Mafuku Asatu a Kutūkijibwa Mutyima ku Mushipiditu

1. I bika byotutengele kutambula ku kitango kya distrike kya uno mwaka?

¹ Mu ino ntanda ya Satana myumu tēe ku mushipiditu, Yehova wendelelanga na kutūkija bengidi bandi mutyima. (Is. 58:11) Mpangiko imo bidi ingidijanga Yehova mwanda wa kwitukomeja i kitango kya distrike kya mwaka ne mwaka. Kitango kya uno mwaka byokyafwena pabwipi, i muswelo’ka otukelongolola mwanda wa tukatūkijibwe mutyima ku mushipiditu ne kutūkija’o bakwabo?—Nk. 21:5.

2. I mu myanda’ka motufwaninwe kala kwiteakanya?

² Alwila’ko kujadika mpangiko ya mingilo yobe ya ku ngitu mwa kukataninwa mafuku onso asatu a kitango, kokilaija nzovu wimene kolamba bulembe. Le kodi mupikule kitatyi kyokalonga pa kufika ku kifuko kilongelwa kitango mwa kufikila ne kushikata kumeso kwa mpangiko kushilula? Bine, ketusakepo nansha dimo kubulwa bidibwa bya kwitukankamika ku mushipiditu bituteakeninye Yehova! (Is. 65:13, 14) Le kodi mupwe kala kuteakanya myanda ya kufutyila lwendo ne kwa kufikila?

3. I madingi’ka akokeja kukwasha kisaka kyetu kimwene ne pa mfulo mu mpangiko?

³ I bika biketukwasha tuleke kulumbakanya ñeni kitatyi kipita mpangiko? Shi bibwanika, witūkije bya binebine bufuku mafuku alongwa kitango. Bambila meso obe padi muneni. Tala kisonekwa kyonso mu Bible obe. Lemba myanda mu kīpi. Bisaka bikalonga biyampe shi bishikatyila pamo mwanda wa bambutwile bakwashe babo bana bate mutyima kudi muneni. (Nk. 29:15) Padi mukokeja kwisambila mu kisaka pa myanda mikatampe ya mu mpangiko kyolwa ne kyolwa. Pa kusaka amba kisaka kyenu kyendelele kutūkijibwa mutyima nansha ke pa kupwa kwa kitango, i biyampe mwilamije’ko kitatyi kya kwisambila mu Butōtyi bwa Kisaka bwa kyolwa pa myanda palapala ikokeja kwingidija kisaka kyenu.

4. I muswelo’ka otukakwasha bakwabo mu kyetu kipwilo amba batūkijibwe mutyima ku mushipiditu?

⁴ Kwasha Bakwabo Batūkijibwe mutyima: Tusaka bakwabo nabo batūkijibwe mutyima ku mushipiditu. Le mudi na basapudi banunu mu kipwilo nansha boba basakilwa kukwashibwa mwa kutaninwa’bo ku kitango? Le nobe ubwanya kwibakwasha? (1 Yoa. 3:17, 18) Bakulumpe, nakampata batadi ba bisumpi, bafwaninwe kutala shi bano basapudi abakwashibwa mobifwaninwe.

5. I muswelo’ka otukabanya tukanda twa lwito twa ku kitango? (Tala ne kapango kūlu.)

⁵ Enka motulongelanga, tukalonga kampanye ka kwita bantu baye batanwe ku kitango, mayenga asatu kumeso. Bipwilo bifwaninwe kwitungila kitungo kya kwabanya kitutulu kyabo kya tukanda twa lwito ne kusambanya mwaba wabo shi bikokejika. Tukanda twa lwito tukashala na kisaka kyenu pa kupwa kwa kampanye, tufwaninwe kuselelwa ku kitango, ne kwitwingidija na kupa boba botusapwila bya kiponka na ponka. Bulombodi bukwabo bukemupebwa papityijibwa mpangiko Dya Butano. Tukanda twa lwito tomumona amba kisaka kyenu kekikengidija’topo pomudi mu kibundi kilongelwa’mo kitango, tukapebwa batutu batundaila baya shi ke mutwela mu kipaka. Wilamije’ko kakanda ka lwito kamo, shi usaka kunyemana’ko kitatyi kikalongwa dishikulu dya mfulo dya Dya Yenga.

6. I mu miswelo’ka motubwanya kulombola mwikadilo muyampe ku kitango?

⁶ Mwikadilo Muyampe Utūkijanga Mutyima: Kino kitatyi kidi bantu bavule ‘besenswe abo bene’ ne kubulwa kuta mutyima ku malango a bakwabo, bine i kintu kitūkija mutyima pa kwikala na banabetu Bene Kidishitu balonga bukomo bwa kulombola mwikadilo muyampe! (2 Tem. 3:2) Tulombolanga mwikadilo muyampe na kutwela talala ne mu ndudi mu kipaka shi kibashitulwa, ne kukwatyila byaba enka boba botushikatanga nabo njibo imo, nansha botwiile nabo mu motoka umo, nansha botwifundanga nabo Bible. Tukalonda bulombodi bwa mwimaniji shi wetunena tushikate ne kulonda minjiki ya kushilula nayo kipimpo. Tukalombola mwikadilo muyampe kitatyi kyotubula telefone ya ku makasa nansha kikolo kutyina twakapuakanya bakwabo kitatyi kipityijibwa mpangiko. Kadi tukalombola mwikadilo muyampe na kuleka kwisamba, kutuma misapu ku telefone, kudya nansha kujokoloka mu bipito mwanda ke mwanda kitatyi kipityijibwa mpangiko.

7. I muswelo’ka otukatūkijibwa mutyima ne kutūkija’o bakwabo potudi mu kisense pamo na banabetu?

⁷ Kisense Kikankamika: Bitango bitupanga mikenga mivule ya kusangela bumo bwa Bwine Kidishitu ne bu bana na bana butūkija mutyima. (Mit. 133:1-3) Le wabulwa’po kukwata mulangwe wa “ku baijibwa” ne kwitana pamo na batutu ne bakaka baile ku kitango batambile ku bipwilo bikwabo? (2 Kod. 6:13) Ukokeja kwitungila kitungo kya kwiyuka nansha’tu na muntu umo nansha kisaka kimo difuku ne difuku. Kukōkolokwa kwa pa midi kwitupanga mukenga muyampe wa kulonga kino. Nanshi selai byakudya bipēla bya pa midi ne kudya’byo pamo na banabetu ku kipaka pa kyaba kya kwenda kukapota byakudya nansha kukadya ku leshitola ya pabwipi. Pa kino tukamona dyese dya kwikala na balunda bapya ne ba nyeke.

8. Mwanda waka tufwaninwe kwingila mu mwingilo wa kwituma ku kitango, ne tukalonga kino namani?

⁸ Bine, kitūkijanga’po mityima kashā kwingila pamo na batōtyi netu baswe mu mingilo ikola! Le wabulwa’po kwituma mwanda wa kukwasha mu mwingilo kampanda nansha kukwasha kyenu kipwilo na kukundula kipindi kyo kipelwe? (Mit. 110:3) Shi kwapatyile mwingilo, nabya enda ku Mwingilo wa Batundaila Baya ku kitango. Kwingila kakasa kakasa kuletanga nsangaji.

9. Mwanda waka tufwaninwe kuta mutyima ku mwiendelejo ne mumwekelo wetu ku kitango?

⁹ Mwiendelejo Wetu Uteñanga Boba Betutala: Twi bantunguluji ba kitango mu mafuku onso asatu, ke enkapo kitatyi kipityijibwa mpangiko. Boba betutala kitatyi kyotudi mu kibundi kilongelwa’mo kitango bafwaninwe kutengwa pa kumona motwishidile na boba ke Batumoni po. (1 Pet. 2:12) Muvwadilo ne mwidyangwilo wetu ku kitango, kotufikile ne ku maleshitola ufwaninwe kupeja Yehova bulēme. (1 Tem. 2:9, 10) Shi tuvwale tuyukeno twetu twa kitango, boba betutala bakajingulula amba twi Batumoni ba Yehova. Kino padi kiketupa mukenga wa kwibalombola myanda ya ku kitango ne kwibasapwila bukamoni bukwabo.

10. Le i myanda’ka mimweke ilombola amba mwiendelejo wetu wa Bwine Kidishitu uletanga bukamoni buyampe?

¹⁰ Le mwiendelejo wetu muyampe ukatulumuna namani bakwabo potudi ku kitango? Mungya kishinte kimo kya mu julunale, mwana-mulume umo mwine lupango lwalongelwe’po kitango wanene amba: “Badi na bulēmantu bukatampe. Tudi na nsangaji ya kwibatundaila mwaka ne mwaka.” Ku mwaka, muntu umo ke Kamoni po wajimije kasakoshi kandi ku njibo ya kifikilo yadi’mo ne beni baile ku kitango. Kitatyi kyobajokeje kasakoshi kudi mwine njibo ya kifikilo ne byonso byadi’mo bibwane, mwine njibo ya kifikilo walombwele mwine kasakoshi amba: “Udi na dyese mwanda Batumoni ba Yehova balongele kitango kubwipi ne kuno, ne mu njibo ya kifikilo mwadi muyule bonka abo. Shi bitupu kasakoshi kobe kekadipo ka kumweka.”

11. Pano penda pafwena kitango, le i kitungo’ka kyotufwaninwe kwitungila, ne mwanda waka?

¹¹ Bitango bya uno mwaka bibafwena pabwipi. Tujimijanga kitatyi ne bukomo buvule mwanda wa mpangiko ne kifuko kilongelwa kitango bikale bitūkija mityima. Witungile kitungo kya kutanwa’ko mafuku onso asatu, kadi ikala mwilongolole mwanda wa ukamwene mu byobya bikuteakeninye Yehova ne bulongolodi bwandi. Sumininwa kutūkija bakwabo mutyima kupityila ku mwikadilo obe muyampe, kisense kisangaja, ne mwiendelejo muyampe. Mu uno muswelo abewa ne bakwabo mukeivwana na mweivwaninwe muntu umo watenwe ku kitango kya ku mwaka wasonekele amba, “Bine, nkikibwanyapo kuvuluka myanda yonso isangaja yonemwenine’ko!”

[Bushintuludi pa paje 4]

Enka motulongelanga, tukalonga kampanye ka kwita bantu baye batanwe ku kitango, mayenga asatu kumeso

[Bushintuludi pa paje 6]

Muvwadilo ne mwidyangwilo wetu ku kitango, kotufikile ne ku maleshitola ufwaninwe kupeja Yehova bulēme

[Bushintuludi pa paje 7]

Sumininwa kutūkija bakwabo mutyima kupityila ku mwikadilo obe muyampe, kisense kisangaja, ne mwiendelejo muyampe

[Kapango pa paje 4]

Bivulujo Bitala Kitango kya Distrike 2011

◼ Bitatyi bya Kupwila: Mpangiko ikashilula na 8:20 lubanga mafuku onso asatu. Inoko, bitango bikalongelwa mu bibundi bikatampe bilonda’ko: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ne Tshikapa, mpangiko ikashilula mafuku onso na 9:20 lubanga. Bibelo bikashitulwa na 7:00 lubanga nansha 8:00 lubanga. Kitatyi kyobanena amba ke kushilula minjiki ya ñanjilo, batwe bonso tufwaninwe kushikata mwa kushilwila mpangiko yetu mu muswelo upeja Leza bulēme.

◼ Kukwatyila Byaba: Byaba pa kushikata bikakwatyilwa enka boba botwiile nabo pamo mu motoka umo, botushikatanga nabo njibo imo, nansha botwifundanga nabo Bible.—1 Kod. 13:5.

◼ Bidibwa bya pa Midi: Tubemupe mulangwe wa kusela byakudya bipēla inoko abyo bileta bumeni, kimfwa: mikate (tumpompo nansha myende umbula), bipa (makonde), nyumu, nansha bitumbula. Bya kutoma, kimfwa mema, kawa (kafé) nansha tyai bifwaninwe kuselwa mu bintu kebibwanyapo kuladika mwanda wa kwepuka maakishida. Ke biyampepo kusela malwa ku kitango. Shi tusela bidibwa ne bitomibwa byetu, kino kikafundula mutyima wa kukapota’byo ku boba bayanga kupoteja bidibwa. Kwepuka bantu ba uno muswelo ba panja kukakwasha pa kupāna bukamoni butala bukundwe bwetu. (Tai mutyima: Bantu bāya kupoteja byakudya kebafwaninwepo kulekwa batwela mu kifuko kya kitango nansha dimo.—Yoa. 2:13-17.)

◼ Byabuntu: Tulombolanga kufwija’ko na kutūla byabuntu byetu bya na mutyima tō mwa kukwashisha mwingilo wingilwa ntanda yonso na kutūla’byo ku Njibo ya Bulopwe nansha ku kitango. Boba batūla byabuntu na sheke wa ku banki bakandika pa masheke dijina Association “Les Témoins de Jéhovah.”

◼ Maakishida ne Bundapi bwa Bukidibukidi: Mwingilo wa bundapi bwa bukidibukidi witwanga kyaba ne kyaba pangala pa tumyanda tutyetutye. Shi bine kubatambe mwanda ulomba kundapwa bukidibukidi ku kifuko kilongelwa kitango, itai bukidibukidi tutu utundaila baya udi nenu pabwipi, aye nandi akafikije mwanda ku Bundapi Bubajinji amba tutu upotolwele’byo āye atale bukatampe bwa mwanda’wa ne kumona kya kulonga.

◼ Kukwata Mafoto: Shi usaka kukwata mafoto kitatyi kipityijibwa kipimpo, nabya kokengidija mudilo wa foto. Koketa muntu wa kwiya kukukwata mafoto ku kitango. Shi ubamumone waiya’ko, koketabija akukwate.—Yoa. 2:13-17.

◼ Matelefone a ku Makasa: Afwaninwe kushita diwi kutyina kulabika bantu.

◼ Bukundwe: Pavule pene kimwekanga amba, boba bapota bidibwa ku bapoteja kebo kwela mapapye panshi. Mfulo mfulō kifuko kyayula mapapye, tumapalashitike, bijiko bya matyupa, ne bikwabokwabo. Shi muntu usaka kupota bidibwa ku boba bapoteja pa tumameza (kimfwa: mabombo, bitumbula, tumpompo, byaleo nansha shi kika shi kika), ufwaninwe kutadija amba kyadi kivungilwe’mo bidibwa kyelwe ku kyala, ke panshipo, mhm. Shi tubamone muntu uponeje papye nansha kabudimbo panshi, tuboyei ne kwela’byo mu kintu kya busala kitūdilwe’ko. Banabetu, tulongei buninge bwa kulama kifuko kilongelwa’po kitango kikale kitōka. Butōki i mwanda unenwe kuta’ko bonso mutyima. Shi umo ne umo avuije’mo kyandi kipindi, nabya kifuko kilongelwa’po kitango kikashala kitōka ku mfulo kwa difuku ne difuku. Kyotusaka i kwiula ngikadilo ya Leza otutōta, mwanda aye i ujila.—1 Pet. 1:15, 16; Div. 19:10; Kup. 23:14.

◼ Bifikilo: (1) Kemwakishikatai bavule mu kyumba nansha mu njibo momufikīle na bantu bakwabo bavule kutabuka pa buvule bwitabije nansha busaka mufikilwa. (2) Shi ubapele kukafikila mu kyumba kyowadi ulombele, nabya yukija bukidibukidi. (3) Kumeso kwa kuteka, ipangula bidi mufikilwa nansha batutu badi na kiselwa ku Njibo ya Bulopwe komufikīle i bika bifwaninwe kutebwa’ko mutyima. (4) Kokyonakanya kintu nansha kimo ku byonso bitūdīlwe beni. Ngikadilo yetu i ino: Kwikala na mwikadilo mwendele’mo kadi wa bulēmantu. (5) Bukundwe i mwanabo na bwine Leza. Lama kifuko kyofikīle’po kilongololwe senene, patōka kadi pakombe. Kino kitala ne Njibo ya Bulopwe ikokeja kwingidijibwa bu kifikilo kya banabetu batamba ku bipwilo bya kulampe. (6) Lombola kipa kya mushipiditu mu kipwano kyobe na bakwenu, na mufikilwa nansha ke na banabetu Bene Kidishitu bomufikile nabo pa kifuko kimo.—Ngat. 5:22, 23.

◼ Mwingilo wa Kwituma: Nsangaji yotwikalanga nayo pa kutanwa ku kitango ikavula shi twingila mwingilo wa kwituma na kukwasha mu mingilo palapala. (Bil. 20:35) Yense usaka kulonga uno muswelo ukalombola Mwingilo wa Kwituma ku kitango. Bana ba munshi mwa myaka 16, bakokeja kulunga’ko kuboko na kwingila munshi mwa buludiki bwa bambutwile babo nansha balami, nansha batame bakwabo betabijibwe na bambutwile nansha na balami.

[Kapango pa paje 5]

I Muswelo’ka Otukapāna Tukanda twa Lwito?

Pa kusaka tusambakanye mwaba wetu, tufwaninwe kunena mu kīpi. Tubwanya kunena’mba: “Wakomapo. Tuloñanga buninge bwa kwabanya ntanda yonso tukanda twa lwito. Kakanda kobe nobe aka keko. Usa kutana myanda mikwabo palapala mu kakanda ka lwito’ko.” Pangala pa kakanda ka lwito pasangaja bininge; nanshi tambika’ko mwine njibo mwanda wa amone’po. Nena na kyanga. Kitatyi kyotupāna’to Dya Mposo ne Dya Yenga, tukapāna’to pamo ne mapepala shi bibwanika.