Mwiendelejo Utumbija Leza

1. Mwanda waka batumoni ba Yehova bajiulwanga kitatyi kya kitango kya distrike?

¹ Kitatyi kyotutanwa ku bitango bya distrike, tujiulwanga na bonso. Mu bibundi bivule mulongelwanga bitango, musapu utala kitango welwanga ku bisanji. Ku mahotela ne maleshitola kitatyi kivule kuyulanga bēni, kadi bantu ba mu kibundi bamonanga bēni bavule bavwele tuyukeno twa kitango. Bino bivulujo bilonda’ko biketukwasha tutumbije Leza na mwiendelejo wetu mulumbuluke mu kibundi kilongelwa’mo kitango.—1 Pet. 2:12.

2. I muswelo’ka otukokeja kutumbija Leza na kuvwala pa mvwadilo mu kibundi kilongelwa’mo kitango?

² Kuvwala pa Mvwadilo: Kuvwala kotuvwala pa mvwadilo mu kitatyi kya kubungakana, divule kutendelwanga na bantu. Ino, muvwadilo mu bitatyi bikwabo—potudi ku hotela, potudya mu maleshitola, mu nsoko, ne kukwabokwabo—ukokeja kwikala na lupusa pa bantu betutala. Nansha shi mu bino bitatyi kebitulombepo kuvwala’nka na batwe badi ku kupwila, muvwadilo wetu ufwaninwe kwikala muyampe, wa bulēmantu, kadi ketufwaninwe’po kuvwala misābi. Bantu betutala bakamona’mba twi beshile na bampikwa kwitabija. (Loma 12:2) Ne kadi, tufwaninwe kuvwala kayukeno, na kulonga namino bantu bakayuka’mba tudi na kitango, tukamona mikenga ya kusapula, kadi beni bakwabo nabo kebakakolelwapo kwituyuka.

3. Le i muswelo’ka otukokeja kulombola kitūkijetyima ne bulēme?

³ Kitūkijetyima ne Bulēme: Mu kino kitatyi kivudile bantu besakila ne bakubulwa kufwija’ko, kitūkijetyima kyetu ne bulēme bikatenga mpata mityima ya boba betutala, shi ku hotela, nansha ku leshitola! (2 Tem. 3:1-5) Kitatyi kyotukwatyila byaba nansha kyotutambula bitabo bipya, ketukesakilapo kamweno ketu, inoko ka bakwabo. (1 Kod. 10:23, 24) Mwana-mulume umo watenwe ku kitango musunsa wandi umbajinji, wanene amba, “nkivulukilepo mashikulu onso anenwe mu dine difuku’dya, inoko mwiendelejo wa Batumoni nekiutendela ne dyalelo.”

4. Shi bibwanika, mwanda waka i biyampe kwingila bu bengidi ba kwituma ku kitango?

⁴ Bengidi ba Kwituma: Mushipiditu wa kwipāna i kiyukeno kya bene Kidishitu ba bine. (Mit. 110:3) Wabulwa’po kwingila bu mwingidi wa kwituma ku kitango? Ku kitango kimo, batutu ne bakaka kintu kya 600 baingile bu bengidi ba kwituma na kukundula pa kifuko kumeso kwa kitango. Kisumpi kimo kya bantu, kyanena’mba: “Kino kyo kintu kitulumukwa bininge kyo ketwamwene kashā! i bikomo kulanga’mba bano bantu bonso babwanya kwikala bengidi ba kwituma.” Tutengele na kipyupyu bitango bya distrike mu 2013, ke pantu biketupa mukenga wa kuteja ne kufundijibwa na Leza kadi ne kumutumbija ponka.

[Kapango pa paje 3-6]

Bivulujo Bitala Kitango kya Distrike 2013

◼ Bitatyi bya Kupwila: Mpangiko ikashilula na nsá ya 8:20 lubanga mu mafuku onso asatu. Inoko bitango bikalonga mu bino bibundi: Brazzaville, Goma, Kananga, Kikwit, Kinshasa, Kisangani, Kolwezi, Likasi, Lodja, Lubumbashi, Matadi, Mbandaka, Mbuji Mayi, Mwene Ditu, Pointe Noire ne Tshikapa, mpangiko ikashilula na nsá ya 9:20 lubanga mafuku onso asatu. Bibelo bikashitulwa na 7:00 nansha 8:00 ya lubanga mungya kibundi. Minjiki shi ibashilula i kwitulombola amba, batwe bonso tufwaninwe kushikata mwanda wa tushilule mpangiko mu bulēmantu. Mpangiko ikafula na 3:55 kyolwa mu Dya Butano ne Dya Mposo, ino mu Dya Yenga na 2:40 kyolwa. Ikafula kupwa kwa nsá imo mu bibundi bidi kūlu’ku.

◼ Kukwatyila Byaba: Byaba pa kushikata bikakwatyilwa enka boba botwiile nabo pamo mu motoka, botushikatanga nabo njibo imo, nansha botwifundanga nabo Bible.—1 Kod. 13:5.

◼ Bidibwa bya pa Midi: Tubemupe mulangwe wa kusela byakudya bipēla inoko abyo bileta bumeni, kimfwa: mikate (tumpompo nansha myende umbula), bipa (makonde), nyumu, nansha bitumbula. Bya kutoma, kimfwa mema, kawa (kafé) nansha tyai bifwaninwe kuselwa mu bintu kebibwanyapo kuladika mwanda wa kwepuka maakishida. Ke biyampepo kusela malwa ku kitango. Shi tusela bidibwa ne bitomibwa byetu, kino kikafundula mutyima wa kukapota’byo ku boba bāyanga kupoteja bidibwa. Kwepuka bantu ba uno muswelo ba panja kukakwasha pa kupāna bukamoni butala bukundwe bwetu. (Tai mutyima: Bantu bāya kupoteja byakudya kebafwaninwepo kulekwa batwela mu kifuko kya kitango nansha dimo.—Yoa. 2:13-17.)

◼ Bukundwe: Pavule pene kimwekanga amba, boba bapota bidibwa ku bapoteja kebo kwela mapapye panshi. Mfulo mfulō kifuko kyayula mapapye, tumapalashitike, bijiko bya matyupa, ne bikwabokwabo. Shi muntu usaka kupota bidibwa ku boba bapoteja pa tumameza (kimfwa: mabombo, bitumbula, tumpompo, byaleo nansha shi kika shi kika), ufwaninwe kutadija amba kyadi kivungilwe’mo bidibwa kyelwe ku kyala, ke panshipo, mhm. Shi tubamone muntu uponeje papye nansha kabudimbo panshi, tuboyei ne kwela’byo mu kintu kya busala kitūdilwe’ko. Banabetu, tulongei buninge bwa kulama kifuko kilongelwa’po kitango kikale kitōka. Butōki i mwanda unenwe kuta’ko bonso mutyima. Shi umo ne umo avuije’mo kyandi kipindi, nabya kifuko kilongelwa’po kitango kikashala kitōka ku mfulo kwa difuku ne difuku. Kyotusaka i kwiula ngikadilo ya Leza otutōta, mwanda aye i ujila.—1 Pet. 1:15, 16; Div. 19:10; Kup. 23:14.

◼ Byabuntu: Tulombolanga kufwija’ko na kutūla byabuntu byetu bya na mutyima tō ku kitango, mwa kukwashisha mwingilo wingilwa ntanda yonso. Boba batūla byabuntu na sheke bakandika’po dijina dya « Association ‘Les Témoins de Jéhovah.’ »

◼ Maakishida ne Bundapi bwa Bukidibukidi: Shi kubatambe mwanda ulomba kundapwa bukidibukidi ku kifuko kilongelwa kitango, itai bukidibukidi tutu utundaila bāya udi nenu pabwipi, aye nandi akafikije mwanda ku Bundapi Bubajinji amba tutu upotolwele’byo āye atale bukatampe bwa mwanda’wa ne kumona kya kulonga.

◼ Lawa Yobe: Shi udi na bwanga bukulembelwe, nankyo i biyampe wilamije’bo ku kitango, mwanda padi kebukekala’kopo. Maselenge ne nshinge ya bantu babela diabete bifwaninwe kulamwa senene kwampikwa kwelaela’byo ku kitango.

◼ Kukwata Mafoto: Shi usaka kukwata mafoto kitatyi kipityijibwa kipimpo, nabya kokengidija mudilo wa foto. Koketa bansunga ba mafoto ku kitango. Shi ubamumone wāiya’ko, koketabija akukwate.—Yoa. 2:13-17.

◼ Mafomu Personne qui demande à être visitée (S-43): Akengidijibwa mwanda wa kuyukija shi kudi muntu walombwele kusepelela musapu padi pasapulwa bya kiponka na ponka ku kitango. Wilamije’ko fomu imo nansha abidi. Pa kupwa kwiayuja biyampe, ubwanya kukatūla’o ku Mwingilo wa Mabuku nansha kudi mulembi wa pa kipwilo kyenu pomujokela kwenu.—Tala Mwingilo Wetu wa Bulopwe wa Kweji 11, 2009 pa paje 4.

◼ Leshitola: Lēmeka dijina dya Yehova na mwiendelejo obe muyampe podi ku leshitola. Wibashile kakanda, shi biloñwanga kwenu.

◼ Bifikilo: (1) Kemwakishikatai bavule mu kyumba nansha mu njibo momufikīle na bantu bakwabo bavule kutabuka pa buvule bwitabije nansha busaka mufikilwa. (2) Shi ubapele kukafikila mu kyumba kyowadi ulombele, nabya yukija bukidibukidi. (3) Kumeso kwa kuteka, ipangula bidi mufikilwa nansha batutu badi na kiselwa ku Njibo ya Bulopwe komufikīle i bika bifwaninwe kutebwa’ko mutyima. (4) Kokyonakanya kintu nansha kimo ku byonso bitūdīlwe beni. Ngikadilo yetu i ino: Kwikala na mwikadilo mwendele’mo kadi wa bulēmantu. (5) Bukundwe i mwanabo na bwine Leza. Lama kifuko kyofikīle’po kilongololwe senene, patōka kadi pakombe. Kino kitala ne Njibo ya Bulopwe ikokeja kwingidijibwa bu kifikilo kya banabetu batamba ku bipwilo bya kulampe. (6) Lombola kipa kya mushipiditu mu kipwano kyobe na bakwenu, na mufikilwa nansha ke na banabetu bene Kidishitu bomufikile nabo pa kifuko kimo.—Ngat. 5:22, 23.

◼ Mwingilo wa Kwituma: Yense usaka kwingila uno mwingilo ukalomba ku Mwingilo wa Kwituma ku kitango. Bana ba munshi mwa myaka 16, bakokeja kulunga’ko kuboko na kwingila munshi mwa buludiki bwa bambutwile babo nansha balami, nansha batame bakwabo betabijibwe na bambutwile nansha na balami.