Shapita 22

Bana-Babwanga Baná Abaitwe

YESU wapande mu kyakanwa kya lufu mwabo monka mu Nazala, wataluka kaenda ku Kapanama kubwipi na Dijiba dya Ngadilea. Kino kibafikidija bupolofeto bukwabo bwa Isaya. Bobwa bwānene amba bene Ngadilea ne boba bashikete kubwipi na dijiba bakamona kitōkeji kikatampe.

Yesu wenda wingila mwingilo wandi wa kitōkeji wa busapudi bwa Bulopwe kwine kuno’ku, watana’ko bandi bana-babwanga baná. Bano’ba badi kala benda na Yesu pamo mu mafuku a kunyuma, ino baikele kujokela mu mwingilo wabo wa buluwe bwa mishipa pobadi batamba nandi ku Yudea kobaendele. Bimweka amba pano Yesu wadi wibakimba, mwanda kitatyi kibabwana, kasake bakwashi ba kwikala nandi lonso, bandi ba kufundija mwa kushadila kwendeleja mwingilo shi aye waenda.

Papo Yesu wenda ukunkuja ku mbadi ya dijiba, wamone Shimona Petelo ne bapwani nandi bakenda makonde abo, webafwena. Wakanda mu bwato bwa Petelo, wamusapwila ashindulule’bo ku nkula. Abaeja mwijiba bityetye, Yesu washikata mu bwato kafundija bantu badi ku mbadi.

Kupwa Yesu wasapwila Petelo’mba: “Shind[ul]wila pa mema malampe, katei makonde enu, mwita upyemo.”

‘A Mufundiji,’ ye Petelo umulondolola, “bufuku bonso tubēbīkabīkako kwabulako nansha umo mpika, nanshi pa kinenwa kyobe nkaté bukonde.”

Pa kwikija bukonde, mubapi mishipa mivule mpata, bukonde kebusanyika ne kusanyika. Bukidibukidi bonka, abadyobola bakwabo badi mu bwato bungi bāye bebakwashe’ko. Ponka na ponka ne mato mene nao abayūla mishipa mivule bā, keasake ne kulobela. Petelo pa kumona namino, wafukata ku meso a Yesu, kanena’mba: “Bamfunduke abe Mfumwami ke-ne-muntu ami ne kipya-mambo.”

“Kokikwatwa moyo,” ye Yesu umulondolola. “Kushilwila pano ukēkalanga kuloba bantu [bōmi].”

Yesu waite ne Andele, mwanabo na Petelo. “Nondei bidi,” ye Yesu wibasoñanya, “nami nkemwalamunanga ke mudi biluwe bya bantu.” Babiluwe bakwabo, ba Yakoba ne Yoano, bana ba Zebede, abaitwe muswelo umo onka, nabo abaitabija pakubulwa kushishikita. Penepo bano bakelenge baná abaleka mwingilo wabo wa kuta mishipa, ke balondi baná babajinji ba Yesu, bandi ba lonso. Luka 5:1-11; Mateo 4:13-22; Mako 1:16-20; Isaya 9:1, 2.

▪ Mwanda waka Yesu waite bandi bana-babwanga bamulonde, ne abo bene i bāni?

▪ I kingelengele’ka kyazakaja Petelo?

▪ Yesu waite bandi bana-babwanga bekale babiluwe ba bika?