Shapita 20

Kingelengele Kyabubidi Aye Ukidi mu Kena

YESU wajokela mu mwaba wabo pa kupwa kwa busapudi bukatampe mu Yudea, ino ke mwandapo wa kukokolokwa, ehe. Pano washilula busapudi bukatampe mu Ngadilea, kibundi mwatamine. Ino bandi bana-babwanga, pa kyaba kya kushikata nandi, abo abajokela mu bisaka byabo, kebengila mingilo yobadi bengila kala.

I musapu’ka washilula kusapula Yesu? I uno: “Bulopwe bwa Leza nabo bubafwenenena pa bwipi, alamukai pa mityima, mwitabijei myanda-miyampe.” Lelo abalondolola namani? Bene Ngadilea abatambula Yesu. Watundailwa bya bulēme na bantu bonso. Inoko ke pa mwandapo wa musapu wandi, i pa mwanda bavule umbukata mwabo baile ku masobo a Pashika mu Yelusalema, pano kepadi myeji, bamwene biyukeno bikatampe byaalongele.

Bimweka bu Yesu i mushilule mwingilo wandi mukatampe wa mu Ngadilea mu Kena. Uwavuluka, dibajinji paatambile mu Yudea, waalamwine mema ke vinyu ku butundaile bwa mu Kena. Mu uno musunsa wabubidi, mwanā mulungu umo, ntyikala wa Mulopwe Heloda Antipese, ubela bikomo. Uno ntyikala pa kwivwana amba Yesu watambe mu Yudea kaenda mu Kena, wakute lwendo lutuntulu utamba ku yandi njibo ku Kapanama, wafika kudi Yesu. Mutyima mumutumbuke mulume nobe, kalombe Yesu amba: “Bāyepo bidi, bakañundapile mwana, ke-muntu kadi pa bwipi ponka ne kufwa.”

Yesu wamulondolola’mba: ‘Jokela kobe, obe mwana wabeluka!’ Uno ntyikala wa Heloda waitabija, wakute monka lwendo ne bula kajokela kwandi. Wasambakana bandi bengidi mu dishinda baile kumutundaila, lubilo lonka abamusapwila’mba myanda yonso idi biyampe—wandi mwana wabeluka! Webepangula: ‘Le i nsaa’ka yaaivwene biyampe?’

‘I kesha kyolwa pa nsaa imo,’ bo abo bamulondolola.

Uno ntyikala wayuka’mba i enka pa nsaa yamusapwidile Yesu amba: ‘Obe mwana wabeluka.’ Ponka’po, uno mukelenge ne kisaka kyandi kyonso kituntulu ke bana-babwanga ba Kidishitu.

Enka namino, Kena ke kifuko kyeselwe, mwanda Yesu walongela’mo bingelengele ke bibidi, biyukanya kujoka kwandi mu Yudea. Kunena na bubine, Yesu kalongelepo enka bino bingelengele kete, ino bino byo bidi na mvubu mikatampe mwanda bilombola kujoka kwandi mu Ngadilea.

Pano Yesu kaenda ku yabo njibo ku Nazala. I kika kimutengele’ko? Yoano 4:43-54; Mako 1:14, 15; Luka 4:14, 15.

▪ Pajokela Yesu mu Ngadilea, i kika kyabala bandi bana-babwanga, ne bantu abamutambula namani?

▪ I kingelengele’ka kyalonga Yesu, ne boba bamwenine’mo kamweno abalonga’po kika?

▪ Kena waikala namani ke kifuko kyeselwe na Yesu?