Bana ba Bwanga Baná ke Babiluwe ba Bantu

Bantu ba mu Nazala abakimbe kwipaya Yesu, nandi wanyemena ku kibundi kya Kapanama, kubwipi na Dijiba dya Ngadilea ditwa ne bu “dijiba dya Ngenesaleta.” (Luka 5:1) Kino kibafikidija bupolofeto bwa mu mukanda wa Isaya bwa amba bantu ba Ngadilea badi ku dijiba bakamona kitōkeji kikatampe.—Isaya 9:1, 2.

Kuno ku Ngadilea, Yesu waendelela na kusapula amba “Bulopwe bwa mūlu bubafwena pabwipi.” (Mateo 4:17) Yesu watana bandi bana ba bwanga baná. Badi nandi mafuku kunyuma, ino pobajokele na Yesu kutamba ku Yudea, bajokela ku mingilo yabo ya buluwe. (Yoano 1:35-42) Ino pano ke kitatyi kya kwikala na Yesu kitatyi kyonso mwanda wa ebafundije mwa kuvuijija mwingilo shi aye waenda.

Yesu paenda ku mukunkujo wa dijiba, wamone Shimona Petelo ne mwanabo Andele, ne bapwani nabo bata makonde abo. Yesu waenda kobadi ne kukanda mu bwato bwa Petelo, ne kumunena ashinwine bityetye bwato pa ngeya. Byobasonsoloka bityetye na ku nkula, Yesu washikata kafundija bibumbo bibungīle ku nkula bubine butala pa Bulopwe.

Kupwa Yesu wanena Petelo amba: “Enda dya pa mema malampe, mute makonde enu musa kukwata.” Petelo walondolola’mba: “A Mufundiji, tubakambe bufuku bonso butuntulu ino kukwata kantu mpika, inoko byowanena nankyo, nsa kuta makonde.”—Luka 5:4, 5.

Abo pa kuta makonde abakwata mwita mungi makonde keasanika ne kusanika! Bukidi bonka abaite bakwabo badi mu bwato bwa kubwipi bāye bebakwashe’ko. Na pano kala, mato onso abidi abayula mwita bā, mwita pa kulēma mato keakimbe kulobela. Petelo pa kumona kino, wapona ku meso a Yesu kanena’mba: “A Mfumwami, nsonsoloke’po, mwanda ami ne muntu wa bubi.” Yesu wamulondolola’mba: “Leka kwivwana moyo. Tamba pano ukakwata bantu bōmi.”—Luka 5:8, 10.

Yesu wanena ba Petelo ne Andele amba: “Iyai munonde, nkemwalamunanga ke mudi babiluwe ba bantu.” (Mateo 4:19) Mu bawaita, mudi ne babiluwe bakwabo ba lui babidi, ba Yakoba ne Yoano, bana ba Zebede. Nabo abaitabija pampikwa kulejaleja. Mu uno muswelo, bano bantu baná abaleka mingilo yabo ya buluwe ke bana ba bwanga babajinji kulonda Yesu kitatyi kyonso.