“Mikendi Ya Ndoe Ya Leza”—Kitango Kya Distrike 1996
1 Bine, kitango kya distrike kya uno mwaka kiketukwasha tulame ndoe ya Leza ne kikalombola mwingilo wetu pa mwanda utala kukwasha bakwabo nabo bakatane ino ndoe. Enka na mokyesambilwe mu Mwingilo Wetu wa Bulopwe wa kweji 2, 1996, kino kitango kikekala na mutwe wa mwanda unena’mba “Mikendi ya Ndoe ya Leza.” Lelo wimwilongolole kukatanwa’ko?
2 Kitango Kikeja Mafuku Asatu: Tukulupile’mba bine ukasangela pakatampe kino kitango kya uno mwaka ne ukajokela kobe na bupyasakane bupya. (2 Bil. 7:10) Kitango kya uno mwaka, nakyo kikeja mafuku asatu. Lelo kodi mwiteakanye mwanda wa kulomba konje ukatanwe’ko umbula bwa ano mafuku asatu? Shi mudi na bana bendenga ku masomo, lelo kemudi kala balombole badimu babo amba kebakekalapo ku masomo mu dyabutano pamwanda wa kukatanwa ku kino kinkumemkume kya bufundiji butala pa mutōtelo wabo?
3 Mwingilo Wetu wa Bulopwe wa kweji 2, 1996 witulombola mafuku ne bifuko bikalongelwa’ko kino kitango myaba yetu yonso. Mulembi wa pa kyenu kipwilo kemwimulombole kala kitango kyomukatanwa’ko.
4 Difuku ne difuku kitango kikashilula na 9h:30, ne kikapwa mu dyayenga ku kyolwa na 4h. Bibelo bikashitulwa na 8h. Enka boba badi na mwingilo kampanda wakuvuija, ye abo bakapebwa lupusa lwa kutwela kumeso kwa kitatyi, ino kebakapebwapo lupusa lwa kulamina ba byaba kumeso kwa kushitulwa kwa binjilo bya kifuko kikalongelwa’mo kitango ku bantu bonso. Lelo tukalombola butukanye ku bana betu batame ne babulema na kwibashila bifuko mu byaba bifwaninwe ne bilumbuluke? Ketufwaninwepo kwilwako’mba ‘buswe . . . kebukimbenga’po enka kamweno ka pakasuku, mhm.’—1 Kod. 13:4, 5; Fid. 2:4.
5 Lelo Tukanonibwa? Pakupwa kutela Nkindi 27:17, amba “kilonda kinonanga kilonda,” Kiteba kya Mulami kya mu 15 kweji 8, 1993, pa paje 8 (Falanse), pa kamutwe ka mwanda kanena’mba “Muswelo Ukokeja Bakristu ‘Kwinona’ Umo ku Mukwabo,” mus. 1 wādi unena’mba: “Tudi pamo enka bwa bingidilwa bikimba kunonibwa kitatyi ne kitatyi. Buswe bwetu kudi Yehova ne mbila yotutyiba itala pa lwitabijo lwetu, bilomba twikale besansanye na ino ntanda, tufwaninwe nyeke kwishīla na bantu bakwabo.” Lelo i muswelo’ka otukengidija ano madingi?
6 Twi besansanye na ba ino ntanda ne tufwaninwe kwikala nyeke enka nenki. Shi tusaka kwikala bapyasakane mu mingilo milumbuluke, tufwaninwe kwendelela nyeke na kulonga bukomo. (Tetusa 2:14) O mwanda kishinte kya Kiteba kya Mulami kitelelwe kūlu kino kyādi kinena’mba: “Shi tulamete boba basenswe Yehova, nabya tukenona batwe bene na bene, tukesombela batwe bene na bene ku buswe ne ku mingilo milumbuluke.” Kitango kya distrike i kimo kya mu mpangiko iteakanibwe na Yehova mwanda wa kwitukwasha twinone ku mushipiditu. Ketukibulwai kipindi nansha kimo.
7 Twilombolei bu Batunangu na Kwivwanija: Kwivwanija i bwino botufwaninwe kutamija. Banenanga’mba muntu wañeni mifikile, ulamanga enka kipindi kya myanda yāivwene, nansha shi wadi ulonda na katentekeji ka muswelo’ka. Dyalelo, misambo mivule i mimanine enka pa myanda itala kwipwija mukose; kikokeja kwitwikadila kikomo kujadika milangwe kitatyi kilampe. Lelo ketukokejapo kutompa kulemununa manwa etu a kujadika milangwe, kimfwa kitatyi kyotushikete umbukata bwa bantu bavule mwanda wa kwivwanija muntu wisamba? Shi, kitatyi kyojoka ku kikalo kyobe, bakakwipangule kuleta nshintulwilo mīpi ya difuku ne difuku dya kitango, lelo ukabwanya kwikilonga? Lelo i muswelo’ka otukokeja batwe bonso kulemununa manwa etu mwanda wa tumone kwivwanija na katentekeji kipindi ne kipindi kya kino kitango?
8 I kyamvubu nanshi tulombole kuta mutyima kwetu kukatampe, shi bitupu ketukengidijapo kyabuntu kyetu kitupele Leza, ke lute kadi. Kimfwa, shi tute mutyima na katentekeji ku mutwe wa mwanda ne mwanda, ketukakolelwapo kuvuluka myanda mikatampe ya mu kishinte nansha ya mu kipindi kya ino mpangiko. Inoko, kino kimanine pa muswelo otukateja na katentekeji ku bintu byotukevwana ku kino kitango kya distrike. Ngikadilo yetu ya kumushipiditu ne lukulupilo lwetu lutala pa mafuku a kumeso, bimanine pa katentekeji ne pa muswelo otukata mutyima ku kipindi ne kipindi kya kino kitango. Ku bitango, betufundijanga’ko mashinda a Yehova, ne tutambulanga bufundiji butala pa muswelo wa kuvuija mwingilo wa lupandilo. (1 Tem. 4:16) Wifwatakenyepo bidi amba wi kyombo pa dijiba padi mwela mukatampe bininge. Milao ya Yehova idi pamo’nka bwa ñanga wa kyombo mukomokomo mukulupilwe. Shi muntu kevwanijapo na katentekeji kitatyi kya kubungakana kwa bwine-kristu ne ulekele ñeni yandi kuzumbakana, ukokeja kubulwa kwivwana madingi nansha bufundiji bwamushike bwadi bukokeja kumukinga aleke kulobela kumushipiditu.—Bah. 2:1; 6:19.
9 Mu bifuko bivule bya pano pantanda, banabetu baloñanga bukomo bupitepite bwa ku ngitu mwanda wa kutanwa ku kupwila. Kino kikokeja kwitutenga pakatampe pakumona kuta mutyima kwabo kwa katentekeji kobalombolanga kitatyi kya bitango. Mu bifuko bikwabo namo, bantu bakwabo balabikanga bemvwaniki na kupitakana-pitakana mu bifuko bilongelwanga’mo kubungakana. Bakwabo nabo bekalanga balondela. Ku kubungakana kumo-kumo, pavule kyādi kikomo kuteja myanda imbajinji ya mu maminite a kuñanjilo, pamwanda wa kavutakanya ka bantu bādi babipitakana koku ne koku mu misebo ne kunyuma kwa kobo ka lukala ka baneni. Pavule kebekalangapo batutu bengila bu ba kwisakila mu mwingilo kampanda, nansha ba inabana bakwatakanya babo bana mhm. Nakampata kuno kukambakanibwa kulupukanga ku bantu bekalanga balenga lunwa bitupu. Uno mwaka, mwingilo wa kutundaila baya ukata mutyima ku uno mwanda, ne tukulupile’mba umo ne umo ukashikata pa kyandi kifuko kitatyi kiketa mwimaninji bemvwaniki bashikate. Tukekala na kufwijako kukatampe pa kwingidila pamo kwenu mu uno mwanda.
10 Lelo i madingi’ka mafwaninwe aketukwasha mwanda wa tulonde na katentekeji myanda ikanenwa ku kitango ne kulama pakatampe mu ñeni milangwe ikabandaulwa’ko? Byobya byotwēsambile mu myaka yapityile’i bidi nyeke na mvubu mikatampe: (a) Jadika milangwe pa buluji bukatampe bōidile ku kitango. Ke pamwandapo wa kwiolola ngitu mhm, ino i pamwanda wa kwivwana ne kufundijibwa. (Kup. 31:12) Longa bukomo bwa kukokolokwa senene bufuku difuku ne difuku. Shi wikale wimukoke bininge kitatyi kyoenda ku kitango, kukekalapo na muswelo wa kujadika milangwe senene. (b) Fika kumeso kwa kitatyi bininge mwanda wa ukamone kyaba kyakwimika motoka obe nansha kinga yobe, ne ukashikate kumeso kwa kubungakana kekwashilwile. Shi ufwila kukashikata enka shi kitango kekishilule, ukabulwa kulonda ñanjilo ya kubungakana. (c) Nsoneka myanda mikatampe kitatyi kilongwa bishinte. Shi wikale kusoneka myanda kapwīla, kino kikakukankaja kwivwanija senene na katentekeji. Kitatyi kyosoneka, ufwaninwe kujingulula shi kubulwengapo milangwe mikwabo pamwanda wa kubambila meso enka pa byosoneka. (d) Kitatyi kitelwa kipindi kimo kya kitango, ufwaninwe kwikala mwiteakanye mwanda wa kwikivwanija na katentekeji kakatampe. Wīpangule bidi’mba: ‘Lelo i kika kyonkokeja kwifunda mu kino kipindi mwanda wa mvudije kufwijako kwami ne buswe bwami kudi Yehova? Lelo ino misoñanya ikokeja nkukwasha muswelo’ka nombole pakatampe bu-muntu bupya? Lelo kino kikokeja nkukwasha muswelo’ka nelemunune mu mwingilo?’
11 Mwiendelejo Ulemekeja Mwingilo Wetu: Polo wākankamikile Tetusa ekale ‘kimfwa mu mingilo milumbuluke.’ Na kulombola kikokeji mu bufundiji bwandi, Tetusa wādi wa kukwasha bakwabo “umbyonsololo balemekeje lufundijo lwa Leza Mupandiji wetu.” (Tetusa 2:7, 10, MB) Ku mwaka ne mwaka, tutambulanga misoñanya milumbuluke itulombola mwanda waka i kyamvubu kwikala na mwiendelejo mukwatañane na kiswamutyima kya Leza kitatyi kyotwenda ku kitango, ku bifuko kotufikile, ne ku kifuko kilongelwa’ko kitango.
12 Kapita wa hotela imo wānene’mba: “I kya nsangaji kutambula ba Tumoni mwanda badi nyeke na kitukijetyima, betabijanga kwingidila pamo ne balamanga babo bana pabwipi nabo.” Mwingidi umo utambulanga bantu mu hotela wānene’mba mwingilo wandi wādi “umupelela pakatampe kitatyi kyādi kiandikija ba Tumoni pakufika kwabo nansha pakutaluka kwabo ku hotela, mwanda nansha byokyādi kibalomba kwitunga mulongo, ino bādi balombola nyeke kalemo, butukanye ne kwivwanija.” Mu Nouvelle-Angleterre, mu Amerika, mwana mukaji umo wāikele kutengwa pa mutyima bininge na mwiendelejo wa bankasampe bamo ba mu ba Tumoni bobādi nabo mu hotela ya ba myotoka; kupwa wālomba bamupe mabuku ādi esambila pa bulongolodi bwetu.
13 Inoko, tufwaninwe kwilemununa mu myanda imo-imo. Tusenswe kwimulombola myanda kampanda yaikele kutumwa ku Sosiete. Mutadi wendakana umo wetusonekele’mba bana ba ba Tumoni twa Yehova bafwaninwe kulamwa pakatampe. Twibamonanga benda bepanga lubilo mu byaba bikalanga bishala pululu pabukata bwa milamba, balenga lungwe lupitepite. Tufwaninwe kulombola betu bana’mba mwiendelejo wetu wa bwine-kristu ke enkapo wa mu ma nsā amo amo kete. Keushalangapo enka pa kifuko kya kitango, mhm. Twi bakristu kitatyi kyonso ma nsā 24 pa 24. Mwiendelejo wetu ku njibo ne mu dishinda ufwaninwe kwikala wa bulemantu pamo’nka na mowikadilanga kitatyi kyotubungakananga na banabetu tutambula bufundiji bwa Yehova.—Is. 54:13; 1 Pet. 2:12.
14 Nansha byokekukidipo mwingilo utala bidibwa ku bitango, lupeto luvule lwikalanga lulupulwa nyeke mwanda wa kufutyila bifuko byotwingidija, kuteakanya byaba bya kushika myotoka nansha makinga (mu bifuko mobingidijibwa) ne kuteakanya bintu bikwabo. Byabuntu byetu bya mutyima tō bikwashanga mwanda wa kufuta luno lupeto lonso lulupulwa. Kaka umo wādi na bana ke bansongwanzele waile ku kitango na lupeto lutyetye. Inoko, bandi bana ne aye mwine bāikele kuleta bukwashi bwabo na kyabuntu kya mutyima tō kityetye. Mbila ityiba muntu ne muntu pa uno mwanda i mwanda umutala aye mwine, inoko tukulupile’mba mwibemvwanije ino milangwe senene ya kwimuvuluja.—Bilongwa 20:35; 2 Kod. 9:7.
15 Tujingululwanga Kupityila ku Muvwadilo Wetu: Muvwadilo wetu ulombolanga bivule potudi ne pa malango etu atala pa bantu bakwabo. Bankasampe bamo-bamo ne batame bavule batananga ku masomo nansha ke ku mingilo bantu bavule bavwele bisandi bya myondele mitumbe ano mafuku ne bisalankane-salankane. Ku mwaka ne mwaka, muvwadilo wendanga oneka, ke wabumvu ne upepeja mutyima. Shi ketudyumukilepo ku kino, bantu ba ntanda betujokolokele bakokeja kwingidija lupusa lukatampe potudi, ne tukafule ku kuvwala na mobavwadila. Mivwadilo mivule kemyendelemopo kuvwala kitatyi kyotwenda ku kupwila mwanda wa kutōta. Kitatyi kya kitango kimo kya mwaka wapityile’u, twatambwile lusango lumo lwa kufwijako, ino lwadi lubwejako’mba: “Neipangulanga mwanda waka bansongwakaji bavule bādi na makanzo mēpi, ashiya nyuma ne kyādi pululu ne bisandi bikwabo bilale mapasula malampe bininge.” Batwe bonso tufwaninwe kuvwala mu muswelo mwendelemo ku bengidi bakristu, kikale ku kitango nansha ke kitatyi kyotwinangija pa kupwa kwa kitango. Tulangulukei kitatyi ne kitatyi ku madingi a mutumibwa Polo etulombola kuvwala ‘mbwija milongololwe senene, na kwityepeja, ne byendelemo.’—1 Tem. 2:9.
16 Lelo i ani ufwaninwe kukulombola’mba kino kisandi i ‘kilongololwe, na kwityepeja ne kyendelemo’? Kwikala na mwikadilo wa kwityepeja kishintulula “kutūkija moni ya meso, kwīfula.” Dibuku dileta bushintuludi dinena’mba muntu mutukanye uyukile “kwibeja.” Ke Sosietepo nansha bakulumpe bafwaninwe kutula mbila mu myanda itala muvwadilo nansha ke mu myanda itala mubandilo ne mutendelo wa nywene. Inoko, bakristu ba muvwadilo wakubulwa kwendelamo, lelo kebafwaninwepo kwilemununa pa kino? (Tala Fidipai 1:10.) Mbwija yetu, mubandilo ne mwitendelo wetu kebifwaninwepo kukokela meso potudi. Mumwekelo wetu ufwaninwe kwikala mulumbuluke, ino ke ufwaninwepo kwiula wa bene-ntanda nansha uleta bumvu. Byotudi bengidi ba myanda miyampe, tukalemeka Yehova ne tukalombola kimfwa kilumbuluke kya bulongolodi bwandi na kwikala na muvwadilo, mubandilo ne mwitendelo mwendelemo, kitatyi kyotudi mu kibundi kikalongelwa’mo kitango kya distrike. Pa kino, bambutwile bakalombola kimfwa kiyampe ne bafwaninwe kujingulula shi babo bana i bavwale mokifwaninwe mwanda wa uno mwanda mukatampe. Bakulumpe bafwaninwe kuleta kimfwa kilumbuluke ne bafwaninwe kwikala na kampeja bukidi ka kuleta madingi na bulumbuluke bonso shi i kyendelemo.
17 Mafoto, Makamera ne Makasete Akwata Mawi: Padi usakanga kukengidija mafoto ne makamera nansha bingidilwa bikwabo bikwata mawi, pa kino ufwaninwe kuta mutyima ku bemvwaniki bakwabo. Shi upitakananga koku ne koku mwanda wa kukwata mafoto kitatyi kya kubungakana, kukavutakanyapo enka bakwabo balonga bukomo mwanda wa kwivwana, ino abe nobe ukabulwa kipindi kikatampe kya kitango. Mungya buluji, tukokeja kumwena mu myanda ishintululwanga enka shi tutejanga baneni na katentekeji ne kusoneka myanda mikatampe yobesamba. Padi kikekala kiyampe kwikilonga shi myanda yotusaka kukwata i ya kukapa tutu nansha kaka ushele kwandi; ino shi i pamwanda wa kwiingidija batwe bene, tujingululanga pavule’mba kupwa kwa kupityija kitatyi kilampe na kukwata mawi ku bitango, pakujokela kunja, ketwikalangapo tumona kyaba kya kwibitala nansha kwibiteja monka. Kemufwaninwepo kukasomeka kingidilwa nansha kimo ku shinga ya mudilo nansha ya mawi ikengidijibwa ku kitango.
18 Milamba ya Kushikata’po: Tukyendelela na kumona kwilemununa kukatampe mu mwanda utala kulamina ba bifuko. Mwaka wapityile’u, bemvwaniki bavule baikele kulonda uno musoñanya: BOKOKEJA KULAMINA BIFUKO BYA KUSHIKATA’PO I ENKA BA MU KYENU KISAKA NANSHA BOBA BOMWIILE NABO KETE. Ye mwālongele bavule, o mwanda mwēmwene bu mwadi mupitwa luvula senene pomwadi mushikete. Kadi kyamvubu i kino, kwingidila pamo kwenu kwasangeje Yehova ne “umpika wabinebine,” upāna bidibwa bya kumushipiditu.—Mat. 24:45.
19 Kudi banabetu bavule badi na bukomo bwa mungitu bulomba kukengelelwa bininge. Bamo-bamo bayanga ku kitango na bityi byendejibwa ne bakimbanga kukwashibwa na bantu ba mu kyabo kisaka. Bakwabo nabo balondanga bwanga pamwanda wa kubela-bela, kimfwa misongo ya dityima. Kitutenekanga ku mutyima pa kumona bano batutu ne bakaka baswe baya ku kitango, basumininwe mwanda wa kuleka kubulwa nansha dimo bidibwa bya kumushipiditu. Kyaba kikwabo, bantu bekalanga bakwatwa na misongo ku kitango, pakubulwa muntu nansha umo wa mu kyabo kisaka nansha wa mu kyabo kipwilo mwine wa kwibakwasha. Pakwabo, buludiki bwa kitango bwikalanga bunyemena ku bamuñanga mwanda wa kukatwala tutu nansha kaka ku lupitalo. Kiselwa kya kukwatakanya boba babela misongo ikalanga itūtuluka, dibajinji kitalanga ba mu kyabo kisaka ne ba ku musuku wabo. Mwingilo wa bundapi bwa bukidi-bukidi wa ku kitango, keudipo na muswelo wa kukwatakanya babemvu badi na misongo itūtuluka. Shi muntu umo wa mu kyenu kisaka ukimbanga kukengelelwa mu muswelo wa pabula, mufwaninwe kumuta mutyima, kafwaninwe kushala pakasuku kandi, padi kukokeja kutamba mwanda mu kitulumukila. Ku mutamba mukwabo, kekukekalapo byumba byapabula biteakanibwe ku boba badi na misongo ibakankaja kushikata mu bifuko bishikatyibwanga’mo nyeke. Bakulumpe bafwaninwe kwikala na katentekeji ku bonso badi mu kyabo kipwilo, bakimba kukengelelwa bateakanye mpangiko milumbuluke mwanda wa kwibakwasha.
20 Bidibwa: Enka na motwekitangile mu Mwingilo Wetu wa Bulopwe wa kweji 4, kekukapotejibwapo bidibwa ku kino kitango kya distrike, nansha ke ku kubungakana kwa bipindi kwine ne ku kubungakana kwa difuku dimo kukalonda’po. Ino mpangiko mipya i milupule byabuyabuya bivule pa mwanda wa kibidiji kya kasela-mpao-keselele. Mwanetu umo wasonekele amba: “Ne mwikimone patōkelela bu madyese makatampe a kumushipiditu. Kino kitatyi kyonso ne bukomo botwadi tujimija mu kuteka bidibwa, tukokeja pano kwibwingidija ku bintu bya kumushipiditu. Kekudipo miuningo nansha imo imbi yongivwene itala pa uno mwanda.” Kaka umo nandi wānene’mba: “Banwe banabetu, muwakankamika mukristu yense ekale kwibandaula ne kumona muswelo wakokeja kupēleja būmi bwandi ne kuvudija mwingilo wandi wa kiteokratike.” Mutadi umo wendakana wāandikile pa mwanda utala mwingilo wa bidibwa’mba: “Kukwatañana na mpangiko ya kala, banabetu bavule bādi babulwa kitango kyonso.” Pakwisambila pa bidibwa byāpotele banabetu abo bene, mukulumpe umo wāsonekele’mba: “Bādi na byonso byādi bibasakila, inoko pakubulwa’mba betunge bidi ku mulongo.” Kaka umo nandi wāsoneka’mba: “Pakupwa kwa kubungakana, bonso bādi talala nyā mu ndoe pakubulwa kavutakanya, nansha kujinga mpala.” Shi kepano, muntu ne muntu ufwaninwe kwiselela aye mwine mpao ya kukadya mwanda wa akamone bukomo bwa kukatanwa ku kubungakana kyolwa ne kyolwa. Banabetu bavule bālombwele’mba bādi na kitatyi kikatampe kya kukatala balunda nabo.
21 Ku bitango bya distrike bya mu uno mwaka, kekukekalapo mwingilo wa kupoteja bidibwa. Ukokeja kwitudila’ko minite kampanda mwanda wa kubandaula dipya dyani dyantentekelo didi mu Mwingilo Wetu wa Bulopwe wa kweji 4, 1996 musāngo 8 ne kumfulo kwa kishinte, kuletelwe madingi atala pa bidibwa bileta bumeni byotufwaninwe kupaika ku kitango. Vulukai’mba kemufwaninwepo kusela byato bikatakata bya mai-makasa nansha ke malwa mene. Shi ukasaka kwingidija ka kyato katyetye kakutalaja’mo bintu, ufwaninwe kwikatula munshi mwa kishikatwa kyobe. Kufwaninwepo kwilwako’mba udi na kitatyi kikatampe pa kukokolokwa kwa midi kya kudya bidibwa ne kutoma bintu byoteakenye. Pamo’nka na motulongelanga ku kubungakana kwetu kwa ku Njibo ya Bulopwe, ketufwaninwe’po kudya nansha dimo kitatyi kipita mpangiko ya kitango. Mu uno muswelo tukalombola buleme bwa kulemeka mpangiko ya butōtyi ne bidibwa bya kumushipiditu.
22 Bitango bibajinji bya distrike “Mikendi ya Ndoe ya Leza” kebipwe kushilula mu matanda amo-amo. Lelo kodi kala mukwate mpangiko mifwaninwe mwanda wa ukatanwe ku kitango kyenu, lelo kodi kala mwiteakanye senene ukakankamikwe umbula bwa ano mafuku asatu na kisense kilumbuluke kya kumushipiditu? Tulomba Yehova esele bukomo bomulonga mwanda wa kukatanwa ku kitango kya uno mwaka. Lubatyijo: Banabetu bakabatyijibwa bafwaninwe kukashikata mu kifuko kibalaminwe kumeso kwa kushilula kwa kubungakana kwa mu dyamposo lubanga. Betulombwele’mba bamo-bamo bekalanga na mbwija yakubulwa bulemantu ne ipēlula mutyika wa lubatyijo. Muntu ne muntu ubatyijibwa ufwaninwe kwikala na mbwija yakengidija mifwaninwe ne kyakwipampula nakyo mema. Bakulumpe bakabandaula bipangujo bidi mu dibuku Huduma Yetu na banabetu bakabatyijibwa, bafwaninwe kujingulula shi muntu ne muntu ukabatyijibwa i mwivwanije senene ino myanda. Pakupwa kwa muneni kupityija kishinte kya lubatyijo ne milombelo, mwimaniji wa kubungakana ukaleta mu kīpi misoñanya kampanda ku bakabatyijibwa, kupwa ukembija lwimbo. Kupwa kwa lwimbo, batutu ba ku mwingilo wa kutundaila baya bakaludika bakabatyijibwa ku kifuko kya lubatyijo. Ino lubatyijo byoludi kilomboji kya kwipāna kwetu, nanshi i mwanda utala muntu ne muntu kasuku kandi, pabukata bwandi ne Yehova. O mwanda i kyakubulwa kwendelamo kubatyija bantu bavule abo bonso kya-pamo “mu kabumbo,” befumbakenye nansha bekwete ku makasa kitatyi kya kutokenibwa mu mema.
Kayukeno: Ukata mutyima wa kuvwala kayukeno ka mwaka 1996 ku kitango nansha ke mu dishinda kitatyi kyoenda nansha kyojoka ku kitango. Kino pavule kiletanga muswelo wa kupāna musapu mulumbuluke. Ukapota kano kayukeno ku kipwilo kyodi’mo, ke-pantu ku kitango ketukekalakopo. Kokikungila enka difuku ditangidila kitango mwanda wa kulomba tuno tuyukeno, kobe ne twa kisaka kyobe mhm. Kokilwa’ko kusela kakanda ka muñanga “Instructions médicales — Pas de sang.”
Mwingilo wa Kwisakila: Pano byo kekukidipo mwingilo wa kupoteja bidibwa, banabetu bavule bādi bengila mu uno mwingilo padi bakasaka kukengila mu mingilo mikwabo. Lelo ukokeja kwitudila’ko kitatyi umbula bwa kitango ukapāne bukwashi bobe mu mwingilo kampanda? Tukokeja kwīlombola bu bingidilwa bya kamweno ne kusokwela patōka nsangaji yetu na kwingidila banabetu, kikale umbula bwa nsā mivule nansha mityetye. Shi usaka kupāna bukwashi bobe, nankyo kefikije ku mwingilo wa kwisakila. Bana badi munshi mwa myaka 16 bakokeja kuvuija kipindi kyabo mu muswelo mulumbuluke na kwingila munshi mwa bwendeji bwa bashabo, bwa ba-inabo nansha mwa mutame mukwabo udi na kino kiselwa.
Kidyumu: Tudyumukei mwanda wa kutyina kufikilwa na makambakano. Boba batambile mu bibundi bingi, bekalanga pavule baponena mu makasa a bangivi ne a bantu bamanyengenyenge. Mufwaninwe kuta mutyima wa kushita nyeke na lufungulo pa munda, lwikale lwa motoka nansha lwa ku kinga. Kadi kemufwaninwepo kushiya mu motoka kintu kampanda kikokeja kukoka meso a bangivi. Bangivi ne batutyomona bakokwanga na bifuko bibungile’po bantu bavule. Kikekala kya kubulwa tunangu shi tukashiye kintu kampanda kyamvubu pa kityi kyetu. Kokilanga’mba bonso bakujokolokele i enka bakristu. Lelo i kika kyosaka kukatūdila bantu pa ditompo? Twatambwile malapolo alombola’mba kudi bantu bakubulwa kuyukanika bāsakile kukokela bana bankasampe panja. KEKIYAMPEPO KULEKELELA BENU BANA.
[Binenwa bya Kifwatulo pa paje 6]
[Box on page 6]
Kitango kya Distrike—Myanda Mikatampe mu Kīpi