Shapita 85

Ukimba Bajimine

YESU wikwete’ko na kukimba bantu ba kwingidila Leza na kwityepeja. Pano ukimba kusapwila muntu ye-yense myanda ya Bulopwe, kubadila’mo ne babipya-mambo ba mu meso fututu. Pano bano bantu abamufwena kebamuteje.

Bafadiseo ne basonekeji pa kumona namino, kebazawila Yesu amba mwanda wapwana na bantu bobamwene bu bakubulwa kufwaninwa. Kebeuninga’mba: “Uno nanshi ūngwijanga babipya-mambo udya ne nabo.” Mobamwena, kulonga namino i kwipwa bulēmantu mpata! Bafadiseo ne basonekeji bamwene bantu bitupu bu luvumbi lwa mu binyantyilo byabo. Bine, bengidijanga kishima kya mu Kihebelu ‛am ha·’aʹrets, “bantu ba panshi [ba pano pantanda],” mwanda wa kulombola nkenye yobadi nayo pa bantu ba uno muswelo.

Ino aye Yesu koku ukwete muntu ye-yense na bulēmantu, na kanye, ne kisanso. O mwanda batupwaipwai, ne bantu bayukene bu bankuma-bibi abaiya, bafwila kumwivwana. Ino bidi namani na bano Bafadiseo bazawila Yesu ulonga buninge bwa kukwasha boba bobamona bu bantu bakubulwa kufwaninwa?

Yesu webatentulula pa tufutululo twabo na kuleta’po kyelekejo. Kanena mungya milangwe ya Bafadiseo bemwene bu boloke ne bu bantu badi na ndoe mu kipombo kya Leza, ino bakwabo’ko ba ‛am ha·’aʹrets bo bobamona bu bashinananwa, babomboke, bantu bajimine. Ivwana mwaipangwila:

“Lelo shi muntu po mudi’po udi ne mikoko katwa, kumujimine umo, abulwe kushiya yoya makumi kitema ne kitema idya mu lumenya, kaenda kukakimba owa mujimine poso’nka ne byakeumona? Pa kwiumona, kasangala weusela pa bipuji, wajokela kwandi, waita balunda nandi ne bekadi nandi kaebanena’mba: ‘Tusangalei, mwanda namone mukoko wami wajimine.’” (MB)

Kupwa Yesu waleta buluji bwine bwa kifwa kyaletele, amba: “Ino nemusapwila’mba: I enka namino kusepelela kukēkalanga mūlu pa umo kipya-mambo wakwalamuka pa mutyima mukile ne boba boloke makumi kitema ne bantumo kitema bakubulwa ne kyo basakila kwalamuka pa mutyima.”

Bafadiseo bemwene bu boloke ba bene, kebamwenepo kyobālamukila pa mutyima. Pobafutulwile Yesu mu myaka ya kunyuma’mba udyanga na basonkeji ba musonko ne babipya-mambo, aye webalombwele’mba: “Ami nkyaīdile kwita bakoloka, mhm, poso babipya-mambo.” Bafadiseo bemwene bu boloke, kebamwene kyobālamukila pa mutyima, kebaletelepo nsangaji nansha patyetye mūlu. Ino babipya-mambo baalamuka pa mutyima binebine bo baleta’mo nsangaji.

Yesu waleta’po kyelekejo kikwabo kyonka kikomeneja amba kwaluka kwa babipya-mambo i mwanda uleta nsangaji mpata. Kanena’mba: “[Le i] mwana-mukaji’ka? wakwikala ne ndalama dikumi, shi pamujimine lumo abulwe kōkeja kinanu, kakombe mu njibo, ukimbidila monso poso ēlumone. Ino pa kwilumona wakongakanya bāna-bakaji bakwabo, ne bangi bashikatanga nabo kēbanena’mba: Sepelelai nami bidi, ke-pantu namone kyokya kyanjimine.”

Kupwa Yesu waleta’po buluji bumo bonka. Amba: “Ino nemusapwila’mba: I enka namino kusepelela kukāya kumeso a bamwikeulu ba Leza pa umo kipya-mambo wakwalamuka pa mutyima.”

Bine, kuno kupīpidila na buswe kupīpidile bamwikeulu ba Leza ku kujoka kwa babipya-mambo badi bajimine i kukatampe mpata! Bapīpidile’ko nakampata mwanda bano batupwapwani, ba ‛am ha·’aʹrets badi bajimine basa kubadilwa mu boba bakekala mu Bulopwe bwa Leza bwa mūlu. Papo bakekala pa ditabula dizunzulwe momwa mūlu kupita ne pa dya bamwikeulu bene! Bamwikeulu abo i bayuke kwityepeja, pa kyaba kya kukwatwa mukao nansha kwimona bu bapēlulwe, ino batendelanga pa kumona bano bantu babipya-mambo badi bekonda na ino ngikadilo ya umbūmi abeinekenya, kuno kunekenya kwabo ko kwibakumbanyanga mwa kukengidila bu balopwe ne bu babitobo ba lusa ne kanye momwa mūlu. Luka 15:1-10; Mateo 9:13; 1 Kodinda 6:2, 3; Kusokwelwa 20:6.

▪ Mwanda waka Yesu wapwana na babipya-mambo bayukanike, ne i tufutululo’ka tumufutulula Bafadiseo?

▪ Bafadiseo bamonanga bantu bitupu namani?

▪ I byelekejo’ka byaleta Yesu, ne i bufundiji’ka botukokeja kwifundila’ko?

▪ I kika kinenenwa’mba kusepelela kwa bamwikeulu i kukatampe mpata?