Bivulujo Bitala Kitango kya Ntanda

Bitatyi bya Kupwila: Mpangiko ikashilula na nsá ya 8:20 lubanga mu mafuku onso asatu. Inoko bitango bikalongwa mu bino bibundi: Bandundu-Ville, Boma, Brazzaville, Bumba, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ne Tshikapa, mpangiko ikashilula na nsá ya 9:20 lubanga mafuku onso asatu. Bibelo bikashitulwa na 7:00 nansha 8:00 ya lubanga mungya kibundi. Minjiki shi ibashilula i kwitulombola amba, batwe bonso tufwaninwe kushikata mwanda wa tushilule mpangiko mu bulēmantu. Mpangiko ikafula na 3:55 kyolwa mu Dya Butano ne Dya Mposo, ino mu Dya Yenga na 2:40 kyolwa. Ikafula kupwa kwa nsá imo mu bibundi bidi kūlu’ku.

‘Kutōta Yehova ku Lwimbo’: Bantu ba Leza ba pa kala batendele Yehova mu ñimbo, ne dyalelo minjiki nayo i kipindi kya mvubu ku batōtyi babine. (Ñim. 28:7) Bipindi byonso bya ku kitango kyetu kya ntanda bishilulanga na minjiki ya ñanjilo. Ke minjikipo’tu ya kwalula nayo ino i miteakanibwe mwanda wa kwitufundija ne kumutōta Yehova. O mwanda, shi mwimaniji wanena’mba minjiki ya ñanjilo ai keishilula, kino ke kitatyipo kya kwisamba, ino i kya kushikata tuteje minjiki ne kwiisangela. Kulonga namino kulombola’mba ketupēlwilepo bukomo bulongele banabetu bañomba ba Watchtower. Misusa ibidi pa mwaka bano batutu ne bakaka badipanga lupeto lwabo ne kwenda ku Patterson, New York, mwanda wa kwitulupwila minjiki itobala’mba twiisangele. Kupwa kuteja minjiki ya ñanjilo, muntu ense atendele Yehova pamo na bakwabo na kwimba ñimbo yetu ya Bulopwe.

Kukwatyila Byaba: Byaba pa kushikata bikakwatyilwa enka boba botushikatanga nabo njibo imo, botwiile nabo pamo mu motoka, nansha botwifundanga nabo Bible.

Kuvwala pa Mvwadilo: Ku kitango tufwaninwe kuvwala bisandi bya bulēmantu, kadi na butūkanye, ke na biselapo bya ba ino ntanda mhm. (1 Tm. 2:9) Nansha ke potudi ku bifikilo ne mu bitatyi bikwabo bya kwisangaja kumeso nansha kupwa kwa mpangiko ya kitango, ketufwaninwe’po kuvwala misābi ne bisalakane. Ne kadi, tufwaninwe kuvwala kayukeno, ka kitango kyetu, ne kusapula bukamoni shi mukenga ubamweka. Mumwekelo ne mwiendelejo wetu ku kitango kīya’ki keukakokelapo’tu bantu ba mutyima wa kusangela ku musapu wa Bible upandija myuya kete, ino ukasangajanga ne Yehova.​—Zef. 3:17.

Mwikadilo Muyampe pa Kwingidija Telefone ne Bingindilwa Bikwabo: Tulombolei mwikadilo muyampe papityijibwa mpangiko na kutula telefone nansha kingidilwa kikwabo kya mudilo mu muswelo okekibwanyapo kukambakanya bakwabo. Shi wingidijanga kamera, video ya kukwata mawi, tabulete, nansha kingidilwa kikwabo, kebifwaninwepo kukambakanya bakwabo nansha kwibajikakanya. Kadi tulombolanga mwikadilo muyampe na kuleka kutuma misapu ku telefone nansha ku olodinatele papityijibwa mpangiko.

Bidibwa bya pa Midi: Tubemupe mulangwe wa kusela byakudya bipēla abyo’ko bileta bumeni, kimfwa: mikate (tumpompo nansha myende umbula), bipa (makonde), nyumu, nansha bitumbula. Bya kutoma, kimfwa mema, kawa (kafé) nansha tyai bifwaninwe kuselwa mu bintu kebibwanyapo kuladika mwanda wa kwepuka maakishida. Ke biyampepo kusela malwa ku kitango. Shi tusela bidibwa ne bitomibwa byetu, kino kikafundula mutyima wa kukapota’byo ku boba bāyanga kupoteja bidibwa. Kwepuka bantu ba uno muswelo ba panja kukakwasha pa kupāna bukamoni butala bukundwe bwetu. (Tai mutyima: Bantu bāya kupoteja byakudya kebafwaninwepo kulekwa batwela mu kifuko kya kitango nansha dimo.—Yoa. 2:13-17.)

Byabuntu: Tulombolanga kufwija’ko pangala pa kitango na kutūla byabuntu byetu bya na mutyima tō ku kitango, mwa kukwashisha mwingilo wingilwa ntanda yonso. Boba batūla byabuntu na sheke bakandika’po dijina dya “Association ‘Les Témoins de Jéhovah.’”

Lawa Yobe: Shi udi na bwanga bukulembēlwe, nankyo i biyampe wilamije’bo ku kitango, mwanda padi kebukekala’kopo. Maselenge ne nshinge ya bantu babela diabete bifwaninwe kulamwa senene kwampikwa kwelaela’byo ku kitango.

Maakishida ne Bundapi bwa Bukidibukidi: Shi kubatambe mwanda ulomba kundapwa bukidibukidi ku kifuko kilongelwa kitango, itai bukidibukidi tutu utundaila bāya udi nenu pabwipi, aye nandi akafikije mwanda ku Bundapi Bubajinji amba tutu upotolwele’byo āye atale bukatampe bwa mwanda’wa ne kumona kya kulonga.

Mafomu Veuillez suivre l’intérêt (S-43): Fomu Veuillez suivre l’intérêt ukengidijibwa mwanda wa kuyukija shi kudi muntu walombwele kusepelela musapu padi pasapulwa bya kiponka na ponka ku kitango. Pa kupwa kwiayuja biyampe, ubwanya kukatūla’o ku Mwingilo wa Mabuku nansha kudi mulembi wa pa kipwilo kyenu pomujokela kwenu.

Leshitola: Lēmeka dijina dya Yehova na mwiendelejo obe muyampe podi ku leshitola. Muvwadilo obe ulombole amba wi mwine Kidishitu. Wibashile kakanda, shi biloñwanga kwenu.

Bifikilo:

Kemwakishikatai bavule mu kyumba nansha mu njibo momufikīle na bantu bakwabo bavule kutabuka pa buvule bwitabije nansha busaka mufikilwa.

Shi ubapele kukafikila mu kyumba kyowadi ulombele, nabya yukija bukidibukidi.

Kumeso kwa kuteka, ipangula bidi mufikilwa nansha batutu badi na kiselwa ku Njibo ya Bulopwe komufikīle i bika bifwaninwe kutebwa’ko mutyima.

Kokyonakanya kintu nansha kimo ku byonso bitūdīlwe beni. Ngikadilo yetu i ino: Kwikala na mwikadilo mwendele’mo kadi wa bulēmantu.

Lama nyeke kifuko kyofikīle’po kilongololwe senene, patōka kadi pakombe. Kino kitala ne Njibo ya Bulopwe ikokeja kwingidijibwa bu kifikilo kya banabetu batamba ku bipwilo bya kulampe.

Lombola kipa kya mushipiditu mu kipwano kyobe na bakwenu, na mufikilwa nansha ke na banabetu bene Kidishitu bomufikile nabo pa kifuko kimo.—Ngt. 5:22, 23.

Mwingilo wa Kwituma: Yense usaka kwingila uno mwingilo ukalomba ku Mwingilo wa Kwituma ku kitango. Bana ba munshi mwa myaka 16, bakokeja kulunga’ko kuboko na kwingila munshi mwa buludiki bwa bambutwile babo nansha balami, nansha batame bakwabo betabijibwe na bambutwile nansha na balami.