“Ikalai Kyaba Kyonso na Mwikadilo Mulumbuluke mu Bantu ba Mizo”

1. Mwanda waka kulama mwiendelejo muyampe kitatyi kya kitango kudi na mvubu?

¹ Tukokanga milangwe ya bantu kitatyi kya byetu bitango bya mwaka ne mwaka, o mwanda mwine i biyampe mwiendelejo wetu ulombole patōka Leza otutōta. (Levi 20:26) Mwikadilo wetu, muvwadilo pamo ne mwidyangwilo bifwaninwe kulombola patōka amba twi balondi ba bine ba Kidishitu. Potusa kukatanwa ku kitango kyetu kya distrike nansha ku kitango kya matanda, le i muswelo’ka ‘otukekala kyaba kyonso na mwikadilo mulumbuluke mu bantu ba mizo’ ne kutumbija Tata wetu wa mūlu?—1 Pe. 2:12.

2. Le tukekala na mikenga’ka ya kulombola’mo bumuntu bwa bwine Kidishitu kitatyi kya kitango?

² Mwekejai Bumuntu bwa Bwine Kidishitu: Buswe botwilombolanga umo ku mukwabo ne muswelo otwikele na “boba ba panja” bulombolanga kwishila kukatampe kotwishidile na mushipiditu utādile mu ino ntanda. (Kol. 3:10; 4:5; 2 Tm. 3:1-5) Tufwaninwe kwikala na kanye ne na kitūkijetyima kitatyi kyotudi na mwimaniji wa njibo ya kifikilo ne na bengidi ba ku leshitola, nansha shi kubalupuka myanda. Kadi mwiendelejo muyampe uketutonona tushiye tuntu kampanda nansha kalupeto ku boba badi betukwasha mu tumingilo palapala.

3. Le bambutwile i bavulujibwe kulonga bika, ne mwanda waka?

³ Bambutwile bafwaninwe kukengelela babo bana kitatyi kyobadi ku kifuko kya kitango, ku maleshitola, ne ku njibo ya kifikilo. (Nki. 29:15) Mwimaniji umo mwana-mukaji wa ku leshitola ya ku njibo ya kifikilo, walombwele ba mulume ne mukaji bamo amba: “Twimusenswe mpata. Bisaka byenu ne benu bana badi na mwiendelejo muyampe ne na bulēme. Batwe bonso kuno twimunenenanga maya, kadi tusaka’tu longa mushikatyidile’nka kuno mafuku onso.”

4. Kitatyi kyotudi mu kibundi kilongelwa’mo kitango, i muswelo’ka otukata mutyima ku mumwekelo wetu?

⁴ Muvwadilo wa Butūkanye: Muvwadilo wetu kitatyi kya kitango, ufwaninwe kwikala muyampe kadi wa butūkanye, keufwaninwepo kwikala bwa muvwadilo utādile mu ino ntanda. (1 Tm. 2:9) Nansha ke kitatyi kyotudi ku njibo ya kifikilo, panja pa njibo ya kifikilo, ne kitatyi kyotwipwija mukose kumeso nansha pa kupwa kwa kitango, ketufwaninwepo kuvwala bivwalwa bikobakane nansha bisalakane. Shi tulonge namino, tukekala na fyedi ya kuvwala kayukeno ka kitango, kadi ketukekalapo na bumvu bwa kupāna bukamoni ponso potumona mukenga. Mumwekelo wetu ne bilongwa byetu biyampe byotukalombola kitatyi kya kitango kyetu kya distrike kya 2014, bikakokela bantu ba mityima myoloke ku musapu upāna būmi wa mu Bible ne kusangaja mutyima wa Yehova.—Zef. 3:17.

[Kapango pa pajos 2-5]

Bivulujo Bitala Kitango kya Distrike 2014

◼ Bitatyi bya Kupwila: Mpangiko ikashilula na nsá ya 8:20 lubanga mu mafuku onso asatu. Inoko bitango bikalongwa mu bino bibundi bikatampe: Bandundu-ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ne Tshikapa, mpangiko ikashilula na nsá ya 9:20 lubanga mafuku onso asatu. Bibelo bikashitulwa na 7:00 nansha 8:00 ya lubanga mungya kibundi. Minjiki shi ibashilula i kwitulombola amba, batwe bonso tufwaninwe kushikata mwanda wa tushilule mpangiko mu bulēmantu. Mpangiko ikafula na 3:55 kyolwa mu Dya Butano ne Dya Mposo, ino mu Dya Yenga na 2:40 kyolwa. Ikafula kupwa kwa nsá imo mu bibundi bidi kūlu’ku.

◼ Kukwatyila Byaba: Byaba pa kushikata bikakwatyilwa enka boba botushikatanga nabo njibo imo, botwiile nabo pamo mu motoka, nansha botwifundanga nabo Bible.

◼ Bidibwa bya pa Midi: Tubemupe mulangwe wa kusela byakudya bipēla abyo’ko bileta bumeni, kimfwa: mikate (tumpompo nansha myende umbula), bipa (makonde), nyumu, nansha bitumbula. Bya kutoma, kimfwa mema, kawa (kafé) nansha tyai bifwaninwe kuselwa mu bintu kebibwanyapo kuladika mwanda wa kwepuka maakishida. Ke biyampepo kusela malwa ku kitango. Shi tusela bidibwa ne bitomibwa byetu, kino kikafundula mutyima wa kukapota’byo ku boba bāyanga kupoteja bidibwa. Kwepuka bantu ba uno muswelo ba panja kukakwasha pa kupāna bukamoni butala bukundwe bwetu. (Tai mutyima: Bantu bāya kupoteja byakudya kebafwaninwepo kulekwa batwela mu kifuko kya kitango nansha dimo.—Yoa. 2:13-17.)

◼ Bukundwe: Pavule pene kimwekanga amba, boba bapota bidibwa ku bapoteja kebo kwela mapapye panshi. Mfulo mfulō kifuko kyayula mapapye, tumapalashitike, bijiko bya matyupa, ne bikwabokwabo. Shi muntu usaka kupota bidibwa ku boba bapoteja pa tumameza (kimfwa: mabombo, bitumbula, tumpompo, byaleo nansha shi kika shi kika), ufwaninwe kutadija amba kyadi kivungilwe’mo bidibwa kyelwe ku kyala, ke panshipo, mhm. Shi tubamone muntu uponeje papye nansha kabudimbo panshi, tuboyei ne kwela’byo mu kintu kya busala kitūdilwe’ko. Banabetu, tulongei buninge bwa kulama kifuko kilongelwa’po kitango kikale kitōka. Butōki i mwanda unenwe kuta’ko bonso mutyima. Shi umo ne umo avuije’mo kyandi kipindi, nabya kifuko kilongelwa’po kitango kikashala kitōka ku mfulo kwa difuku ne difuku. Kyotusaka i kwiula ngikadilo ya Leza otutōta, mwanda aye i ujila.—1 Pe. 1:15, 16; Div. 19:10; Kup. 23:14.

◼ Byabuntu: Tulombolanga kufwija’ko pangala pa kitango na kutūla byabuntu byetu bya na mutyima tō ku kitango, mwa kukwashisha mwingilo wingilwa ntanda yonso. Boba batūla byabuntu na sheke bakandika’po dijina dya “Association ‘Les Témoins de Jéhovah.’”

◼ Maakishida ne Bundapi bwa Bukidibukidi: Shi kubatambe mwanda ulomba kundapwa bukidibukidi ku kifuko kilongelwa kitango, itai bukidibukidi tutu utundaila bāya udi nenu pabwipi, aye nandi akafikije mwanda ku Bundapi Bubajinji amba tutu upotolwele’byo āye atale bukatampe bwa mwanda’wa ne kumona kya kulonga.

◼ Lawa Yobe: Shi udi na bwanga bukulembēlwe, nankyo i biyampe wilamije’bo ku kitango, mwanda padi kebukekala’kopo. Maselenge ne nshinge ya bantu babela diabete bifwaninwe kulamwa senene kwampikwa kwelaela’byo ku kitango.

◼ Kukwata Mafoto: Shi usaka kukwata mafoto kitatyi kipityijibwa mpangiko, nabya kokengidija mudilo wa foto. Koketa bansunga ba mafoto ku kitango. Shi ubamumone wāiya’ko, koketabija akukwate.—Yoa. 2:13-17.

◼ Mafomu Veuillez suivre l’intérêt (S-43): Akengidijibwa mwanda wa kuyukija shi kudi muntu walombwele kusepelela musapu padi pasapulwa bya kiponka na ponka ku kitango. Wilamije’ko fomu imo nansha abidi. Pa kupwa kwiayuja biyampe, ubwanya kukatūla’o ku Mwingilo wa Mabuku nansha kudi mulembi wa pa kipwilo kyenu pomujokela kwenu.

◼ Leshitola: Lēmeka dijina dya Yehova na mwiendelejo obe muyampe podi ku leshitola. Muvwadilo obe ulombole amba wi mwine Kidishitu. Wibashile kakanda, shi biloñwanga kwenu.

◼ Bifikilo:

(1) Kemwakishikatai bavule mu kyumba nansha mu njibo momufikīle na bantu bakwabo bavule kutabuka pa buvule bwitabije nansha busaka mufikilwa.

(2) Shi ubapele kukafikila mu kyumba kyowadi ulombele, nabya yukija bukidibukidi.

(3) Kumeso kwa kuteka, ipangula bidi mufikilwa nansha batutu badi na kiselwa ku Njibo ya Bulopwe komufikīle i bika bifwaninwe kutebwa’ko mutyima.

(4) Kokyonakanya kintu nansha kimo ku byonso bitūdīlwe beni. Ngikadilo yetu i ino: Kwikala na mwikadilo mwendele’mo kadi wa bulēmantu.

(5) Lama nyeke kifuko kyofikīle’po kilongololwe senene, patōka kadi pakombe. Kino kitala ne Njibo ya Bulopwe ikokeja kwingidijibwa bu kifikilo kya banabetu batamba ku bipwilo bya kulampe.

(6) Lombola kipa kya mushipiditu mu kipwano kyobe na bakwenu, na mufikilwa nansha ke na banabetu bene Kidishitu bomufikile nabo pa kifuko kimo.—Ngt. 5:22, 23.

◼ Mwingilo wa Kwituma: Yense usaka kwingila uno mwingilo ukalomba ku Mwingilo wa Kwituma ku kitango. Bana ba munshi mwa myaka 16, bakokeja kulunga’ko kuboko na kwingila munshi mwa buludiki bwa bambutwile babo nansha balami, nansha batame bakwabo betabijibwe na bambutwile nansha na balami.