Shapita 3

Mulongolodi wa Dishinda Wabutulwa

EDISABETA kadi kubwipi na kubutula mwana. Madia washikata nandi makweji asatu. Pano kitatyi kibabwana kya kwibashadika, Madia wakute lwendo lulampe lwa kujokela kwandi ku Nazala. Nandi usa kubutula mwana kupwa kwa myeji isamba.

Aye Madia utaluka’tu wenda, Edisabeta nandi ubutula. I nsangaji mikatampe kashāa, mwanda wabutula biyampe, ba Edisabeta ne mwana i bakomo! Edisabeta pa kulombola uno mwana wa lukeke ku bakwabo ne ku balongo bandi, bonso abasangala nandi pamo.

Mungya Bijila bya Leza, mwana mwana-mulume yense ubutulwa mu Isalela, ufwaninwe kutwejibwa kwisao mu difuku dyamwanda kupwa kwa kubutulwa kwandi. Balunda ne balongo babo abaiya kwibapempula mu dino difuku. Abanena amba mwana ufwaninwe kwinikwa bu Zakadiasa, dijina dya shandi. ‘Dyadyo ke adyopo,’ ye Edisabeta utentulula, ino “dyandi i Yoano.” Vuluka, dino dijina dyo dyanene mwikeulu Ngabudyele amba dyo dikenikwa uno mwana.

Ino balunda nabo abapele, amba: “Ku bulongo bobe kutupu’ye wakwinikwa dyadyo dijina, nansha umo.” Abaipangula shandi na biyukeno dijina dyasaka kwinika uno mwana. Zakadiasa walombe kalubao ka kulemba’po, wasoneka’mba: “I Yoano dyo dyandi dijina,” bantu bonso abatulumuka.

Ponka’po diwi dya Zakadiasa dibajikuka mu kingelengele. Vuluka amba Zakadiasa wajimije bukomo bwa kunena kitatyi kyaapelele kwitabija myanda yamusapwidile mwikeulu amba Edisabeta ukabutula mwana. Zakadiasa pa kushilula kunena, bekalwa nabo bonso abatulumuka, kebeipangula abo bene amba: “Lelo bino bīne kano kāna kano kakēkalanga namani?”

Pano Zakadiasa wayulwa mushipiditu sandu, katendela’mba: “Dyese dyobe abe Yehova, abe Leza wa Isalela, ke-wi-muntu ubapempula bantu bobe, ubebasokwela bukūdi. Kadi wakwitutalwila lusengo lwa bupandiji monka mu njibo ya mwingidi wandi Davida.” Kyabine, luno “lusengo lwa bupandiji” i Mfumwetu Yesu, wadi kabutwilwe. Zakadiasa kanena amba kupityila kudi aye, Leza “etupe twikale komononwapo ku dikasa dya bakwitushikwa, amba tumwingidile kwa kubulwa moyo, umbu-ujila ne umboloke ku meso andi mafuku onso a bwetu būmi.”

Kupwa Zakadiasa kanena mukekadila wandi mwana Yoano, amba: “Ebiya abe mwana, nobe ukatelwa bu-mupolofeto wa Wamūlumwine. Ke-wi-muntu ukatangidila kumeso a Yehova kumulongolwela mashinda. Kupana ku bandi bantu kuyūkidija kwa bupandiji mu kulekelelwa kwa myanda yabo. Mu mwanda wa mutyima wa lusa lwa Leza wetu, monka mu kutamba mūlu dyuba misanya ditusaminapo. Kutōkejapo boba bashikatanga mu fukutu ne mu mujiñininya wa lufu, kupityija mu maulu etu monka mu dishinda [dya ndoe].”

Mu kino kitatyi, Madia nkungakaji wa bene, ke mufike kala mwabo mu Nazala. Lelo i kika kisa kumufikila pa kuyukana’ye amba waimita dimi? Luka 1:56-80; Levi 12:2, 3.

▪ Yoano ukudīle Yesu ku myeji inga?

▪ I kika kyalongeka pabwanya Yoano mafuku mwanda?

▪ Leza wavuluka bantu bandi muswelo’ka?

▪ I mwingilo’ka wābadikile kunenwa usa kuvuija Yoano?