Shapita 15

Kingelengele Kibajinji kya Yesu

KE PAPITE difuku dimo nansha abidi bitupu tamba ba Andele, Petelo, Yoano, Fidipa, Natanela, pakwabo ne Yakoba, bekala ke bana-babwanga babajinji ba Yesu. Pano abakute lwendo kebenda kwabo kobatambile, mu bulolo bwa Ngadilea. Benda ku Kena, ku kibundi kwa ba Natanela, kidi mu ngulu kubwipi na Nazala, kwatamine Yesu. Betyilwe ku masobo a butundaile mu Kena.

Madia inandya Yesu nandi i mwiye kutanwa ku buno butundaile. Byadi mulunda na kisaka kya betundaila, kimweka bu ubadilwa mu boba bakitakita na betwa. Papo wamone amba kubabulwe kintu kampanda, kepejijepo, wasapwila Yesu amba: “Kebadipo na vinyu.”

Kunena na bubine, Madia usapwila Yesu namino mwanda wa akimbe muswelo wa kusokola’ko vinyu, dibajinji Yesu wekaka. “Le ami ne abe tudi nobe namani?” ye Yesu wipangula inandi. Byadi Mulopwe utongelwe na Leza, mwingilo wandi keufwaninwepo kuludikwa na ba mu kyabo kisaka nansha na balunda nandi. Madia waikala’po na tunangu, washiye myanda yonso mu makasa a mwanandi, wasapwila’nka boba bakitakita na mingilo amba: “Kyonso kyākemunena kalongei’[k]yo.”

Eyo, padi milondo mikatampe isamba ya mabwe, mulondo umo ukokeja kuyūla maditele 40 ne musubu. Yesu wanena boba bengila’mba: “Yujai mema mu milondo.” (MB) Bengidi abayūja’yo bāa ne pa milomo. Kupwa Yesu wanena’mba: ‘Pano tapulai’mo amo, mukatūdile mutangidiji wa masobo.’

Mutangidiji waana buya bwa ino vinyu, kayukilepo amba i milupulwe mu kingelengele. Waite musoñañani kamusapwila’mba: “Bantu bonso babadikilanga bidi kusokola vinyu mikambe kulumbuluka nakampata, bantu batomatome-ē, ebiya nansha ke basokola milumbuluke’tu nabya, ino abewa ukibīkile vinyu mikambe kulumbuluka ne pano.”

Kino kyo kingelengele kibajinji kya Yesu, bandi bana-babwanga bapya pa kwikimona, lwitabijo lwabo lubaninge. Kupwa, aye pamo ne inandi ne banababo, abataluka kebenda ku Kapanama kubwipi na Dijiba dya Ngadilea. Yoano 2:1-12.

▪ Butundaile bwa mu Kena bubalongeka kitatyi’ka mu mwingilo wa Yesu?

▪ Mwanda waka Yesu wadi weshisa ku mulangwe wadi umupele inandi?

▪ I kingelengele’ka kyalonga Yesu, ne kibalonga kika ku bakwabo?