“Kinenwa kya Leza kya Bupolofeto”—Kitango kya Distrike kya mu 1999
1 Mosesa wākankamikile bene Isalela kukwata bufundiji bwa Leza na mutyika kitatyi kyobādi kebalumba kutwela mu Ntanda ya Mulao. Wēbanene amba: “Kine kino’ki kekidipo kintu kya bitupu bitupu, mhm; ke-kintu kine kino’ki i bumi bobe.” (Kup. 32:45-47) Mwene netu tufwijanga’ko Yehova pa kumona kwamwene būmi bwetu na bulēme ku meso andi, ne kwituludika kwaetuludika nyeke na Kinenwa kyandi kya bulēme bukatampe mpata? O mwanda tutengele na kipyupyu Kitango kya Distrike “Kinenwa kya Leza kya Bupolofeto” kikalongwa mu mafuku asatu ne bintu byonso bituleele’ko Yehova.
2 Uno mwaka, i kuteakanibwe bitango mu bibundi 59 bya muno mu République démocratique du Congo Myanda ikapityijibwa mu Falanse, mu Kiluba, mu Lingala, mu Monokutuba, mu Otetela, mu Swahili, mu Tshiluba ne mu Uruund. Mu Kinshasa mukekala ne mpangiko ikapityijibwa mu ludimi lwa babitwi.
3 Tukulupile amba kodi kala mukwate mpangiko mwa kukataninwa difuku ne difuku ku kitango mwanda uyukile amba Yehova ye ukwityile’ko. Yuka’mba aye umonanga bukomo bulonga bengidi bandi ne kwielaela kobeelaela mwa kukataninwa ku bino bitango, bine ushalanga nyeke wibivuluka. (Bah. 6:10) Kutanwa kotutanwa ku kitango tamba ku lwimbo lubajinji kutūla ne ku milombelo ya mfulo, ko kulombola kotulombola Yehova amba tukwete na bulēme binenwa byandi byaetufundija. (Kup. 4:10) Kadi ko kufwija kotufwija’ko banabetu bavule baingile mwingilo mukomo wa kuteakanya kitango.
4 Kulongolola kwibunga kwa tununu ne tununu twa bengidi ba Leza ku kitango ne kitango kulombanga kwiteakanya kumeso kwa kitatyi ne bulongolodi bwabinebine. Byotwayuka’mba mpangiko ya kitango i milongololwe na buswe pa mwanda wetu, tukakunkwa ku mutyima kwingidila pamo mwanda wa “bintu byonsololo bilongibwe monka mo byendele biyampe ne mo bīkadile.” (1 Kod. 14:40) Misoñanya ilonda’ko ino i ya kwituvuluja mwanda wa tukafike ku kitango beteakanye senene mwa kudila bidibwa bya kumushipiditu ne kwikala mu kisense kiyampe kya bwine Kidishitu.
Kumeso kwa Kitango
5 Lelo bantu basepelela musapu ne bowifundanga nabo Bible basakilwanga bukwashi bwa kwilongolola mwa kukataninwa ku kitango? Kekubulwe padi byobakamona ne byobakevwana’ko bikebatonona kwikala batōtyi ba Yehova. (1 Kod. 14:25) Bakulumpe bafwaninwe kujingulula banabetu ba pa kipwilo basakilwa bukwashi bwa mwa kwendela ku kitango ne kwa kukafikila, nakampata boba ke banunu; bakulumpe bakatala mwa kwibapēla na buswe bonso byobabudilwe.—Ngat. 6:10.
6 Lelo kodi kala mupwe kuteakanya kwa kukafikila? Shi usakanga kukafikila kwa banabetu mu mafuku onso alongwa kitango, lelo kodi kala mulombe kyumba? Lelo wi mubadile’mo ne bana bokenda nabo, shi udi nabo? Mulembi wa pa kipwilo ufwaninwe bukidi bonka kutumina batutu bemanine kitango majina a banabetu basaka kwa kufikila betabijibwe na Komite wa Mingilo. I kipite buya kuyukija kumeso kwa kitatyi banabetu basaka kutambula beni mwanda wa beteakanye mwa kwibatambwila.—1 Kod. 14:40.
7 Mwingilo wa Bundapi Bubajinji i wa kukwasha’tu bya bukidibukidi, o mwanda tukusakila usele binini byobe bya mutwe, mabandaje a bilonda, bikama bya mwana, bwanga bwa kifu, ne bintu bikwabo bya uno muswelo byokekala nabyo mvubu ku kitango. Shi abe nansha mulongo obe ubela misongo mikomo, kifwa—luba lwa dityima, diabeta, nansha byanzakanwaanzakanwa ngitu—nabya wilamije malawa akukwashanga, pamo’nka bwa abe udi ku njibo nansha wendele konje. I biyampe muntu wa uno muswelo ekale na wa kumukunkuja, muntu wa mu kisaka nansha mulunda nandi wa pa mutyima uyukile ngikadilo yandi, wa kumukwasha shi bibakoleja.
8 Mu lwendo loenda ku kitango ne pa kujoka’ko, kukabulwepo kumona mikenga ya kupāna’mo bukamoni bwa kiponka na ponka. Ubulwe’po kusapula bubinebine ku bakwenu pampikwa kwikaka? Batwe bonso, ne bana bene, tukokeja kupa bantu botwisambakana nabo matrakte. Tukulupile amba ukamona ne byaba bimo bya kupāna mapepala, mikanda, ne mabuku makwabo ku bantu basepelela musapu. Witeakanye kupāna bukamoni bwa kiponka na ponka ku bantu kebabwanya kutengwa na musapu wetu mu byaba bikwabo. Tukokeja kumona mikenga mivule ya kupāna bukamoni shi tuvwele tuyukeno twetu pa kwenda ne pa kujoka ku kitango.
Mu Bula bwa Kitango
9 Bibelo bya ku kifuko kupwidilwa bikashitulwa difuku ne difuku na 8:00 ya lubanga. Bokokeja kulamina bifuko bya kushikata’po i enka ba mu kyenu kisaka nansha boba bomwiile nabo pamo kete. Banabetu banunu bakalaminwa byaba biyampe bya kushikata’po, boba badi na bulema kampanda ne boba benda na tukinga nabo bakekala na byaba byabo. Tufwaninwe kwikala biyampe, na kabango ku banabetu ba uno muswelo. Shi difuku dibapu, kotaluka, tadija biyampe kutyina’mba wakelwa kyakwilwa.
10 Lelo ukabatyijibwa ku kitango kīya’ko’ki? Banabetu bakabatyijibwa bakalaminwa byaba bivule mu dya Mposo lubanga. Banabetu batundaila bāya bakebatwala ku bifuko byabo. I kiyampe, shi bibwanika, ukashikate’ko kumeso kwa kushilula kipimpo kya lubanga. Paika Bible, dibuku dya ñimbo, kya kwipampula nakyo mema, ne mbwija mifwaninwe. Bipantalo bya satana bityibe ne mipila ya bilembwa, nansha bisandi bikwabo bya uno muswelo kebifwaninwepo kuvwalwa ku kinkumenkume kya uno muswelo. Bakulumpe bakabandaula bipangujo bya mu kabuku Bufundiji bwa Bible bwa Kyalwilo na boba bakabatyijibwa, bakatadija shi binebine i bevwanije ino myanda. Lubatyijo i kilomboji kya kwipāna kwipēne muntu bunka bwandi kudi Yehova Leza, nanshi ke biyampepo kubatyija bantu bekwete ku makasa umo na mukwabo.
11 Ukokeja kukengidija mafoto ne kamera ne kasete kakwata mawi, inoko ke biyampepo kukalakanya banabetu mu misebo, kujika banabetu batala, nansha kulabika bemvwaniki balonda mpangiko. Bino bingidilwa kebifwaninwepo kusomekwa ku nshinga ya mudilo nansha ya mawi ingidijibwa ku kitango.
12 Sosiete i munene umo ne umo apaike bidibwa byandi mwanda wa kupēleja mingilo ne kukūla kitatyi. Banabetu bavule balondele uno musoñanya, bamwene amba kyebapele kyaba kya kushikata pamo na kisaka pa kukōkolokwa kwa midi, ne kudya byobapaile. Bavule banenanga amba i bamone biyampe mwa kukōkolokelwa ne kitatyi kilampe kya kushikata na batutu ne bakaka. Pa kino, bapotanga bidibwa ne bitomibwa kumeso kwa kitatyi, bebitūla mu kakyano ka mashika kabwana munshi mwa kityi kyabo. Tulomba bonso bakatanwa ku kitango balongele monka. Mafuku a munyuma, bakulumpe batala biwanza ne batupita ba maleshitola adi mu mobo a ku biwanza bamwene banabetu bamobamo bataluka bakapota bidibwa panja pa lupango lwa biwanza. Bamo badi basaka bebape lupusa lwa kutūla bitala byabo mwanda wa kupoteja bintu ku bantu baile ku kitango. Shi lupusa lwebapelwe, longa bantu bavule ba panja badi bakwisoba motudi mu dyuba dyonso. Kadi twadi ba kumona milongo milampe ya bantu belaija byakudya, kino kyadi kya kuvutakanya buya bwa bitango byetu. O mwanda tulomba muntu ne muntu apaye bidibwa ne bitomibwa byandi difuku ne difuku. Ne bantu basepelela musapu boiya nabo bafwaninwe kulongela monka. Bintu biladika ne bitomibwa bikolwañana kebifwaninwepo kuselelwa kulongelwa kitango.
13 Ubulwe’po kwitonga kukakwasha difuku ne difuku ku mingilo ya kukundula papwidilwa ku mfulo kwa bipimpo? Nansha kukwasha ku mingilo kampanda ya ku kitango? Shi udi na uno mutyima, wilembeje ku bilo bya mwingilo wa kwisakila. Bana ba myaka idi munshi mwa 16 nabo betwa bāye bengile pamo na bambutwile babo nansha na mwanetu mukwabo mutame. Ino batwe bonso tukokeja kutōkeja kifuko kyotulongela’po kitango shi tuboya busala ne bintu bikwabo ne kwibyela mu kyala.
14 Ketudi kala bapebwe madingi atala pa muvwadilo, mutendelo ne mwibandilo wa nywene ufwaninwe kwikala nao ku kitango, kifwa madingi alombwelwe mu māni a ntentekelo a Mwingilo Wetu wa Bulopwe; twiatananga ne mu bifwatulo ne mafoto adi mu mabuku etu, kupityidila adi mu myanda inenwe na Yehova mu Bible. (Loma 12:2; 1 Tem. 2:9, 10) Bantu betuyukile kadi bayukile buluji botubungakena mu kyabo kibundi. O mwanda muvwadilo wetu ne mutendelo ne mubandilo wetu i bukamoni bukatampe botupāna. Bengidi bavule ba Yehova baletanga kifwa kilumbuluke mu ino myanda. Ino dimodimo tumonanga mushipiditu wa bwine ntanda umweka mu muvwadilo ne mutendelo ne mubandilo wa banabetu bamobamo batanwa ku bitango. Muntu uvwele bya bulembakane ufutulwijanga binenwa byandi nansha shi witela bu muntu mukomo kumushipiditu namani. Bivwala bifwaninwe, bya dyangi, bibwane senene kebyo kuneñena. O mwanda mitwe ya bisaka ifwaninwe kutala bisandi bisaka kuvwala bantu ba mu bisaka byabo. I biyampe kulonga namino nansha shi tudi panja pa kifuko kilongelwa’po kitango. Shi tuvwala tuyukeno kumeso ne kupwa kwa bipimpo, tukeyukanya bu batōka ba bene ba Yehova.—Tala Mako 8:38.
15 Solomone, mulopwe wa tunangu wāpelwe bukomo bwa mushipiditu wānena’mba “bulembakane i bukutwe umutyima wa mwana” ne amba “mwana mulekelelwe bitupu ufwija inandi bumvu.” (Nk. 22:15; 29:15) Mu bula bwa kupwila, kudi Batumoni banuke bampikwa kutalwa badi bakambakanya banabetu balonga buninge bwa kulonda bufundiji. Ku bitango bya ku mwaka wapityile, kwamwenwe bankasampe badi bashikete pa mobo a pangala bakīsa bantu mikejima mibi. Kitōkeji kya ino mikejima i kikatampe mpata, kikokeja kona meso a bokyashile, nansha shi badi kulampe namani. Kunena na bubine, bano bankasampe kebamweninepo mu bufundiji bwa kumushipiditu bobadi bebateakeninye. Ku meso a Yehova, bambutwile bo benē kiselwa kya kolola mwiendelejo wa babo bana. O mwanda shabana nansha inabana ubwanya kujingulula shi bandi bana bevwananga bufundiji bwa Yehova ne kwibulonda enka shi ushikete nabo pamo. Banabetu batundaila bāya bakafikila muntu ye-yense ukambakanya bemvwaniki mwanda wa kumulomba aleke ngikadilo yandi, ne kumunena na buswe bonso alonde mpangiko.
16 Ku bitango byetu tutambulanga’ko ne bantu ba panja; nanshi i kipite buya kuta mutyima ku bana ne ku bintu byetu. Betu bana i kyabuntu kilēme kitupele Yehova; ino tuyukile amba ino ntanda idi na mushipiditu wa bwivi, wa Satana. O mwanda kikulomba kutala kitatyi kyonso padi bobe bana. Wilamije nyeke mafoto, mapotomoni obe, ne tubituntwa tukwabo, kokolwa kwibishiya poshikete. Ta mutyima ku kushita milango ya motoka obe na lufungulo, kadi shityila bintu byobe mu kobé wa motoka nansha kwenda nabyo poshikete. Kino kikatyepeja matompo a bantu bakokeja kulala makalashi ne kutwela mu obe motoka.
17 Kekyo kuleta bukankamane pa kumona batutu ne bakaka basoneka myanda palongwa kitango. Kulemba myanda mīpi kukakukwasha ute mutyima ku binenwa ne kulama mu ñeni milangwe mikatampe. Shi ukapituluke na kisaka nansha na balunda nobe bintu byowadi ulemba, nankyo ukamona muswelo wa kulanguluka pa myanda mikatampe yanenwe ku kitango, bine kukelwa’yopo.
18 Batōtyi ba Yehova bekalanga nyeke na buntu bwa kukwatakanya tumweno twa kiteokratike na bintu byabo bya kungitu. (Div. 36:5-7; 2 Bil. 31:10; Loma 15:26, 27) Byabuntu byenu byomupāna na mutyima tō bikakwasha kwaluja lupeto lwafutyīlwe bifuko biyampe bya kulongela’po bitango.
19 Kukwatañana na Amose 3:7, Yehova i munene amba “kakalongapo nansha kamo kene, [pampikwa k]usokwela kifibwe kyandi bengidi bandi, ke bapolofeto kadi.” Yehova i ‘Musokodi wa bifibwe,’ o mwanda wāsonekeje mu Bible bupolofeto buvulevule bwikele kufikidila kwitupa mpika, abo bonso bukunkane. (Dan. 2:28, 47) Ino kukidi milao mikwabo isa kufikidila. Kino kitango kya Distrike kya mu mwaka 1999, “Kinenwa kya Leza kya Bupolofeto,” kikakankamika lwitabijo lwetu mu milao ya Leza. Twendei tukateje na katentekeji kinenwa kituteakeninye Yehova. Twingidijei byonso byotusa kumona ne kwivwana—mu mwingilo wa busapudi, mu kipwilo, ne mu būmi bwetu. Tulomba Yehova esele byonso byomulonga mwa kukataninwa ku masobo makatampe a kumushipiditu akasobwa mu mafuku asatu.
[Binenwa bya Kifwatulo pa paje 3]
[Binenwa bya Kifwatulo pa paje 3]
Witeakanye ukatanwe’ko mafuku onso: dya Butano, dya Mposo, ne dya Yenga.