Lwito lwa pa Bula
1. Lelo i kitatyi’ka kikashilula kampanye ka kwita bantu ku bitango bya mu 2014?
1 Langa’po bidi shi wi muteakenye balunda nansha kisaka bidibwa bya musonso, kadi bino bidibwa i bikulombe bukomo ne lupeto luvule pa kwibiteakanya, mwene’nka ne muswelo okebeta ukekala wa kyanga? Muswelo umo onka, i kwingilwe mingilo mikomo mwanda wa kuteakanya masobo a ku mushipiditu akasobwa ku kitango kyetu kya distrike ne kya matanda kya mu 2014. Tukekala na kiselwa kya kwita bantu mu mayenga asatu abadikidile kitango kyetu, amba nabo bāye batanwe’ko. Le i bika biketukwasha twabanye lwito na kyanga?
2. Le i bika biketutonona tusapule bininge kitatyi kya kampanye?
2 Kulangulukila na mutyima wa kufwija’ko pa byabuyabuya byotumwenanga mu masobo a ku mushipiditu etulongolwela Yehova ku bitango byetu, kuketutonona tusapule na bupyasakane mu kitatyi kya kampanye. (Isa. 65:13, 14) Tufwaninwe kadi ne kuvuluka’mba kampanye ketu ka mwaka ne mwaka kalupulanga bipa biyampe. Bantu bamo mu boba botuketa bakāya kutanwa ku kitango pamo netu. Ino tuyukei amba bukomo botulonga bwa kwita bantu kitatyi kya kampanye butumbijanga Yehova ne kulombola buntu bwandi, ekale betabe bavule nansha batyetye.—Ñim. 145:3, 7; Kus. 22:17.
3. Le tukanda twa lwito tukabanibwa namani?
3 Kitango ne kitango kyonso kya bakulumpe kifwaninwe kulombola muswelo ubwanya kipwilo kwabanya tukanda twa lwito tuvule, kwitushiya ku mobo kwampikwa bantu ne kwitwabanya mu busapudi bwa mu kitango kya bantu. Mu Dya Mposo ne Dya Yenga, mapepala akabanibwa pamo na tukanda twa lwito shi bikokejika. Shi Dya Mposo dibajinji dya kweji dibaponena mu mafuku a kampanye, nabya mukemanina bininge pa kwabanya tukanda twa lwito pa kyaba kya kushilula bifundwa bya Bible. Bine shi kampanye kabapu, tukekala na nsangaji ya kuyuka amba twi bakwatakanye kampanye na bupyasakane ne kwita bantu bavule belunge netu ku ano masobo a ku mushipiditu ateakenye Yehova!
[Kapango pa pajo 3]
Le Ukanena Bika?
Shi ubapu kwimuna muntu mwiimwinwanga kwenu, ubwanya kunena’mba: “Tudi mu kampanye kalongwa ntanda yonso mwanda wa kwita bantu ku kinkumenkume kya mvubu mpata. Difuku, kitatyi, ne adelese i bilombolwe pa kano kakanda ka lwito.”