4:10-13.
11 Tumonanga bamo, baneni ba bishinte koku banena, abo nabo batamba mulongelwa kitango bakashikata panja, babulwa kwivwana mupityila mpangiko. Bakwabo bamonwa bapitakana mu byaba bishilwe bu mwa kupita, pakubulwa ne kyobalonga kine, pa kyaba kya kushikata pamo bateja. Tumonanga bankasampe bavule bataluka ku kitango akyo kekyapwile. Bengidi ba Yehova bamobamo ba mu myaka ya kala bādi balonga bilubo bikatampe mu būmi bwabo pa mwanda wa kubulwa kuteja na katentekeji byādi bibavuluja Yehova. Na bubine, ketufwaninwepo kadi netu tuponene mu bilubo bimo byonka. (2 Bal. 17:13-15) ‘Umpika wabinebine ne wamanwa’ i muteakanye bufundiji bulumbuluke botusakilwa batwe bonso. Nanshi i kya mvubu mikatampe ‘tuningije kutá mutyima ku bintu byotukevwana’ mu kipimpo ne kipimpo kikapityijibwa mu mafuku onso asatu a kitango. Difuku ne difuku, mu byobya bikanenwa kemukabulwepo kintu kampanda kitutala, kilombola milangwe ya kwitukwasha mu būmi bwetu bwa kumeso. Shi tuteje senene ne kwingidija biyampe bintu bya kumushipiditu biketupa Yehova ku bitango bya uno mwaka, nankyo kikulupiji kyetu kikashimatyijibwa, ne kadi tukaleka ‘kweja,’ ko kunena’mba tukaleka kusāsuka mu dishinda dya Leza dya būmi.—Mat. 24:45; Bah. 2:1.
12 Muvwadilo Utumbija Yehova: Mu ano mafuku a malwa otudi’mo, tufwaninwe kudyumuka mpata, kutyina’mba twakaponena mu bisela bipupwa na ino ntanda. (1 Kod. 2:12) Muvwadilo ne mutendelo wetu bifwaninwe kwikala bya bumvubumvu, bilombola bulēme botulēmekele Leza otutōta. (1 Tem. 2:9, 10) Pa kubadilwa mu boba “banengeje senene, shē, lufundijo lwa Leza Mupandiji wetu,” kekilombepo’nka kuvwala bivwalwa bya lupoto. (Tet. 2:10) Tala madingi malumbuluke a mu Bisonekwa aletelwe mu musāngo 14 kutūla ku 18 mu Kiteba kya Mulami kya 1 kweji 7, 1997, paje 11 ne 12. Ketukipēlulai bukamoni bukomo botukokeja kupāna kupityila ku muvwadilo ne ku mutendelo uletela Yehova ntumbo.
13 Mwiendelejo Usangaja Yehova: Tuyukile’mba mwiendelejo wetu wa bwine Kidishitu ukokeja kwingidija lupusa pa muswelo umona bakwetu mutōtelo wabine. O mwanda tusakanga kwiendeja kitatyi kyonso mu muswelo mufwaninwe myanda miyampe ne utendela Yehova.—Fid. 1:27.
14 Mwaka wapityile’u, kungala kwa Angola kwalongelwe kitango kya distrike musunsa umbajinji. Mu difuku dya bubidi dya kitango, Leta watuma bampulushi babidi ku kitango kutala shi kudi kavutakanya. Bashikata’ko difuku dyonso dituntulu. Ku kyolwa kya dine difuku’dyo, bashilula kutendela myanda yobaivwene’ko ne kutendela mwiendelejo wanwa obemwenine abo bene na meso. Umo wanena’mba: “Le kyotwatuminwa kuno kine i kika? Kuyuka kotuyukile kala amba Batumoni ba Yehova babungakananga pampikwa kavutakanya.”
15 Muntu umo wadi mu muvema wa kipolitike kampanda mu ntanda imo ya mu Afrika wanyemene mu Bulaya kitatyi kyaipailwe bantu ba wabo muvema. Myanda pa kumuvudila, mutyima wamupungila. Kupwa waitabija kifundwa kya Bible. Paakatenwe ku kitango kya distrike musunsa wandi umbajinji, watulumukile bininge pa kumona bantu batambile ku bifuko bishileshile bebungile pamo mu ndoe, pambulwa kavutakanya. Wasuma munwe na kyala, amba kubapu natana bubinebine. Konka ku kitango’ko watyiba mbila ya kuleka myanda yonso ya politike. Mwenda mafuku wabatyijibwa, panenwa pano aye ne bandi bana bengidilanga Yehova.
16 Lelo mwiendelejo wetu ukatenga namani boba bakatanwa ku kitango kya uno mwaka musunsa wabo umbajinji? Lelo bakajingulula’mba kudi mushipiditu wa kwiangula umwekanga potwingidilanga pamo na bengidi bakwisakila? Lelo bakatulumuka pobakamona bukundwe bwa palongelwa kitango ne pobakamona’mba kumeso kwa kutaluka, batwe ne betu bana kumo tukaboya busala bo-bonso bwikele kubwipi na kotukashikata? Lelo bakemwena mwiendelejo wetu mulumbuluke kitatyi kya kwenda nansha kya kutamba kotulālanga ne ku kifuko kya kitango? Lelo bakamona bambutwile bakengelele babo bana kitatyi kyonso? Bine twielelei’ko pa kino, nabya ne boba betumona nabo bashale batendela.
17 Tujokejei Milupu ya Lupeto Lulupukile pa Mwanda wa Kitango: Mu ino myaka, kufuta tiké wa kubandila makayo nansha bintu bikwabo mu kiwanza nansha mu njibo ya kitango kulombanga lupeto luvule. Benē makayo balombanga luno lupeto luvule mwanda kufutyila kiwanza kudi na bei mikomo. Pa mwanda utala bitango, Sosiete ulondanga nyeke uno musoñanya wa amba, “Twelai ku bitupu—Kutupu mukongo.” Ino le lupeto lufutyilwa kiwanza ne milupu mikwabo ya lupeto lukengidijibwa lukatamba kwepi? I ku byabuntu bya bonso batanwa ku kitango. Tukulupile mutyima wenu wa kyaba bulāle udingakene na wādi na bengidi ba Leza ba mu myaka ya kala bāiwile Yehova Leza ne Yesu Kidishitu. (2 Kod. 8:7) Tuloñanga buninge bwa kukwatakanya lupeto lwa byabuntu byonso, kwilubala ne kwilwingidija mwendele mwingilo olutūdilwe.
18 Bishikatwa: Madingi aletelwe ku mwaka wapityile akidi monka na mvubu: BOKOKEJA KULAMINA BIFUKO BYA KUSHIKATA’PO I ENKA BA MU KYENU KISAKA NANSHA BOBA BOMWIILE NABO KETE. I kya nsangaji mpata, mwanda ino myaka yamfulo, bavule batanwanga ku bitango i balēmeke uno musoñanya, kino kiloejanga tusepo ne mimungomungo ya buswe ikalanga ku bitango byetu. Mu bifuko bivule mulongelwanga bitango, kusokola bishikatwa i mwanda upēla, ino mu bifuko bikwabo i bulwi. Tuvulukei kubanga banunu ne boba badi mu ngikadilo ilomba kushilwa pa kushikata. Ketwakivulaminwai’ko, ‘buswe kebukimbangapo tumweno twa abo bwine.’—1 Kod. 13:4, 5; Fid. 2:4.
19 Mafoto, Makamera ne Makasete: Ukokeja kwingidija mafoto ne bingidilwa bikwabo bikwata mawi. Inoko ketufwaninwepo kulabika bemvwaniki bakwabo pa kwibingidija. Ketufwaninwepo kunangakana mu bula bwa bipimpo na kwenda kukwata ba mafoto, mwanda tubwanya kuvutakanya bakwetu bateja. Kekudipo kingidilwa kikwata mawi nansha kimo, shi kika, shi kika, kikasomekwa ku nshinga ya mudilo nansha ya mawi ikengidijibwa ku kitango, nansha kikakimbakana mupitwa nansha kujika bemvwaniki bakwabo basaka kumona.
20 Bundapi Bubajinji: Mwingilo wa Bundapi Bubajinji i wa kukwasha’tu bukidibukidi. Sela binini bya mutwe, bwanga bwa kifu, mabande a bilonda, mampengele a bikama bya mwana, ne bintu bikwabo bya uno muswelo kebimwekanga ku kitango. Bonso babēla luba lwa dityima, bakokeja kupulamwa dityima kūlu nansha kupulukwa dityima bya kubozokelwa, ne bikwabo, bafwaninwe kwilamija malawa ebakwashanga, belamija ne muntu wa mu kyabo kisaka nansha wa pa kyabo kipwilo uyukile ngikadilo yabo, wa kwikala nabo kitatyi kyonso, mwanda wa kwibakwasha shi bibakoleja. Tumonanga ku bitango bantu badi na misongo ya zenzeka bashībwa pa kasuku, misongo yabo’ya pa kwibakomena, kyaleta bikambija. Shi muntu usakilwa buñanga bwa pa bula nansha shi i kutupu muntu wa mu kisaka kyandi ukokeja kumutala, bakulumpe ba pa kyabo kipwilo bafwaninwe kuyukijibwa mobikadile mwanda wa bakwate’po mpangiko ya kumukwasha. Kekukekalapo byumba bya pa bula biteakanibwe boba badi na misongo ibakoleja kushikata mu bifuko mushikata bantu bonso.
21 Bidibwa: Muntu ne muntu ufwaninwe kupaika bidibwa byandi kupita’ko kwenda kukapota bintu panja kitatyi kya kukokolokwa kwa midi. Bidibwa bipēla, ino abyo’ko bīta ngitu, bipēla kusela bibwene. Papye wa ntentekelo wa Mwingilo Wetu wa Bulopwe wa Kweji wa 4, 1996 mu musāngo 6 ne 7, i mulombole bidibwa bimobimo. Ketukatwelapo mu kifuko palongelwa kitango na matyupa aladika nansha na mālwa akolwañana. Byato bya mai-makasa bifwaninwe kwikala bityetye bikokeja kutūlwa munshi mwa bishikatwa byenu. Batenwe ku kitango bamobamo bamwenwe badya kitatyi kyadi kipityijibwa mpangiko. Kuno i kubulwa bulēme.
22 Bine twi basepelele bininge pa kulanga mwenda mufwenena kitango kya distrike “Dishinda dya Leza dya Būmi”! Lelo kodi mukwate mpangiko ya kukatanwa’ko? Enda biyampe mwa kujokela ku njibo mukankamikwe, musumininwe kwendelela mu mwingilo mulēme wa Yehova ne kwendelela na kulonda Dishinda dya Leza dya Būmi ukamone nsangaji yanyeke!
▪ Lubatyijo: Banabetu bakabatyijibwa bafwaninwe kukashikata pa kifuko kibalaminwe kumeso kwa kushilula kipimpo kya mu dya Mposo lubanga. Yewa yense ukabatyijibwa ufwaninwe kuvwala mbwija mifwaninwe ne kya kwipampula nakyo mema. Mafuku a kunyuma, bamobamo badi na muvwadilo wambulwa bulēmantu ne upēlula mutyika wa kino kinkumenkume. Bakulumpe bakabandaula bipangujo bidi mu kabuku Bufundiji bwa Bible bwa Kyalwilo na boba bakabatyijibwa, mwanda wa kutala shi binebine umo ne umo wa mu abo i mwivwanije senene ino myanda. Lubatyijo ne kwipāna i mwanda wa muntu kasuku kandi na Yehova. O mwanda ke biyampepo kulonga “lubatyijo lwa kikonge” lwa bantu babidi nansha bavule kutabuka, bekwete ku makasa umo na mukwabo, nansha belamete kitatyi kya kutokenibwa mu mema.
▪ Tuyukeno: Ta mutyima ku kuvwala kayukeno ka 1998 ponso pokatanwa, ku kitango nansha mu dishinda kitatyi kyoenda ne kyojoka ku kitango. Kino kikakukwasha divule ku kupāna bukamoni bulumbuluke. Ukapota kayukeno ne kapalashitike kako ku kipwilo kyenu, mwanda ketukekalapo ku kitango. Kokikungila enka mafuku asenselela’ko kitango, ebiya kolombe kayukeno kobe ne twa kisaka kyobe. Kokilwa’ko kusela kakanda “Instructions médicales — Pas de sang.”
▪ Bifikilo: Tubemulombe banwe bonso kwingidila pamo kukwatañana ENKA na majina a bifuko bya kufikila’ko alombwelwe na Mwingilo wa kutundaila bāya. Mobo a bifikilo ekalanga pavule mobo a banabetu. Tufwaninwe kulangila batutu ne bakaka betutundaila ku mobo abo. Nanshi ke biyampepo boba batambwilwe na kizaji bekale kona kino kizaji na kukimba kulelwa ku mobo mu bula bwa mafuku kapwila kumeso nansha kupwa kwa kitango. Mobo a bifikilo akapānwa’nka MU BULA bwa mafuku a kitango kete. Boba bapebwa mobo a bifikilo bafwaninwe kulēmeka bintu bya mufikilwa, kuleka konakanya kintu nansha kimo, kuleka kutwela mu bifuko mokebapelwe lupusa, ne kuta mutyima ku babo bana nabo balongele monka. Ekale shi bafikilwa abatanwa na kikoleja pa uno mwanda, bafwaninwe kuyukija bukidi banabetu bemanīne mwingilo wa kutundaila bāya, nabo bakasangela kwibakwasha’po biyampe byonka.
Nansha byotudi mu ‘myaka ya malwa akoma ne mwa kutyumwina’o mu manwi,’ tukulupile amba banabetu bavule bakashitula bibelo byabo ku boba bakakimba kwa kufikila, pamo na mwalongele banabetu ba mu Kinshasa ne ba mu bifuko bikwabo kitatyi kyanyemene banabetu divita. Ino i kya bulanda pa kwivwana’mba mu bifuko bivule mushipiditu wa kansontomokela ka kutambula boba bāya kutanwa ku bitango i mutyetye’mo. Bine, ketusakilepo kuleka makambakano a mu ano mafuku atyepeje buswe bwetu umo ku mukwabo, na kuleka kwitundaila na kizaji shi tudi na kifuko pa kutūla mweni.—2 Tem. 3:1; Bah. 13:1, 2; Yoa. 13:35.
▪ Mwingilo wa Kwisakila: Lelo ukokeja kwitūdila’ko kitatyi kya kukwasha ku mingilo kampanda ku kino kitango? Tukokeja kukwasha mpata ne kwisokwela nsangaji mikatampe na kwipāna mu kwingidila banabetu, nansha kitatyi kityetye’tu. Shi usaka kukakwasha’ko, fika ku bilo bya mwingilo wa kwisakila bidi ku kitango. Bana ba myaka idi munshi mwa 16 bakokeja nabo kukwasha’ko, pa kino, i kipite buya kuludikwa’bo na bashabo nansha bainabo, nansha na mutame mukwabo wibemanine.
▪ Twikalei na Kansotomokela ka Kulombwela Kizaji Kyetu: Bavule batanwanga ku bitango bya distrike biloñwanga mu wetu mwaba, bendanga kulampe na kobashikatanga. Kwibasakilanga kifuko pa kulāla, mwa kulangukila na bukomo bwa kulonda mpangiko ya difuku dilonda’ko. Shi tushikatanga mu kibundi mukalongelwa kitango, tubulwe’po kwingidila pamo na Mwingilo wa Kutundaila Bāya na kupāna kifuko kya kufikila’ko banabetu bakakimba kwa kufikila? Ke biyampepo kupityija uno mukenga mulumbuluke wa kulombola kizaji kyetu, mwanda kulonga namino kuningijanga bubutule bwetu bwa bu bana na bana ne kuvudijija Yehova ntumbo.—1 Petelo 4:9; Bah. 13:1, 2.
▪ Twikalei na Mumweno Muyampe pa Mwingilo wa Kwisakila Kitatyi Kiteakanyibwa Bitango Byetu: Kuteakanya kitango kya distrike kulombanga bukomo ne kitatyi kivule. Wivwane bantu ba kwisakila bekale bavule, nabya ne kitundu nakyo kikapēla. Lelo mwingidi wa kwisakila mwine i ani? Mungya dibuku dishintulula bishima Le nouveau petit Robert, mwingidi wa kwisakila i muntu wingila mwingilo wa kwipāna ku bitupu. Ko kunena’mba mwingidi wa kwisakila kafwaninwepo kukulupila’mba ukapebwa mfutwa ya mwingilo waingila. Eyo, mukokeja kukwata mpangiko kampanda mwendele bifuko byenu, ya kuletela bengidi ba kwisakila baputuma na mingilo byakudya musunsa umo pa difuku, mwanda wa bintu byonso bikale biteakanibwe shē kumeso kwa kitatyi, kepashilwile kitango. Ino i mpangiko ikwatwa mu kifuko kyenu ne bipwilo bidi na madyese a kuleta byabuntu bya lupeto nansha bintu. Kemukulupilai amba Sosiete ukalunga’ko kuboko na kuleta bukwashi kampanda.—Mit. 110:3.
▪ Tumwenei Kamweno mu Bupeta Bwetu: Lelo i bupeta’ka? I kitatyi ne bukomo botuloñanga mwanda wa kukatanwa ku kitango. Ke biyampepo kwiteakanya senene kukatanwa ku kitango kya distrike, ino twajoka mu dya Yenga kyolwa babulwe kipindi kikatampe kya mpangiko. Shi binebine twi bapye kumushipiditu, ketukokejapo kubulwa kintu mu byobya bituteakenyinye Yehova. (1 Kod. 2:9, 10) Difuku ne difuku dya kitango, tufwaninwe kulonga buninge, kushikata kumeso kwa kitatyi kepashilwile kitango. Nansha shi twadi twela nsadi na balunda netu ba kala botwetana nabo, ino shi mwinaniji wa kitango walombola kushilula kwa mpangiko, i biyampe kwimika mīsambo ne kujokela bukidi pa bifuko byetu, kulonga namino bo bulēme ku baneni ne ku banabetu bonso.
▪ Bidyumu: Ta nyeke mutyima ku kushita milango ya motoka obe na lufungulo, kadi kokaleka kintu kampanda patōka kikokeja kukoka meso a bangivi. Bangivi ne batutyomona bakokwanga na bifuko bibungile’po bantu bavule. Kushiya kintu kya bulēme pa kityi poshikete i kulaba. Mwanda kekudipo kiluji kilombola’mba bonso bakujokolokele’ba i bene Kidishitu. Lelo kyokelela nzolo mūlu i kika? Twatambwile malapolo alombola’mba kudi bantu bakubulwa kuyukanika basakile kukokela bana bankasampe panja. KE BIYAMPEPO KULEKA BENU BANA BEMUJIMINA MU MESO.
14-16 Kweji 8, 1998
BANDUNDU (LI): BD-1; BD-10
BUMBA (LI): EQ-4; EQ-12; EQ-15; EQ-20; EQ-22; OR-3; kipindi OR-10; OR-15
BUNIA (SW): OR-4; OR-12
KIKWIT (F, MK): BD-2; kipindi BD-19; BD-24; kipindi BD-22
KINSHASA (F): KN-4; KN-7; KN-10
MANONO (KU): Kipindi KT-10; KT-14; kipindi KT-16
MATADI (LI): BC-1; BC-5
MBANDAKA (LI): EQ-2; EQ-7; EQ-16; EQ-17; EQ-23
MBUJI-MAYI (F, SH): KA-2; KA-8; KA-16; KA-17; KA-20; kipindi KA-25
SANDOA (DR): Kipindi KT-5; KT-21
TSHIKAPA (F, SH): KA-6; KA-22; KA-23; KA-31
21-23 Kweji 8, 1998
BRAZZAVILLE (F, LI): CO-1; CO-5; kipindi CO-3; kipindi CO-7; kipindi CO-8
BULUNGU (MK): BD-5; kipindi BD-19; BD-20
GOMA (F, SW): KI-2; KI-6; KI-14
IDIOFA (MK): BD-8; BD-16
ISIRO (LI): OR-2; kipindi OR-17; OR-18
KANANGA (F, SH): KA-1; KA-9; KA-14; KA-18; KA-19; KA-28; KA-30
KIMPESE (LI): BC-2; kipindi BC-3; BC-4; kipindi BC-6; BC-7; BC-8
KINDU (SW): KI-3; kipindi KI-4; KI-13; kipindi OR-5; OR-16
KINSHASA (LI 1): KN-1; KN-3; KN-8; KN-12; KN-13; kipindi BC-3
KISANGANI (F): Kipindi OR-1; kipindi OR-7; kipindi OR-8; kipindi OR-10; kipindi OR-14
LISALA (LI): EQ-8; EQ-11; EQ-18; EQ-21
LODJA (OT): KA-4; KA-11; KA-12; kipindi KA-26; KA-27; kipindi KA-32
LUBUMBASHI (F, SW): Kipindi KT-1; KT-2; KT-13
MULONGO (KU): Kipindi KT-8; kipindi KT-10; kipindi KT-16
POPOKABAKA (LI): Kipindi BC-6; BD-7; kipindi BD-13; kipindi BD-21
28-30 Kweji 8, 1998
BOENDE (LI): EQ-3; EQ-6; kipindi EQ-13; EQ-24
BUKAVU (F, SW): KI-1; KI-11; KI-12
BUTEMBO (SW): KI-7; KI-9
DUNGU (LI): OR-6; OR-13; kipindi OR-17
GBADOLITE (LI): EQ-5; EQ-9; EQ-19
KABINDA (F, SH): KA-5; KA-13; kipindi KA-32
KALEMIE (SW): Kipindi KT-12; KT-18; kipindi KT-19
KENGE (MK): BD-3; BD-9; kipindi BD-21
KINKONDJA (KU): Kipindi KT-8; KT-9; kipindi KT-10; kipindi KT-16
KINSHASA (LI 2): KN-2; KN-5; KN-6; KN-9; KN-11
KISANGANI (LI, SW): Kipindi OR-1; kipindi OR-5; kipindi OR-7; OR-9; kipindi OR-14
KONGOLO (SW): Kipindi KI-4; KT-22
LIKASI (F, SW): Kipindi KT-1; KT-17; KT-20; KT-23
NIOKI (LI): BD-4; BD-6; BD-14; BD-15
POINTE-NOIRE (F, MK-Cgo): CO-2; CO-6; kipindi CO-8
UVIRA (SW): KI-8; kipindi BU-1
4-6 Kweji 9, 1998
BENI (SW): KI-5; KI-10
BOKUNGU (LI): EQ-10; kipindi EQ-13
BUJUMBURA (RU): Kipindi BU-1; BU-2; BU-3
GEMENA (LI): EQ-1; EQ-14
ILEBO (F, SH): KA-10; KA-15; KA-29
KAMINA (SW, KU): Kipindi KT-4; kipindi KT-6; KT-7; KT-15
KIRUNGU/MOBA (SW): Kipindi KT-12; kipindi KT-19
KOLE (OT): KA-7; KA-21; kipindi KA-26
KOLWEZI (F, SW): Kipindi KT-1; KT-3; kipindi KT-5
MUKEDI (MK): BD-18; BD-23
OUESSO (F): Kipindi CO-3; kipindi CO-7
TEMBO (LI): BD-17; kipindi BD-13
11-13 Kweji 9, 1998
BUTA (LI): Kipindi OR-8; OR-11
GUNGU (MK): BD-11; BD-12; kipindi BD-22
KABONGO (KU): Kipindi KT-4; kipindi KT-6; KT-24
MWENE DITU (F, SH): KA-3; KA-24; kipindi KA-25
PEPA (SW): KT-11; KT-25
[Binenwa bya Kifwatulo pa paje 6]
[Kapango pa paje 6]
Kitango—Myanda Ya Kwivuluja
[Binenwa bya Kifwatulo pa paje 5]
[List of locations on page 5]
Bitango Bya Distrike 1998