Shapita 1

Misapu Mitambe Mūlu

BIBLE yense mutuntulu i musapu mutambe mūlu, otupelwe na Tata wetu wamūlu mwanda wa kwitufundija. Inoko kudi misapu ibidi ya pa bula yāletelwe, kubwipi kwa myaka 2000 kunyuma, na mwikeulu ‘wimananga ku mpala ya Leza.’ Dijina dyandi i Ngabudyele. Tubandaulei musaka kupityila buno bupempudi bwandi bubidi bukatampe pano panshi.

I mu mwaka wa 3 K.K.K. Kudi kitobo umo wa Yehova wikele mu tumikuna twa mu Yudea, kubwipi na Yelusalema, dijina dyandi i Zakadiasa. Pano, aye ne wandi mukaji Edisabeta ke banunu bininge. Kebadipo na bana. Zakadiasa udi mu tempelo ya Leza mu Yelusalema, i kyandi kyaba kya kwingila mingilo ya bu kitobo. Amba atale, Ngabudyele wamumwekela dya ku lundyo lwa madabahu a binunka biya.

Zakadiasa wakwatwa moyo bininge. Ino Ngabudyele wamutūkija mutyima, amba, “Zakadiasa, kokikwatwa moyo, mhm, ke-luntu lulombelo lobe lubaumvwanwa ne obe mukaji Edisabeta ukakubutwila mwana, ino ukamwinikako dijina dya bu-Yoano.” Ngabudyele wamusapwila kadi amba Yoano “ukēkalanga mukatampe ku meso a Yehova,” ne amba ‘ukateakenyanga Yehova muzo mulongololwe.’

Ino Zakadiasa kebitabijepo. Umona bu kebikibwanikapo aye ne Edisabeta kubutula mwana, mwanda ke banunu. Penepo Ngabudyele wamusapwila’mba: “Nanshi monapo kadi byōkēkala kamama wakubulwa kunena pa kukunga dyuba dya mo bikamwekelapo bino’bi, ke-wi-muntu kwitabijepo myanda yami, mhm.”

Abo bantu bashele panja papo beipangula i kika kyaijija Zakadiasa mu tempelo. Ku mfulo watambila panja, ino kutupu kadi kunena’ye, kaebapapa’nka makasa, nabo abayuka amba wadi wamone kintu kampanda kekimonwanga.

Zakadiasa wapu kyaba kyandi kya mingilo ya mu tempelo, wajokela ku njibo. Kitatyi kityetye pa kupita’po—Edisabeta waimita! Pano Edisabeta utengele kubutula mwana, i mwitolwele pafula, ku njibo, kulampe na bantu mu bula bwa makweji atano.

Mwenda mafuku, Ngabudyele wafika monka. Lelo wisamba na ani? Na nkungakaji umo utelwa bu Madia, wa mu kibundi kya Nazala. I musapu’ka wamusapwila pa kino kitatyi? Teja! “Ubapebwako katōkwe kudi Leza,” ye Ngabudyele usapwila Madia. “Kabidi talapo, byōkēmitapo mwana munda, ukabutulapo mwana, mwana-mulume, ino ukamwinika dijina dya bu-Yesu.” Ngabudyele wabweja’ko amba: “Aye nanshi ukekalanga mukatampe, ukatelwa dya bu-Mwana [wa Mwinemukatakatamwine], . . . ukabikadila mu njibo ya Yakoba nyeke, kadi bwandi bulopwe bukabulwa mfulo.”

Ngabudyele wasepelela bininge pa kufikija ino misapu. Shi tutange myanda mikwabo mivule itala padi Yoano ne Yesu, tusa kumona patōkelela buluji bunenenwa amba ino misapu mitambe mūlu idi na mvubu mikatampe. 2 Temote 3:16; Luka 1:5-33.

▪ I misapu’ka ibidi ya mvubu itambile mūlu?

▪ I ani uletele ino misapu, ne i mituminwe bāni?

▪ Mwanda waka i kikomo kwitabija ino misapu?