Bitango Byetu bya Distrike—Bukamoni Bukatampe bwa Bubinebine
1. Le masobo a pa mwaka pa mwaka ādi apanga Bene Isalela mukenga wa kuyukanya ne kwisambila pa bubinebine’ka bwa mvubu bwa ku mushipiditu?
1 Bene Isalela wa kala bādi bebunga misunsa isatu ku mwaka mwanda wa kusoba masobo. Nansha byobyādi bilomba enka bana-balume bakatanwe’ko, ino divule dino i bisaka bituntulu byādi byenda ku Yelusalema kukatanwa ku bino bitango. (Kup. 16:15, 16) Bino binkumenkume byādi bileta mukenga wa kulanguluka ne kwisambila pa bubinebine bwa mvubu bwa ku mushipiditu. Le abo bwine i bubinebine’ka? Bumo bidi i bwa amba, Yehova i wa buntu, kadi Mupāni wa buswe. (Kup. 15:4, 5) bubinebine bukwabo i bwa amba i kudi aye kotukakimba bwendeji ne bulami. (Kup. 32:9, 10) Bene Isalela bādi bakokeja kulangulukila ne pa bubine bwa amba byobaselele dijina dya Yehova bafwaninwe nanshi kumwekeja boloke bwandi mu būmi bwabo. (Kup. 7:6, 11) Dyalelo nadyo tumwenanga mu bitango bya distrike bya pa mwaka pa mwaka.
2. Mpangiko ya kitango kya distrike i kamunika mwinya wa bubinebine namani?
2 Mpangiko Ileta Kitōkeji pa Bubinebine: Ku bitango byetu bya distrike kwikalanga mashikulu, madrame bya kumwena’ko, ne bwipangudi bitukwasha twivwanije ne kwingidija a bubinebine bwa mu Bible. (Yoa. 17:17) Kitango kikalongwa kumeso’ku ke kishilule kala kuteakanibwa. Bulongolodi bwa Yehova pano bulongololanga mpangiko miteakanibwe mwanda wa kuvuija bisakibwa bya panopano mu mwaba kujokoloka ntanda yonso. (Mat. 24:45-47) Lelo udi na kipyupyu kya kwimwena ne kwivwana byobya bikapityijibwa’ko?
3. I bika byotukalonga pa kumwena mu mpangiko?
3 Na bubine tukamwena mu ino mpangiko shi tukatanwe’ko ne kulonda’yo na katentekeji mu mafuku onso asatu. Shi kwekilongele, kino kyo kitatyi kya kwisamba na mukulu obe wa kaji ne kumulomba konje. Mu mafuku onso asatu ufwaninwe kulala senene bufuku mwanda wikale ulonda mpangiko na katentekeji. Bavule bayukile amba kutala muneni ne kulemba myanda mīpi kwibakwashanga balonde mpangiko na katentekeji. Kokaleka telefone ne bikolo bikwabo bikulabike abe’wa nansha bakwabo. Leka lunwa, kutuma misapu, nansha kudya kitatyi kipityijibwa mpangiko.
4. Le bambutwile babwanya kukwasha babo bana namani bamwene ne pa mfulo ku kitango?
4 Mu myaka ya Sabado, kitatyi kyādi kibunga bisaka bya Bene Isalela kwivwana butangi bwa Mukanda wa Bijila bwādi butangwa ku masobo a bitanda, bādi basela ne “twana’twa” amba abo bonso “bevwane, kadi amba balombolwe.” (Kup. 31:12) Bine kino kikankamika mpata pa kumona bisaka bishikatyile pamo ne bankasampe kasha bateja na katentekeji ku bitango! Ku kyolwa ne kyolwa kupwa kitango mubulwe’po kubandawila pamo byomulembele ku kitango nakampata byobya byemusangeje? “Bulembakane i bukutwe umutyima wa mwana,” nanshi i biyampe bambutwile batale babo bana batyetye ne bankasampe bene pa bidibwa bya midi pa kyaba kya kwibaleka bwa mwana “mulekelelwe bitupu.”—Nk. 22:15; 29:15.
5. Lelo mwiendelejo wetu muyampe unengejanga bubinebine namani?
5 Mwikadilo Wetu Muyampe Unengejanga Bubinebine: Mwikadilo wetu muyampe mu kibundi mulongelwa kitango unengejanga bubinebine. (Tet. 2:10) Bampulushi ne bengidi bakwabo ba Leta bekalanga bamona shi beni balonda misoñanya ya Bwine Kidishitu ne kulombola kitūkijetyima ne buntu ku bonso. (Kol. 4:6) Mwaka wapityile, mukulu umo wa makayo ne kwipwija mukose wa mu kibundi mwalongelwe kitango walembele ku Komite amba: “Nemulembela mwanda wa kwimufwija’ko pa bulēme ne butōki bonamona mu bantu benu ku kino kitango.”
6. Tukokeja kunengeja bubinebine mu muvwadilo wetu potudi ku kitango namani?
6 Tuyukeno twetu totuvwala ku kitango tusapulanga kitango, tukwashanga bana betu beni bayuke potudi, kadi tupānanga bukamoni ku boba betubandila. Bantu badi mu kibundi mulongelwa kitango bakamona amba boba bavwele tuyukeno twa kitango i bavwale biyampe, pa mvwadilo ne na bumvubumvu, ke bisalakanesalakanepo nansha bilangula masenda na mobikadile mu ino ntanda. (1 Tem. 2:9, 10) Shi ke pano, nanshi tufwaninwe kuta mutyima ku muvwadilo ne mwidyangwilo wetu mu kibundi motulongela kitango. Kuvwala kaputula nansha mipila mīpi kekulombolapo bulēmantu. Nansha shi kitango kikalongelwa panja mu kiwanza tufwaninwe kuvwala bya bulēmantu. Shi ke tushinta bivwalwa pa kupwa mpangiko ne kwenda kukadya, tuvulukei amba kine kyo twiidile i kitango ne ketufwaninwepo kuvwala misābi.
7. I muswelo’ka otukaloelelwa bumo bwetu bwa Bwine Kidishitu potudi ku kitango?
7 Ku masobo a ku mwaka Bene Isalela bādi batamija kipwano kyabo na batōtyi nabo batamba mu bibundi bikwabo ne kino kyalengeje bekute umbumo. (Bil. 2:1, 5) Potulonga kitango kya distrike, bu bana na bana bwetu bwa Bwine Kidishitu bumwekanga patōkelela. Uno mwikadilo usangaja wa paladisa yetu ya ku mushipiditu utulumunanga bantu. (Mit. 133:1) Pa kyaba kya kushiya kifuko potushikete pa midi ne kukapota byakudya, mwene i biyampe kusela bidibwa bipēla ne kukwatakanya mikenga ya kwitana ne kwisamba na batutu ne bakaka, bashikete kubwipi netu!
8. I kamweno’ka kadi mu kwingidila mwingilo wa kwituma mungya ngikadilo yetu?
8 Bantu betubandila batulumukanga bulongolodi ne ndudi idi ku bitango, nakampata pobajingulula’mba mingilo yonso ingilwanga na bantu ba kwituma abo bene. Le nobe usaka kwikala mu “bēpana abo bene ku mityima tō” mu mingilo ya ku kitango? (Mit. 110:3) Muswelo umo wa kufundija bana bayuke kukwasha bakwabo i na kwingila pamo na kisaka kyonso ku mingilo ya kwituma. Shi udi na moyo, kwingila ku bitango i muswelo muyampe ukakukwasha uyuke kwisamba na beni. Kaka umo wanene’mba: “Kyadipo neiyukile na bantu bavule poso’nka na kisaka ne na balunda batyetye kete. Ino po nakweshe ku bukundwe, napwene na batutu ne bakaka bavule. Nasangele mpata!” Kwivudijija balunda na kutanwa ku kitango kuketuletela nsangaji mivule. (2 Kod. 6:12, 13) Shi kwaingile mu mwingilo wa kwituma ipangula bakulumpe bya kulonga pa kwingila’o.
9. I muswelo’ka otuketa bakwabo bāye kutanwa ku kitango?
9 Ita Bakwabo Bemvwane Bubinebine: Monka mobyaikadile mu myaka yapityile’i, tukalonga kampanye ka kwita bantu ku kitango mayenga asatu kumeso. Bipwilo bikalonga bukomo bonso bwa kusambakanya myaba yabyo na kwabanya tukanda twa lwito. (Tala kapango “I Muswelo’ka Otuketa Bantu?”) Tukanda tonso tukashala’po, tufwaninwe kuletwa ku kitango. Tukengidijibwa na bāya ku kitango amba basapule nato busapudi bwa kiponka na ponka pobadi mu kibundi kyobalongela’mo kitango.
10. Sekununa myanda mimweke ilombola amba kampanye ka kwita bantu kalupulanga bipa.
10 Le bantu betabanga ku kano kampanye ka pa mwaka pa mwaka? Ku kitango kimo, kwadi muntu wapele ba mulume ne mukaji pa kushikata. Bamusapwila amba batambwile kakanda ka lwito ne amba “kadi kamweka biyampe.” Ko kutamba na motoka ku bula bwa makilometele 320, mwanda wa kukatanwa’ko! Kukwabo nako, kaka umo wapēbe tukanda twa lwito ku njibo ne njibo, ko kupa mwana-mulume umo kakanda ka lwito wadi ukimba kuyuka pa bitala kitango. Penepo kaka wesamba nandi myanda idi pa kakanda ka lwito. Mafuku matyetye pa kupita’po, wamona uno mwana-mulume pamo ne mulunda nandi ku kitango, kadi bakwete muntu ne muntu kitabo kipya kyalupukile’ko!
11. Mwanda waka kutanwa mwaka ne mwaka ku bitango bya distrike kudi na mvubu?
11 Masobo a pa mwaka yādi mpangiko ya buswe yātūdile’ko Yehova mwanda wa kukwasha Bene Isalela bekale “kumwingidila aye mu boloke ne binebinepo.” (Yos. 24:14) Ne kutanwa kotutanwa mwaka ne mwaka ku bitango bya distrike, kwitukwashanga ‘tunangile mu bubinebine’ ne kino i kipindi kya mvubu mu butōtyi bwetu. (3 Yoa. 3) Tulomba Yehova esele bonso basenswe bubinebine mu bukomo bobalonga bwa kutanwa ne kumwena ne pa mfulo mu ino mpangiko!
[Bushintuludi pa paje 4]
Mwikadilo wetu muyampe mu kibundi mulongelwa kitango unengejanga bubinebine
[Bushintuludi pa paje 5]
Mayenga asatu kumeso kwa kushilula kitango kyetu, tukalonga kampanye ka kwita bantu batanwe’ko
[Kapango pa paje 3-6]
Bivulujo Bitala Kitango Kya Distrike 2012
◼ Bitatyi bya Kupwila: Mpangiko ikashilula na 8:20 lubanga mafuku onso asatu. Inoko, bitango bikalongelwa mu bibundi bikatampe bilonda’ko: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ne Tshikapa, mpangiko ikashilula mafuku onso na 9:20 lubanga. Bibelo bikashitulwa na 7:00 nansha na 8:00 lubanga, mungya kifuko. Kitatyi kyobanena amba ke kushilula minjiki ya ñanjilo, batwe bonso tufwaninwe kushikata mwa kushilwila mpangiko yetu mu muswelo upeja Leza bulēme. Mpangiko ikafula na 3:55 mu Dya Butano ne Dya Mposo kyolwa, ino mu Dya Yenga ikafula na 2:40 kyolwa. Ebiya mu bibundi bitelelwe kungala’bi, mpangiko ikafula na 4:55 ne 3:40 kyolwa.
◼ Kukwatyila Byaba: Byaba pa kushikata bikakwatyilwa enka boba botwiile nabo pamo mu motoka umo, botushikatanga nabo njibo imo, nansha botwifundanga nabo Bible.—1 Kod. 13:5.
◼ Bidibwa bya pa Midi: Tubemupe mulangwe wa kusela byakudya bipēla inoko abyo bileta bumeni, kimfwa: mikate (tumpompo nansha myende umbula), bipa (makonde), nyumu, nansha bitumbula. Bya kutoma, kimfwa mema, kawa (kafé) nansha tyai bifwaninwe kuselwa mu bintu kebibwanyapo kuladika mwanda wa kwepuka maakishida. Ke biyampepo kusela malwa ku kitango. Shi tusela bidibwa ne bitomibwa byetu, kino kikafundula mutyima wa kukapota’byo ku boba bāyanga kupoteja bidibwa. Kwepuka bantu ba uno muswelo ba panja kukakwasha pa kupāna bukamoni butala bukundwe bwetu. (Tai mutyima: Bantu bāya kupoteja byakudya kebafwaninwepo kulekwa batwela mu kifuko kya kitango nansha dimo.—Yoa. 2:13-17.)
◼ Bukundwe: Pavule pene kimwekanga amba, boba bapota bidibwa ku bapoteja kebo kwela mapapye panshi. Mfulo mfulō kifuko kyayula mapapye, tumapalashitike, bijiko bya matyupa, ne bikwabokwabo. Shi muntu usaka kupota bidibwa ku boba bapoteja pa tumameza (kimfwa: mabombo, bitumbula, tumpompo, byaleo nansha shi kika shi kika), ufwaninwe kutadija amba kyadi kivungilwe’mo bidibwa kyelwe ku kyala, ke panshipo, mhm. Shi tubamone muntu uponeje papye nansha kabudimbo panshi, tuboyei ne kwela’byo mu kintu kya busala kitūdilwe’ko. Banabetu, tulongei buninge bwa kulama kifuko kilongelwa’po kitango kikale kitōka. Butōki i mwanda unenwe kuta’ko bonso mutyima. Shi umo ne umo avuije’mo kyandi kipindi, nabya kifuko kilongelwa’po kitango kikashala kitōka ku mfulo kwa difuku ne difuku. Kyotusaka i kwiula ngikadilo ya Leza otutōta, mwanda aye i ujila.—1 Pet. 1:15, 16; Div. 19:10; Kup. 23:14.
◼ Byabuntu: Tulombolanga kufwija’ko na kutūla byabuntu byetu bya na mutyima tō mwa kukwashisha mwingilo wingilwa ntanda yonso na kutūla’byo ku Njibo ya Bulopwe nansha ku kitango. Boba batūla byabuntu na sheke wa ku banki bakandika pa masheke dijina dya “Association ‘Les Témoins de Jéhovah.’”
◼ Maakishida ne Bundapi bwa Bukidibukidi: Shi kubatambe mwanda ulomba kundapwa bukidibukidi ku kifuko kilongelwa kitango, itai bukidibukidi tutu utundaila bāya udi nenu pabwipi, aye nandi akafikije mwanda ku Bundapi Bubajinji amba tutu upotolwele’byo āye atale bukatampe bwa mwanda’wa ne kumona kya kulonga.
◼ Lawa Yobe: Shi udi na bwanga bukulembelwe, nankyo i biyampe wilamije’bo ku kitango, mwanda padi kebukekala’kopo. Maselenge ne nshinge ya bantu babela diabete bifwaninwe kulamwa senene kwampikwa kwelaela’byo ku kitango.
◼ Kukwata Mafoto: Shi usaka kukwata mafoto kitatyi kipityijibwa kipimpo, nabya kokengidija mudilo wa foto. Koketa bansunga ba mafoto ku kitango. Shi ubamumone wāiya’ko, koketabija akukwate.—Yoa. 2:13-17.
◼ Mafomu Personne qui demande à être visitée (S-43): Akengidijibwa mwanda wa kuyukija shi kudi muntu walombwele kusepelela musapu padi pasapulwa bya kiponka na ponka ku kitango. Wilamije’ko fomu imo nansha abidi. Pa kupwa kwiayuja biyampe, ubwanya kukatūla’o ku Mwingilo wa Mabuku nansha kudi mulembi wa pa kipwilo kyenu pomujokela kwenu.—Tala Mwingilo Wetu wa Bulopwe wa Kweji 5, 2011 pa paje 3.
◼ Leshitola: Lēmeka dijina dya Yehova na mwiendelejo obe muyampe podi ku leshitola. Wibashile kakanda, shi biloñwanga kwenu.
◼ Bifikilo: (1) Kemwakishikatai bavule mu kyumba nansha mu njibo momufikīle na bantu bakwabo bavule kutabuka pa buvule bwitabije nansha busaka mufikilwa. (2) Shi ubapele kukafikila mu kyumba kyowadi ulombele, nabya yukija bukidibukidi. (3) Kumeso kwa kuteka, ipangula bidi mufikilwa nansha batutu badi na kiselwa ku Njibo ya Bulopwe komufikīle i bika bifwaninwe kutebwa’ko mutyima. (4) Kokyonakanya kintu nansha kimo ku byonso bitūdīlwe beni. Ngikadilo yetu i ino: Kwikala na mwikadilo mwendele’mo kadi wa bulēmantu. (5) Bukundwe i mwanabo na bwine Leza. Lama kifuko kyofikīle’po kilongololwe senene, patōka kadi pakombe. Kino kitala ne Njibo ya Bulopwe ikokeja kwingidijibwa bu kifikilo kya banabetu batamba ku bipwilo bya kulampe. (6) Lombola kipa kya mushipiditu mu kipwano kyobe na bakwenu, na mufikilwa nansha ke na banabetu Bene Kidishitu bomufikile nabo pa kifuko kimo.—Ngat. 5:22, 23.
◼ Mwingilo wa Kwituma: Yense usaka kwingila mingilo ukalomba ku Mwingilo wa Kwituma ku kitango. Bana ba munshi mwa myaka 16, bakokeja kulunga’ko kuboko na kwingila munshi mwa buludiki bwa bambutwile babo nansha balami, nansha batame bakwabo betabijibwe na bambutwile nansha na balami.
[Kapango pa paje 6]
I Muswelo’ka Otuketa Bantu?
Pa kusaka tusambakanye mwaba wetu, padi bitusakila kunena bīpi. Kimfwa: “Tubaimuna. Tudi mu mwingilo ulongwa ntanda yonso wa kwita bantu na tuno tukanda. Kobe nako aka keko. Myanda mivule i idi mu kano kakanda.” Ikala na buzanzamuke. Kitatyi kyomwita bantu Dya Mposo ne Dya Yenga, mukokeja ne kupāna mapepala a mu mwine kweji’wa.