Edisabeta Wabutula Mwana

Mumbu ya Yelusalema pa kupwa kūbakululwa, pāpityile myaka 400, kitobo umo witwa bu Zekadia ne wandi mukaji Edisabeta, bākashikata kubwipi na kino kibundi kya Yelusalema. Bādi ke beje myaka mivule mu kwisonga, inoko kebādipo na mwana nansha umo. Difuku dimo, Zekadia paādi ulambula ensense mu kipandulwe kya tempelo, mwikeulu Ngabudyele wāmumwekele. Zekadia wāzakele, inoko Ngabudyele wāmunena’mba: ‘Kokikwatwa moyo. Nakuletela musapu muyampe utamba kudi Yehova. Obe mukaji Edisabeta, usa kubutula mwana mwana-mulume, ukamwinika bu Yoano. Yehova i mutonge Yoano mwanda wa mwingilo umo wa pa bula.’ Zekadia wāmwipangula’mba: ‘Mbwanya’tu kwibitabija namani? Ami ne wami mukaji ketudi banunu bininge pa kubutula.’ Ngabudyele wāmunena’mba: ‘I Leza wauntuma kukusapwila uno mwanda muyampe. Nanshi byokwitabije’byopo, usa kwikala wampikwa kunena kufika ne bikabutulwa mwana.’

Zekadia wāijije bininge mu kipandulwe, kupita mafuku onso. O mwanda paātambile’mo, bantu bādi bamwilaije panja bāsakile kuyuka byamutana. Zekadia kādipo ubwanya kunena na kyakanwa. Wādi unena’nka na kujinya makasa. Kupwa, bantu bājingulula’mba Zekadia i mutambule musapu utamba kudi Leza.

Mwenda mafuku, Edisabeta wāimita dīmi, kupwa wābutula mwana mwana-mulume, monka mwānenene’kyo mwikeulu. Balunda ba Edisabeta ne babutule bandi bāile kumona mwana wa lukeke. Bāsangele bininge. Penepo Edisabeta wēbasapwila’mba: ‘Tusa kumwinika bu Yoano.’ Nabo bāmunena’mba: ‘Mu kyenu kisaka i mutupu muntu wa dijina dya bu Yoano. Mwinikei bu Zekadia, dijina dya shandi.’ Inoko Zekadia wālemba amba: ‘Dijina dyandi i Yoano.’ Ponka na ponka, Zekadia wāanza kunena monka! Myanda ya uno mwana yāyukene mu Yudea monso, bantu kebēipangula’mba: ‘Le bine uno mwana ukekalanga namani?’

Kupwa, Zekadia wāyulwa mushipiditu ujila. Wānena bupolofeto amba: ‘Yehova atendelwe. Wālaile Abalahama amba ukatuma Meshiasa, mupandiji wa kwitukūla. Yoano ukekala mupolofeto wa kuteakenya Meshiasa dishinda.’

Kadi Madia, mwanabo na Edisabeta, nandi wātenwe na mwanda utulumukwa. Uno mwanda tusa kwiuyuka mu kifundwa kilonda’ko.