“Lwitabijo mu Kinenwa kya Leza”—Kitango kya Distrike 1997
1 Mutumibwa Polo wāvulwije Temote amba “Kisonekwa kyonso i kya ku bukomo bwa mushipiditu wa Leza.” (2 Tem. 3:16, NW) Kinenwa kya Leza byokidi kya ku bukomo bwa mushipiditu, tudi na bubinga bonso bwa kwikadila na lwitabijo mu akyo. Uno mwaka, kitango kya distrike kikekala na mutwe wa mwanda unena’mba “Lwitabijo mu Kinenwa kya Leza.” Twikale bayuke bubinebine kepadi myaka mivule nansha twikale bapya batwelele’nka panopano mu bulongolodi bwa Yehova, ino mpangiko ikaningija lwitabijo lwetu mu Bible. Umo ne umo umbukata mwetu ufwaninwe kwilongolola mwanda wa kukatanwa ku kitango kyonso kituntulu. Bine, kikekala kikankamika pa kumona bantu basangedile musapu panopano batanwa netu pamo, nakampata boba botwifundanga nabo Bible!
2 Kitango kya Mafuku Asatu: Kitango kya mafuku asatu i kilongololwe uno mwaka pamwanda wa kamweno ketu. Mwingilo Wetu wa Bulopwe wa kweji 2, 1997 witulombola mulongo wa bifuko bya bitango 53 bikalongeka mu Burundi, mu Congo ne mu Zaïre. Potwisamba pano, uyukile kala ne kifuko kya kitango kikatanwa’ko kipwilo kyenu, kadi ufwaninwe kukwata mpangiko miluji mwanda wa ukatanwe’ko umbula bwa mafuku onso asatu. Lelo kodi mulombe mukulumpe obe wa ku kaji konje mufwaninwe? Shi udi na bana bafunda, lelo kodi muyukije na bulēme badimu babo amba kebakekalapo ku masomo mu dyabutano ne mu dyamposo mwanda wa uno mwanda mukatampe wa mvubu mu bufundiji bwabo bwa mutōtelo?—Kup. 31:12.
3 Difuku ne difuku, kitango kikashilula na 9:30. Bibelo bikashitulwa na 8:00. Enka boba badi’mo na mwingilo kampanda wa kuvuija, ye abo bakapebwa lupusa lwa kutwela kumeso kwa kitatyi, ino kebakapebwapo lupusa lwa kulamina ba byaba kumeso kwa kushitwilwa ku bonso binjilo bya kifuko kikalongelwapo kitango.—Fid. 2:4.
4 Shi Mute’ko Mutyima Nankyo Mubalonga Biyampe: Mu myaka katwa imbajinji, mutumibwa Petelo wāvulwije bakristu amba i kipite buya kobadi bekale kuta mutyima ku kinenwa kya bupolofeto pamo bwa ku kimuni kitēma mu kifuko kya fukutu. (2 Petelo 1:19, MB) I kyabine ne kotudi batwe. Byotushikete mu ntanda idi mu lupusa lwa Satana, tudi bwa batwe badi mu kifuko kya fukutu. Tudi na mutyima wa kufwijako mwanda twāityilwe kutamba mu fukutu ya kumushipiditu. (Kol. 1:13; 1 Pet. 2:9; 1 Yoa. 5:19) Tufwaninwe kulama lwitabijo lukomo na kuta mutyima ku Kinenwa kya Yehova kya ku bukomo bwa mushipiditu, shi tusaka kushala mu mwinya. Kitango kyetu kya distrike kīya kumeso kiketukankamika kulonga kino.
5 Pa kusaka kuta mutyima enka pa kitango, kiketulomba padi kulonga bukomo bwa pabula, ino na bubine ketukabulwepo kweselwa shi tubakekilonga. Tukata mutyima ku kukokolokwa senene, mwanda kuketukwasha tukateje na katentekeji bipindi bishileshile bya mpangiko. Twitūdilei’ko kitatyi difuku ne difuku, kya kwenda ku kitango ne kya kufika kushikata kumeso kwa kushilula kupwila. Kupwa tukembei pamo lwimbo lwa kushilula nalo ne kukamwena mu milombelo. Batame bafwaninwe kukaleta kimfwa kilumbuluke, ne bambutwile bafwaninwe kuteakanya babo bana.—Ef. 6:4.
6 Tukatompa kulanguluka bikatampe pa milangwe ikesambilwa’po shi tubandaule dibajinji mpangiko ya bishinte bya mu difuku. Kino kikabweja kusepelela kwetu kitatyi kyobikapityijibwa. Tukokeja kukekala batengele myanda yotubwanya kukashintulwila bakwabo buluji botukulupidile mudi Leza ne mu milao yandi ya kupala mpalo boba bamukimba ne mikeketo. (Bah. 11:1, 6) I kyendelemo kotudi kusoneka myanda mīpi imanine’po kitango. Ino shi tukimbe kusoneka bintu bivule, myanda mikwabo ya kamweno iketupita kitatyi kyotwipēne mu kusoneka.
7 Mwaka wapityile, twamwene monka batame ne bankasampe bajokoloka mu mikalo ya milamba pampikwa kyobalonga, banangakana panja ne kwisamba na bantu bakwabo, pa kyaba kya kuteja byobya bitekele “umpika wabinebine ne wamanwa” pamwanda wa kamweno ketu. Yesu wālaile kwitupa bidibwa bya kumushipiditu pa kitatyi kitungwe. (Mat. 24:45-47) Pa kino, tufwaninwe kutanwa’ko mwanda wa kwisokwela kamweno mu bino bidibwa, ke pa mwandapo wa kwikala bakubulwa kufwijako. (2 Kod. 6:1) Kimweka monka amba bana bakambakanyanga bininge na kulombalomba kwenda kufula kyaba ne kyaba, abo papo na mutyima wa kwimana bende bakakaye bitupu. Mufwaninwe kufundija benu bana ku mobo, mwanda wa kwibakwasha baleke kuno kuselakana kwa kwenda kufula ne kukunukakunuka kitatyi kipityijibwa mpangiko. Dimodimo, babitumbafumu bashikatanga mu bisumpi bwa pala, kebesambe, besongola, pakwabo betumina bishima bya mangela. Dyalelo, bansongwanzele betu baponenwanga na lupusa lubi kadi basakilwa kujadika milangwe pamo pa myanda yobalombolwa, pampikwa kulonga bintu bikwabo umbula bwa kupwila. Bafwaninwe kusumbula bilokoloko bya bunkasampe byakubulwa kukwatañana na misoñanya ya mu Bible. (Tala 2 Temote 2:22.) Kuta mutyima kwa batwe bonso, bakulumpe ne bankasampe kukapēja Yehova bulēme ne kadi kukamusangaja.
8 Shi i kyendelemo, umo wa mu mwingilo wa kutundaila bāya ukokeja kupa muntu kampanda madingi atala pa uno mwanda, kadi kino kifwaninwe kumonwa bu kiyukeno kya buswe kitamba kudi Yehova. (Ngat. 6:1) Muntu yense ufwaninwe kuvuluka’mba shi i mulonge bukomo bwa kwiya kutanwa ku kitango i pa mwanda wa ‘kuteja ne kwifunda.’ (Kup. 31:12) Kadi, ‘muntu wa tunangu ukateja ne kuvudijibwa mu kufundijibwa.’ (Nk. 1:5) Tamba’nka pano kutūla ne ku kitango, twisambilei pamo na kisaka pa mvubu ya kushikatyila pamo, kushala pa kyaba kimo umbula bwa mpangiko ne kwikala bate’ko mutyima na kitungo kya kumwena’mo bikatampe.
9 Muvwadilo Usangaja Yehova: Boba badi umbukata mwa bantu ba Yehova batalwanga nyeke na bantu ba ntanda yonso. (1 Kod. 4:9) Mungya buluji, twi bayukane pamwanda wa muvwadilo wetu mulumbuluke ne pa mutendelo ne mubandilo wetu. Bavule umbukata mwa boba bengidijanga misoñanya ya Bisonekwa itelelwe mu 1 Temote 2:9, 10 ne mu 1 Petelo 3:3, 4 bamonanga’mba mumwekelo wabo wikalanga walamuka umbyonso kupita’ko na mobadi bekadile pobashilwile kwilunga ku kipwilo kya bwine-kristu. Kino i kiyukeno kimweke patōka kya kwishila kudi pa bukata bwa mumwekelo wetu na mivwadilo, mitendelo ne mibandilo myoneke yotumona mu ino ntanda. Tufwaninwe kwikala badyumuke, kutyina amba twakeifwana na ntanda na kuvwala mbwija ikokela meso potudi, nansha kukankamika myondele kampanda na mutendelo wetu nansha na kuvwala bintu bileta bumvu. Muvwadilo ne mutendelo wetu ufwaninwe kuleta kimfwa kilumbuluke kikwasha bapya baile ku kitango amba bamone mufwaninwe kwikadila muvwadilo wa bakristu.
10 Mumwekelo wetu otwadi nao mu mwaka wapityile’u ku bitango, wadi mulumbuluke mpata; inoko, batutu bamobamo ne bakaka badi na muvwadilo, mutendelo ne mubandilo wa bwine-ntanda, nakampata mu bitatyi byobakokolokwa. Tufwaninwe kubandaula muvwadilo wetu ne mutendelo nansha mubandilo wetu kitatyi kyotwiteakanya kukatanwa ku kitango. Banwe bambutwile, tongai na tunangu byobya bikavwala benu bana, banuke ne batamunuke’ko. Tukulupile amba ketukalekapo mivwadilo ya ino ntanda nansha miswelo yayo ingidije lupusa lubi pa mumwekelo wa bwine-kristu.
11 Twikalei na Mwiendelejo Mulumbuluke: Mwiendelejo mulumbuluke i kiyukeno kya bakristu babine. (1 Pet. 2:12) Ponso potudi ku kitango, ku maleshitola, ku mahotela, nansha mu ñendo, mwikadilo wetu ufwaninwe kupāna bukamoni bulumbuluke ne kukwasha bantu bamone kyokya kilupulanga lwitabijo mudi Leza ne mu Kinenwa kyandi. Kino kikokeja kufikija ne bamobamo ku kwabila kuyuka Yehova. (Tala 1 Pet. 3:1, 2.) Tudi na madyese a kutumbija Yehova na mwiendelejo wetu.
12 Kitatyi ne kitatyi tuvulujibwanga kuta mutyima ku mwiendelejo wa betu bana, ne kwepuka kwibashiya pakubulwa wibatala nansha kwibaleka banyema lubilo mu mahotela (nansha kokwa kotufikile), mwanda kino kikambakanyanga bantu bakwabo. Mwaka ne mwaka, Sosiete uyukijibwanga’mba betu bana bamobamo batanwanga pampikwa muntu wibalama. Nansha shi kitango kitupanga mikenga ya kwimona na batutu ne bakaka, ne kubungakana nabo pamo, bambutwile kebafwaninwepo kwilwa kiselwa kyabo kya kulama babo bana kitatyi kyonso. I kiselwa kitwikilwe shabana ne inabana yense na Yehova. (Nk. 1:8; Ef. 6:4) Bilongwa bikuma bana balekelwe pampikwa wibalama, bikokeja kufutulwija bulēme budi na Batumoni ba Yehova bakwabo balonga buninge bwa kwilēmeka.—Nk. 29:15.
13 Tukwashei ku Lupeto Lwajimijibwe Pamwanda wa Kitango: Tujimijanga batwe bonso lupeto mwanda wa kukatanwa ku kitango. Kudi lupeto lukwabo lotujimijanga lotufwaninwe kulanguluka’po. Bifuko bingidijibwa mwanda wa kulongela’po bitango bilomba lupeto luvule. Kudi myanda mivule ijimija lupeto ifwaninwe kuvuijibwa. Byabuntu bya kwisakila na mutyima tō byomutūlanga ku bitango bitendelwanga ne kusepelelwa nakampata.—Bil. 20:35; 2 Kod. 9:7, 11, 13.
14 Milamba ya Kushikata’po: Madingi aletelwe ku mwaka wapityile akidi monka na mvubu: BOKOKEJA KULAMINA BIFUKO BYA KUSHIKATA’PO I ENKA BA MU KYENU KISAKA NANSHA BOBA BOMWIILE NABO KETE. I kyansangaji pa kumona’mba ino myaka yamfulo, boba batanwanga ku bitango bavule balēmekanga ino misoñanya, kino kitamijanga mwikadilo wa buswe wikalanga ku bitango byetu. Mu bifuko bivule pala pala mulongelwanga bitango, bifuko bya kushikata’po bipēla kusokola kutabuka’ko mu bikwabo. Ta mutyima wa kwitūla pa kyaba kya bakwenu na kushila boba badi mu ngikadilo mikomo ilomba kushilwa’byo pa kushikata.
15 Mafoto, Makamela ne Makasete: Ukokeja kukengidija mafoto ne bingidilwa bikwabo bikwata mawi. Inoko, ketufwaninwepo kulabika bemvwaniki bakwabo pa kwibingidija. Ketufwaninwepo kunangakana mu kitatyi kya kupwila mwanda wa kukwata mafoto, ke-pantu tubwanya kuvutakanya bakwabo bekankila kuteja. Kekudipo kingidilwa kikwata mawi nansha kimo, shi kika, shi kika, kikasomekwa ku nshinga ya mudilo nansha ya mawi ikengidijibwa ku kitango, nansha kujikakanya mupitwa nansha mu bukata mwa milamba nansha kujika bemvwaniki bakwabo basaka kumona.
16 Bundapi Bubajinji: Mwingilo wa bundapi bubajinji i wa kukwasha’tu bukidibukidi. Keukokejapo kundapa muntu wa misongo ya nyeke. Omwanda mufwaninwe kulanguluka kumeso bundapi bulombanga misongo yobe ne ya ba mu kisaka kyobe. Sela binyinyi byobe, mwanda buñanga bukwabo bukukwashanga, ne miji mikwabo ya uno muswelo kebikokejapo kutanwa ku kitango. Bonso babēla luba lwa dityima, bakokeja kupulamwa dityima kūlu nansha kupulukwa dityima mu kitulumukila, ne bikwabo, bafwaninwe mu miswelo yonso kulonga bukomo bwa kwīta mutyima. Bafwaninwe kwikala na malawa mafwaninwe, ne muntu wa mu kisaka kyabo nansha wa pa kipwilo kyabo uyukile mikadila yabo, bafwaninwe kwikala nandi kitatyi kyonso, mwanda wa kwibakwasha shi bibakoleja. Ke kimweke ku bitango, bantu badi na misongo ya nyeke bashibwa pa kasuku ne kukwatwa na mine misongo yabo’ya, kino kiletanga bikambija. Buludiki bulemenenwanga bininge, ke kunyemena ku bamiñanga lubilo mwanda wa kukamutwala ku lupitalo. Shi muntu usakilwa buñanga bwa pabula nansha shi i kutupu muntu wa mu kisaka kyandi ukokeja kumutala, bakulumpe ba pa kipwilo kyandi bafwaninwe kuyukijibwa mobikadile mwanda wa bakwate mpangiko mifwaninwe ya kumukwasha. Kekukekalapo byumba bya pabula biteakanibwe mwanda wa boba badi na misongo ibakoleja kushikata mu bifuko bishikatwanga’mo nyeke.
17 Bidibwa: Kutalulwa’ko kwa mwingilo wa kutēka bidibwa kudi na bukwashi kotudi, mwanda kwitushila kyaba kya kwimika ñeni yetu bininge pa bidibwa bya kumushipiditu umbula bwa kupwila. Tamba penepa, tutambulanga mawi mavule a kufwijako mwanda wa kuno kupēlejibwa. Umo ne umo ufwaninwe kukateakanya bidibwa bīta ngitu bifwaninwe kuselwa bya kudya pa kukokolokwa kwa midi. Ketukatwelapo pa kifuko kikalongelwa’po kitango na matyupa aladika nansha na mālwa akolwañana mene. Byato bya mai-makasa bifwaninwe kwikala bityetye bikokeja kutūlwa munshi mwa bishikato byenu. Kyamwekele amba batenwe ku kitango badi badya kitatyi kyadi kipityijibwa mpangiko. Kuno i kubulwa bulēme. Ku bitango bimobimo, panja nansha munda mwa kifuko mupwidilwa, tumonanga bantu batūla’mo tubidibwa twabusunga, ne kimweka bu banabetu bendanga kukapota’po byakudya kitatyi kipityijibwa mpangiko. Kino kekifwaninwepo.
18 Tusangelanga bikatampe masobo etu a kumushipiditu ne bubutule bwetu bwa ndoe ne bulumbuluke umbula bwa kukokolokwa kwa midi. Mwendele kino kitungo kya ino mpangiko, ta mutyima ku kusela bidibwa byobe, kupita’ko kutaluka pa kifuko mwanda wa kukebipota. Namino ukekala na kyaba kikatampe kya kusepelela kisense kya batutu ne bakaka.
19 Bine tudi na kusepelela bininge potulanga kitango kya distrike kyafwena, “Lwitabijo mu Kinenwa kya Leza”! Tusaka batwe bonso kuyuka amba twi beteakanye mwanda wa kukatanwa ku mpangiko yonso mituntulu, mwanda tumwene mu masobo a kumushipiditu etulongolwedile Yehova kupityila ku bulongolodi bwandi. Kino kiketukwasha twikale ‘bakumbanye byonso mwanda wa mwingilo onso mulumbuluke’ mu mafuku āya kumeso.—2 Tem. 3:17.
Lubatyijo: Banabetu bakabatyijibwa bafwaninwe kukashikata mu kifuko kibalaminwe kumeso kwa kushilula kupwila kwa mu dyamposo lubanga. Yewa yense ukabatyijibwa ukekala na mbwija mifwaninwe ne kya kwipampula nakyo mema. Mafuku munyuma, bamobamo badi na muvwadilo wakubulwa bulēmantu ne upēlula mutyika wa kino kinkumenkume. Bakulumpe bakabandaula bipangujo bidi mu dibuku Huduma Yetu na boba bakabatyijibwa, bafwaninwe kujingulula shi umo ne umo wa mu abo wivwanije senene uno mwanda. Pa kupwa kwa muneni kupityija kishinte kya lubatyijo ne milombelo, mwimaniji wa kupwila ukembija lwimbo. Kupwa kwa kitembo kya mfulo, batutu bengila mwingilo wa kutundaila bāya bakaludikila boba bakabatyijibwa ku kifuko kya lubatyijo. Lubatyijo ne kwipāna i mwanda wa muntu kasuku kandi na Yehova. Omwanda ke kiyampepo kulonga “lubatyijo lwa kikonge” lwa bantu babidi nansha bavule kutabuka, bekwete ku makasa umo na mukwabo, nansha belamete kitatyi kya kutokenibwa mu mema.
Tuyukeno: Ta mutyima ku kuvwala kayukeno ka 1997 ku kitango nansha ke mu dishinda kitatyi kyoenda ne kyojoka ku kitango. Kino kikakukwasha divule ku kupāna bukamoni bulumbuluke. Ukapota kayukeno ne kapulashityike kako ku kipwilo kyenu, mwanda ketukekala’kopo ku kitango. Kokikungila enka mafuku asenselela’ko kitango, ebiya kolombe kayukeno kobe ne twa kisaka kyobe. Kokilwa’ko kusela kakanda “Instructions médicales — Pas de sang.”
Bifikilo: Tubemulombe banwe bonso kwingidila pamo kukwatañana ENKA na majina a bifuko bya kufikila’ko atandikilwe na Bilo ya kitango. Shi batutu bene kibundi abetutundaila ku mobo abo, ketufwaninwepo kupēlula kizaji kyabo na kushikata kwabo umbula bwa mafuku kupwa kwa kitango. Nansha ke umbula bwa mafuku a kitango, kekudipo ufwaninwe kufwatakanya amba mufikilwa ye uketudisha. Bamobamo bakankalwanga kwikilonga. Nanshi tutei mutyima wa kuteakanya tamba’nka pano bidibwa byotukadya pakekala’ko kitango. Mulembi wa pa kipwilo ukata mutyima ku kutuma bukidibukidi Kulombwa kwa byumba bya bantu ba pabula ku adelese ya ku kitango kyobakenda’ko. Shi musaka baleke kwimubikila kyumba kya bantu ba pabula kyomwalombele, nabya pelakanai kuyukija mutundaiji wa beni nansha ku hotela ne ku mwingilo wa kutundaila bāya wa kitango, mwanda wa kyumba’kya kipebwe muntu mukwabo.
Mapushipushi ne Mipando: Mu bifuko bikwabo, i kipēlejibwe kwingidija mapushipushi aselwanga’mo bana ku bitango bya bantu bavule. Mbila ya kwilama ilomba kuleka kushiya’o mupita bantu, mu mikalo ya milamba nansha umbukata mwa bishikato. Mwanda bibumbo byobidi bivule, kukokeja kwikala kwifinya, penepa mapushipushi akekala ke kyaka ku bana bashikete’mo ne ku boba bakokeja kukukala’ko. Tai mutyima ku kuleka kupaika’o pa kifuko palongelwa kitango. Inoko bishikato bya bana balukeke nansha tubishikatwa twa matonto tukokeja kuletwa, mwanda bambutwile bakokeja kwibitūla kufula kwa bishikato byabo. Tai mutyima ku kuleka kupaya mipando. Mwanda ikokeja kuleta kyāka ne keipelwepo kishima kya kwiingidija ku bitango bikatampe bya bantu bangi. Kwingidila kwenu pamo mu ino myanda ibidi i kwa mvubu mikatampe ne i kusangelwe nakampata.
Mwingilo wa Kwisakila: Lelo ukokeja kwilamina’ko kitatyi kityetye ku kitango mwanda wa kukwasha’ko mu mwingilo nansha umo? Tukokeja kwikala ba kamweno mpata ne kwisokwela nsangaji mikatampe na kwipāna mu kwingidila banabetu, nansha mu kitatyi kityetye’tu. Shi ubwanya kuleta bukwashi bobe, ta mutyima wa kuketwala ku bilo ya mwingilo wa kwisakila idi ku kitango. Bana ba myaka idi munshi mwa 16 bakokeja nabo kulonga kipindi kyabo kilumbuluke na kwingidila munshi mwa bwendeji bwa bashabo nansha bainabo, nansha bwa mutame mukwabo wibemanine.
Bidyumu: Twikalei na kampeja-bukidi ka kusansanya bikambija bikokeja kulupuka mwanda wa kwepuka bikoleja byabituputupu. Divule, boba batambile ku bibundi bingi, bekalanga bikwatwa bipēla ku bangivi ne bantu bakwabo bamanyengenyenge. Ta nyeke mutyima ku kushita milango ya motoka obe na lufungulo, kadi kokaleka kintu kampanda patōka kikokeja kukoka meso a bangivi. Bangivi ne batutyomona bakokwanga na bifuko bibungile bantu bavule pamo. Kikekala kyampikwa tunangu kushiya kintu kya bulēme pa kityi kyoshikete’po. Kuyukilepo shi bine bonso bakujokolokele i enka bakristu. Mwanda waka utūle muntu pa ditompo? Twatambwile malapolo alombola’mba kudi bantu bakubulwa kuyukanika basakile kukokela bana bankasampe panja. KE KIYAMPEPO KULEKELELA BENU BANA.
Kifwaninwe kadi kuta mutyima ku kwepuka maakishida. Mafuku kunyuma, banabetu badi bakila mu motoka nansha mu māto pampikwa kuta mutyima ku buvule bwa bantu bafwaninwe kukanda’mo. Bipa byalupukile’ko i maakishida makomo. Būmi i bujila, tufwaninwe kudyumuka na kwiepeja kwitwika māpu a mashi. Pa kutabuka kilayi, tadija shi kekudipo motoka wiya, kutyina wakakongwa nansha wakakongeja bobe bana.
Kitango kibajinji kya distrike “Lwitabijo mu Kinenwa kya Leza” kikashilula mu mafuku 11 kweji 7, 1997. Tulombela ne mutyima umo Yehova etwesele mu bukomo bwetu botulonga mwanda wa kukatanwa ku uno mulongo wa bitango bya distrike ne kuketudisha bintu binune byatūdile ku meza Andi.
[Binenwa bya Kifwatulo pa paje 6]
[Kapango pa paje 6]
Kitango kya Distrike—Myanda Mikatampe mu Kīpi