Shapita 29

 Kwingila Mingilo Miyampe mu dya Sabado

TUDI ku muketeko wa mu 31 K.K. Ke papite myeji mityetye tamba pesambile Yesu na mwana-mukaji ku mushimwa mu Samadia, paadi utamba ku Yudea wenda ku Ngadilea.

Pano, kupwa kwa kufundija mu Ngadilea monso, Yesu wataluka kaenda dikwabo ku Yudea kukasapula mu mashinakoka. Shi tudingakanye na munenena Bible pa mwingilo wingile Yesu mu Ngadilea, i myanda mityetye’tu inenenwe pa mwingilo wandi mu Yudea mu buno bupempudi ne waingile mu myeji yalēle’mo kupwa kwa Pashika wapityile. I kimweke patōka amba mwingilo wandi kebeusangedilepo biyampe mu Yudea pamo na mobeusangedile mu Ngadilea.

Kepejijepo, Yesu kaenda ku Yelusalema, kibundi kikatampe mu Yudea, ku Pashika wa 31 K.K. Kwine kuno, kubwipi na Kibelo kya Mikōko kya kibundi, kudi kyumbu kyobatela mu Kihebelu bu Beseda, kwiyanga babela bavule, bampofu ne babilemafu. Bakulupile amba muntu yense utokena mu mema kitatyi kyoatenkanibwa ukokeja kubeluka.

I mu dya Sabado, Yesu wamone muntu ubela kubwipi na kyumbu, ke mulāle na misongo myaka 38. Yesu pa kuyuka buvule bwa myaka yalāla uno mukelenge na misongo, wamwipangula’mba: “Lelo usaka bukomo’ni?”

Walondolola Yesu amba: “Abe mfumwami, nkidipo na muntu wa kungikija mu kyumbu pa kutenkana mema, ke-ne-muntu ami pakwiya ungi waunkala kumeso.”

Yesu wamunena amba: “Languka ushikune butanda bobe, wende.” Ponka’po uno muntu wakomenena umbidyoma, watekuna ne butanda bwandi kaenda!

Ino Bayuda abamumone, kebamunena’mba: “Dyalelo dino’di i dya Sabado, kediswelwe uselamo butanda bobe, kijila.”

Nandi webalondolola’mba: “Wauñundapa uno ye waunena’mba: Tekuna butanda bobe, wende.”

“Le i muntu’ka, wakunena nankyo amba: Shikuna ne butanda bobe wende?” bo abo bamwipangula. Yesu wetolwela ku mpenga mwanda wa kibumbo, ino yewa ubelwilwe kayukilepo dijina dya Yesu. Inoko, kyaba pa kupita’po, Yesu ne uno muntu abetana mu tempelo, uno muntu wayuka yewa umubelwile.

Penepo mubelulwa waenda kudi Bayuda webasapwila amba i Yesu wankomeja. Bayuda pa kwivwana nabya, abaenda kudi Yesu. Lelo kyendelo i kika? Le abaendela kuyuka kutamba bukomo bwalonga nabo bintu bya nkuo’ni? Ehe. Bakimba kukamutuluja, amba mwanda’po walonga bino bintu biyampe mu dya Sabado. Abashilwididila ne kumupangapanga! Luka 4:44; Yoano 5:1-16.

▪ Tamba pa bupempudi bwa Yesu bwamfulo mu Yudea, kepadi mafuku anga?

▪ Mwanda waka kyumbu kitelwa bu Beseda i kitumbe mpata?

▪ I kingelengele’ka kyalonga Yesu ku kino kyumbu, ne Bayuda abalonga’po kika?