Shapita 27

Kwitwa kwa Mateo

KINONDANONDA na kundapa wabulebe, Yesu watambe mu Kapanama kaenda ku Dijiba dya Ngadilea. Kadi bibumbo bya bantu bibamulonda lubulubu, nandi washilula kwibafundija. Pa kwenda kumeso, wamone Mateo, witwa ne bu Levi, ushikete pa bilo bya musonko. Yesu wamwite amba: “Nonde.”

Bimweka bu Mateo ke muyuke kala bufundiji bwa Yesu, pamo’nka na mwadi muyukile’bo ba Petelo, Andele, Yakoba, ne Yoano kitatyi kyobaityilwe. Mateo waitaba ku lwito bukidibukidi bonka, pamo’nka bwa mobaitabile abo. Waimana, washiye twaji twandi twa bu musonkeji wa musonko, kalonda Yesu.

Kupwa papo, Mateo wasoba masobo makatampe mu njibo yandi, kepabulwe padi wasobela’o kwitwa kwandi. Yesu ne Bandi bana-babwanga abatanwa’po, kutentekela’po ne boba badi balunda na Mateo, nabo badi ponka. Bano bantu bafutululwanga mpata na bakwabo Bayuda, mwanda basonkejanga musonko wa balupusa bene Loma bobashikilwe. Ne kadi badimbanga bantu, bebalomba lupeto lupite pa kibalwa kya musonko kitungilwe.

Bafadiseo abamone Yesu ku ano masobo na bano bantu, kebepangula bandi bana-babwanga’mba: “Lelo bika Mufundiji wenu kyādila ne basonkeja-musonko ne babipya-mambo?” Yesu waivwana kino kipangujo, walondolola Bafadiseo amba: “Bakomo kebadipo ne kyo basakila ñanga poso bakubela. Nanshi endai bidi mukafundijibwe ñeni mwendele kinenwa kino’mba: Nsaka walusa, ke wakuleta kyonka kitapwa, mhm. Ke-ne-muntu ami nkyaīdile kwita bakoloka, mhm, poso babipya-mambo.”

Bimweka bu Mateo wityile bano basonkeji ku yandi njibo amba nabo bevwane Yesu ne bondapibwe kumushipiditu. O mwanda Yesu washikata nabo mwanda wa kwibakwasha basambe kipwano kiloe na Leza. Yesu kafutulwilepo bantu ba namino, pamo na mwibafutulwila Bafadiseo bemwene bu boloke. Ino, pa lusa lwandi, welombola kobadi bu muñanga wa kumushipiditu.

Ino lusa lwafwila Yesu babipya-mambo kelushintululapo amba wasūla bubi bwabo, mhm, ino walombola mutyima wa kanye kobadi pamo’nka na mwamwena yewa udi na misongo ya kungitu. Kifwa, vuluka mwaaolwedile kuboko bya lusa kudi wamakopo, wamutenga, amba: ‘Nswele. Pwibwa.’ Netu tulombolei mutyima wa kanye na kukwasha bantu basakilwa bukwashi, nakampata kwibakwasha mu bintu bya kumushipiditu. Mateo 8:3; 9:9-13; Mako 2:13-17; Luka 5:27-32.

▪ I kwepi kudi Mateo kwamumona Yesu?

▪ Mateo wingilanga kaji’ka, ne mwanda waka bantu ba uno muswelo bafutululwanga na Bayuda bakwabo?

▪ I mwanda’ka obatopeka Yesu, nandi walondolola muswelo’ka?

▪ Mwanda waka Yesu wilunga pamo na babipya-mambo?