Shapita 28
Ikalai senene mu buswe umo ku mukwabo
PANO poenda utama mu buyuki ne kutūla kikulupiji kyobe mudi Yehova Leza ne mu mpango yandi, ukasaka kukakwatañana nyeke pamo na bantu badi na lwitabijo ne kikulupiji kya muswelo umo. Pa kulonga namino, ukekala kodi umo wa mu bulongolodi bwa Leza bumweka na meso, mu bubutule bwabinebine bwa bwine kristu. Penepo kikakusakila kukokela ku uno musoñanya: “Sanswai kitango kyonso kya banabetu.”—1 Petelo 2:17, NW; 1 Petelo 5:8, 9.
2 Yesu Kristu wakokele milangwe ya balondi bandi pa kamweno ka kwisanswa umo ku mukwabo. Webalombwele’mba: “Nemupe mbila mipya, amba mwisanswei umo ku mukwabo . . . Pa kino po pakayukila bonso’mba mwi bami bana-babwanga, shi mudi na buswe umbukata mwenu.” (Yoano 13:34, 35, NW) Bishima “umo ku mukwabo” ne “umbukata mwenu” bilombolanga patōka’mba bakristu babine bonso bādi bafwaninwe kwikala pamo mu kitango kimo kete nansha bulongolodi. (Loma 12:5; Efisesa 4:25) Kadi buno bulongolodi bwādi bwakuyukilwa ku buswe budi na bantu badimo umo ku mukwabo. Shi muntu kadipo na buswe, nankyo bilongwa byandi byonso kebidipo na mvubu.—1 Kodinda 13:1-3.
3 Pa kino, bakristu babajinji bādi bebavuluja nyeke’mba: “Mwisanswei senene banwe bene na bene.” “Mwikalei ne kwitambula banwe bene na bene.” “Mwikale kwīngidila mīngilo, banwe bene na bene.” “Mwikale ne kanye banwe bene na bene, ne mutyima wa kukōka, mwikale kwilekela banwe bene.” “Mwikwashei banwe bene na bene, ne kwilekela myanda wa ku mukwabo wa ku mukwabo, shi kudi udi ne mwanda ne mukwabo.” “Mwikankamikei banwe bene na bene, ne kwitamija banwe bene.” “Ikalai mu ndoe talala banwe bene na bene.” “Kitabukile byonso i kwisanswa bikata banwe bene na bene.”—Loma 12:10, MB; Loma 15:7; Ngalatea 5:13; Efisesa 4:32; Kolose 3:13, 14, MB; 1 Tesalonika 5:11, 13, MB; 1 Petelo 4:8, MB; 1 Yoano 3:23; 4:7, 11.
4 Inoko, kino kekishintululapo’mba bakristu babine bafwaninwe kusanswa enka balunda nabo bobadi nabo mu bulongolodi bwa Leza kete. Bafwaninwe ne kusanswa bakwabo. Pa kino, Bible wibasoñanyanga’mba tamai mu “buswe bo mwisenswe banwe bonso ne bwa kusanswa bantu bonso.” (1 Tesalonika 3:12; 5:15, MB) Polo walombwele milangwe myendelemo pa kusoneka’mba: “Ebiya kadi, monka motwakamwena mwakulongela, tulonge biyampe ku bakwetu bonso, ino ku boba badi mu kipango kya kwitabija bo bene.” (Ngalatea 6:10) Pa kino, bakristu nansha byobafwaninwe kusanswa bantu bonso, kwelamo ne balwana-nabo bene, inoko bafwaninwe kusanswa nakampata bakwabo bobadi nabo mu bulongolodi bwa Leza, banababo ba kumushipiditu, batutu ne bakaka.—Mateo 5:44.
5 Bakristu babajinji bādi bayukane bininge pamwanda wa buswe bobādi nabo umo ku mukwabo. Kukwatañana na mulembi umo wa mu myaka tutwa tubidi imbajinji, Tertullien, bantu bādi bebanena’mba: ‘Tala mobesanshilwe umo ku mukwabo, ne mobeteakaninye mwanda wa kusaka kufwila bakwabo!’ Buswe bwa uno muswelo, bumwekanga ne umbukata mwa bakristu babine dyalelo. Ino lelo kino kishintulula’mba bakristu babine kebakokejapo kwipya myanda umbukata mwabo nansha kutana bikambija?
BIPÁ BITAMBA KU KUBULWA KUBWANININA
6 Kupityila ku kwifunda kobe kwa Bible, ubayuka’mba batwe bonso twibapyane ku bambutwile betu babajinji, ba Adama ne Eva, kubulwa kubwaninina. (Loma 5:12) Tudi’nka na milangwe itukokela ku kulonga bubi. Bible unena’mba: “Mwanda batwe bonso tukukalanga mu bintu bivule.” (Yakoba 3:2; Loma 3:23) Kadi ufwaninwe kuyuka’mba boba badi mu bulongolodi bwa Leza nabo ibakubulwa kubwaninina, ne mukyaba kimo bakokeja kulonga bintu byakubulwa kōloka. Bikokeja kulupula myanda ne bikambija nansha ke umbukata mwa bakristu babine.
7 Tubandaulei byafikile bana-bakaji babidi ba Eodia ne Shintake mu kipwilo kibajinji kya mu Fidipai. Mutumibwa Polo wasonekele’mba: “Kadi namwisashila ba Eodia, ne Shintake mwine kumo, na’mba bēkale ne mutyima umo mudi Mfumwetu.” Mwanda’ka Polo wakankamikile bano bana-bakaji babidi “bēkale ne mutyima umo”? I kimweke patōka’mba, bepīle myanda. Bible kalombwelepo i kika kyobafwidile. Padi bashilwile kwikwatyilwa mukao. Inoko, bine bādi bana-bakaji balumbuluke. Bādi bakristu mubula bwa kitatyi kilampe. Myaka kumeso, baingidile pamo na Polo mu mwingilo wa busapudi. Omwanda wasonekēle kipwilo bakimbe muswelo wa: “Kukwasha boba bana-bakaji; ke-bantu baputumine mu mingilo pamo nāmi mu myanda-miyampe.”—Fidipai 4:1-3.
8 Difuku dimo kwatulukile kadi lupotopoto pabukata bwa mutumibwa Polo ne mwendi-nandi Banabasa. Pobākutyile lwendo lwabo lwabubidi lwa bu misionele, Banabasa wasakile basele ne mwipwa wandi Mako. Ino Polo kāsakilepo bende na Mako, mwanda Mako webashīle mu lwendo lubajinji lwa bu misionele, wajokela ku njibo. (Bilongwa 13:13) Bible unena’mba: “Penepo kala kwabukile lupata lukatampe lwa malwa, bakalañana au kwandi, au kwandi.” (Bilongwa 15:37-40) Langa bidi mokyapityīle! Shi wādipo ne kumona luno “lupata lukatampe lwa malwa,” lelo wādi ukokeja kutyiba mbila’mba ba Polo ne Banabasa kebādipo mu bulongolodi bwa Leza, pamwanda wa kuno kwipotomeja kobepotomeje?
9 Mu kyaba kikwabo, mutumibwa Petelo walongele bibi. Walekele kunangila pamo bininge na bakristu ba ku mizo ya Bujentaila pamwanda wa kutyina kufutululwa na bakristu bamobamo Bayuda bādi bafutulula banababo ba ku mizo ya Bujentaila byakubulwa kwendelamo. (Ngalatea 2:11-14) Mutumibwa Polo pa kumona byādi bilonga Petelo, watopekele Petelo kumeso a bantu bonso pamwanda wa kino kilongwa kyakubulwa kwendelamo. Waswile kwiīvwana namani shi i abe wādi Petelo?—Bahebelu 12:11.
MWA KUPWIJIJA MYANDA NA BUSWE
10 Petelo wādi ukokeja kukalēla mutumibwa Polo. Wādi ukokeja kuloba pamwanda wa kutopeka kwamutopekele Polo kumeso a bantu bonso. Ino kēkilongelepo. (Musapudi 7:9) Petelo wādi uyukile kwityepeja. Waitabije kulemununwa ne kalekelepo uno mwanda utalaje buswe bwandi padi Polo. (1 Petelo 3:8, 9) Ivwana mwesambile Petelo padi Polo, mwenda mafuku, mu mukanda wandi wa kukankamika bakristu balunda nandi: “Kadi telai bitupu amba, kutūkija mutyima kwa Mfumwetu lo lupandilo; monka mwemulembele mwanetu Polo muswedibwe, monka mwaendele ne ñeni yamupelwe.” (2 Petelo 3:15) Bine, Petelo walekele buswe bupūte uno mwanda walupukile mu kine kyaba’kya pamwanda wa mwiendelejo wandi umbi.—Nkindi 10:12.
11 Le mwanda wa ba Polo ne Banabasa nao? Nao beupwijije na buswe. Mwanda mwenda mafuku, pa kusonekela kipwilo kya mu Kodinda, Polo wesambile padi Banabasa’mba i mulunda-nami wapabwipi mu mwingilo. (1 Kodinda 9:5, 6) Nansha bimweka Polo bu wādi na buluji bulumbuluke bwa kwikaka kwenda pamo na Mako, mwenda mafuku uno nkasampe watamine muñeni mu muswelo wafikije ne Polo ku kusonekela Temote’mba: “Pa kwiya upitule Mako mwiye nandi; mwanda i mukwashi wami mu mīngilo.” (2 Temote 4:11) Tukokeja kuboila ñeni ku kino kimfwa pamwanda utala muswelo wa kupwija myanda.
12 Ino, lelo ba Eodia ne Shintake nabo? Lelo bapwijije myanda yabo na kuleka buswe bupūte bubi bonso bobelubile umo ku mukwabo? Bible ketulombwelepo mwafudile uno wabo mwanda. Inoko, byobādi bu bana-bakaji bayampe baingidile pamo na Polo mu mwingilo wa bukristu, tukokeja kukulupila’mba baitabije na mutyima wa kwityepeja madingi obapelwē. Pobatambwile mukanda wa Polo, tukokeja kufwatakanya’mba baendele kuketana abo bene na bene ne kupwija wabo mwanda na mushipiditu wa buswe.—Ngalatea 5:13-15.
13 Padi nobe ukokeja kumona’mba, i kikomo kwiivwana na muntu kampanda nansha na bantu bamobamo ba pa kyenu kipwilo. Padi bafwaninwe kupityija kitatyi kilampe mwanda wa kutamija ngikadilo milumbuluke ya bu bakristu babinebine. Ino langa bidi: Lelo Yehova Leza wilaijanga bantu enka bafundule bidi ngikadilo yabo yonso imbi ebiya kashilula kwibasanswa? Mhm, Bible unena’mba: “Leza wetulombola mwaetusanshilwe’mba po twakidi babipyamambo, Kristu wetufwidile.” (Loma 5:8, MB) Tufwaninwe kwiula kino kimfwa kya Leza ne kulombola buswe ku boba bonso balonga bintu bibi ne bya bulembakane.—Efisesa 5:1, 2; 1 Yoano 4:9-11; Mitoto 103:10.
14 Batwe bonso byotudi bakubulwa kubwaninina, Yesu wafundije’mba ketufwaninwe kubaba nansha kufutulula bakwabo. I kyabine’mba bakwabo badi na tutó, inoko batwe netu tudi nato. Yesu waipangwile’mba: “Byonenako mukwenu’mba: Leka bidi nkufundule kaseke ka bukula bwa kityi mu dīso dyobe, ino le au mulamba udi mu dīso dya abe mwine le?” (Mateo 7:1-5) Na kutá mutyima ku ano madingi a tunangu, tukamona muswelo wa kwikala senene na batutu ne bakaka.
15 Tufwaninwe nakampata kwikala na mutyima wa lusalusa ne kulekela bakwabo. Eyo, padi ukokeja kwikala na buluji bulumbuluke bwa kukalela tutu obe nansha kaka obe. Ino vuluka ano madingi a mu Bible: “Mwikwashei banwe bene na bene, ne kwilekela myanda wa ku mukwabo wa kumukwabo, shi kudi udi ne mwanda ne mukwabo.” Ino mwanda’ka ufwaninwe kulekela bakwabo abe na buluji bulumbuluke bwa kwibakalela? Bible ulondolola’mba mwanda mo “monka mwemulekelele [Yehova].” (Kolose 3:13, MB) Ne shi tusaka kutambula kulekelwa mambo kwetu, Yesu wanene’mba tufwaninwe kulekela bakwabo. (Mateo 6:9-12, 14, 15) Mu lukindi lumo lwa Yesu, Yehova i mudingakanibwe pamo na mulopwe witulekela misunsa kanunu, lelo netu ketukokejapo kulekela banabetu ino misunsa mityetye bitupu?—Mateo 18:21-35; Nkindi 19:11.
16 Shi ketusenswepo batutu ne bakaka ne shi ketwibalekelangapo, nankyo ketwingidijangapo bubinebine. (1 Yoano 4:20, 21; 3:14-16) Pa kino, nansha shi mubepi myanda na mukristu mukwenu, bine kokileka kumuneneja. Kokimukwatyilwa nkinji, ino pwijai wenu mwanda senene mu mushipiditu wa buswe. Shi ubalubila mwanenu, ikala na kampeja-bukidi ka kumulomba lusa akulekele.—Mateo 5:23, 24.
17 Ino lelo kikekala namani shi muntu wakutuke, nansha shi wakulubila mu muswelo mukwabo? Bible witudingila’mba: “Kokanena’mba: Nkamulonga monka mwanongela ami; nkalubwila muntu’wa mwendele mwingilo wandi.” (Nkindi 24:29; Loma 12:17, 18) Yesu Kristu wetudingile’mba: “Wakukukupila ku kutama kumo nabya mwalwije ne kukwabo.” (Mateo 5:39) Kukupila muntu lupi ku kutama, kekudipo na kitungo kya kusaka kumutapa kilonda, kudi na kitungo kya kusaka kutuka muntu nansha kumusomba. Pa kunena uno muswelo, Yesu wamfundije balondi bandi beepeje na lupotopoto ne lūma. Shi ke pano kemufwaninwepo “kulubula bubi na bubi bukwabo, nansha mutonko ku mutonko mukwabo, mhm,” ino ‘kimbai ndoe ne kwiilondalonda.’—1 Petelo 3:9, 11; Loma 12:14.
18 Vuluka’mba tufwaninwe ‘kusanswa kitango kyonso kya banabetu.’ (1 Petelo 2:17) Yehova Leza witupanga kimfwa kilumbuluke. Kasañunangapo’mba yeu ye yeu. Kudi aye nkoba yonso idi muswelo umo. (Bilongwa 10:34, 35; 17:26) Boba bakalamwa ku ‘kyamalwa kibuke’ ibalupuke “mu mizo yonso ne mu bisaka byonso ne mu bantu, ne mu ndimi.” (Kusokwelwa 7:9, 14-17) Shi ke pano, na kwiula kimfwa kya Leza, ketufwaninwepo kusanswa bakwabo patyetye, amba mwanda i bantu ba musaka mukwabo, ba muzo mukwabo, ba ngikadilo ya umbūmi mishīle nansha ba ngitu ya lukoba lukwabo.
19 Longa bukomo bwa kuyuka bonso badi mu kipwilo kya bwine kristu, ne ukebasanswa ne kwibalemeka. Boba batame, wibamone ka na pamo bwa ba shobe ne inobe, bankasampe nabo pamo bwa batutu obe ne bakaka obe. (1 Temote 5:1, 2) Bine i madyese makatampe kwikala bu umo wa mu kino kisaka kya bulongolodi bumweka na meso, mudi bantu bashikete senene mu buswe. Kikekalanga kilumbuluke nakampata kukekala mu paladisa pano pantanda mu kino kisaka kya bantu babuswe!—1 Kodinda 13:4-8.
[Bipangujo]
1. (a) I muswelo’ka okokeja kwikala bu umo wa mu bulongolodi bwa Leza? (b) Penepo i mbila’ka yofwaninwe kulemeka?
2. (a) Yesu wapele balondi bandi mbila’ka mipya? (b) Bishima “umo ku mukwabo” ne “umbukata bwenu” lelo bilombolanga kika patōkelela? (c) Kwikala na buswe lelo kudi na kamweno’ka?
3. I muswelo’ka ulombola Bible kamweno ka kusanswa balunda netu mu lwitabijo?
4. (a) I kika kilombola’mba bakristu bafwaninwe kusanswa bantu bakwabo, kupitako ‘kwisanswa enka abo bene na bene’? (b) Bakristu bafwaninwe kusanswa ba ani nakampata?
5. I kika kilombola’mba bakristu babine, ba mu kitatyi kibajinji ne ba mu kino kitatyi, bayukilwanga ku buswe?
6. Mwanda’ka nansha ke bakristu babine bene bakokeja kwilubila kyaba kimo umo ku mukwabo?
7. (a) Mwanda’ka ba Eodia ne Shintake badingilwe mwanda wa “bekale ne mutyima umo”? (b) I kika kilombola’mba bādi bakristu bana-bakaji bayampe?
8. (a) I lupotopoto’ka lwatulukile pabukata bwa ba Polo ne Banabasa? (b) Shi watenwe pa luno lupotopoto, lelo waswile kufula ku mulangwe’ka?
9. (a) I bubi’ka bwalongele Petelo, ne i kika kyamufikije ku kulonga uno muswelo? (b) I kika kyalongele Polo pa kwikimona?
10. (a) Petelo wekimwene muswelo’ka pobamulemunwine? (b) I kika kyotukokeja kwifunda kupityila ku kimfwa kya Petelo?
11. (a) Nansha byobefunine na bulobo bukatampe, i kika kyalongele ba Polo ne Banabasa kilombola’mba bādi bakristu babine? (b) I muswelo’ka otukokeja kumwena kamweno kupityila ku kimfwa kyabo?
12. (a) Mwanda’ka tukokeja kunena’mba ba Eodia ne Shintake bapwijije myanda yabo senene? (b) Kukwatañana na Ngalatea 5:13-15, mwanda’ka bakristu bafwaninwe kupwija myanda yabo mu buswe?
13. I kimfwa’ka kitupa Yehova Leza mu kulombola buswe?
14. I madingi’ka aletele Yesu atala pa lubabo ne mifutululo?
15. (a) Mwanda’ka i biyampe kulekela bakwabo nansha shi tudi na buluji bwa kwibakalela? (b) Mu lukindi lwandi ludi mu Mateo shapitra 18, i muswelo’ka wamfundije Yesu kamweno ka kulekela bakwabo?
16. (a) Kukwatañana na 1 Yoano 4:20, 21, kusanswa Leza i kukwatañane muswelo’ka na kusanswa bakristu balunda netu? (b) I ditabula’ka dyofwaninwe kulonga shi mwanenu udi nobe mwanda?
17. I kika kyofwaninwe kulonga shi muntu kampanda wakulubila?
18. I kika kyotufwaninwe kwifunda kupityila ku buswe bwa Leza bwasenswe mizo yonso?
19. (a) I muswelo’ka otufwaninwe kumona ne kukwata balunda-netu bakristu? (b) I madyese’ka makatampe otukokeja kwikala nao?
[Kapango pa paje 233]
I kika kyotukokeja kwifunda kupityila ku kyafikīle ba Eodia ne Shintake?
[Kapango pa paje 235]
Lupotopoto lwatulukile pabukata bwa ba Polo ne Banabasa, lelo kino kilombola’mba kebādipo mu bulongolodi bwa Leza?
[Kapango pa paje 236]
Bakristu babine balekanga buswe bupūte byonso bikokeja kwibaletela kavutakanya
[Kapango pa paje 237]
Mu bulongolodi bwa Leza, buswe butakikanga bakristu bemone abo bonso bu benzankane