Shapita 26

Wajokela mu Kapanama

PANO Yesu waenda ntumbo pi na pi, bantu bavule kebenda bamulonda konso kwashikata. Inoko, mafuku matyetye pa kupita’po, wajokela ku Kapanama lwa Dijiba dya Ngadilea. Bukidi bonka, mwanda uwasambakana mu kibundi amba wajokela kwabo, bavule abamulonda ku njibo kwashikete. Bafadiseo ne bafundiji ba Bijila abatambe kulampe, kisengele ne ba ku Yelusalema.

Kibumbo i kikatampe, kibajike ku kibelo, kekukidipo ukibwanya kutwela munda. Pa kino kyaba pabalongeka mwanda mukatampe mpata. Uno mwanda walongeka pa kino kyaba udi na mvubu mikatampe, mwanda wituyukija amba Yesu udi na bukomo bwa kufundula kileta misongo ya bantu ne kupa muntu yense watonga bukomo mu ngitu.

Aye Yesu ukifundija kibumbo, bana-balume baná abaleta wabulebe bamuselele pa kitalu. Basaka Yesu abelule mulunda nabo, ino abakomenwa mwa kutwelela munda mwanda wa kibumbo. Bibebapu bunwa! Ino kebalekele’byopo. Abakanda pa musaka, abasabe’po dipunzu, abatūkijija’po kitalu kilēle’po wabulebe, tululū ne padi Yesu.

Lelo Yesu wakalabala amba bankalakanya? Ehe! Ino aye mwine utulumuka’ko lwitabijo lwabo. Wasapwila wabulebe’mba: ‘Bubi bobe bubakulekelwa.’ Ino lelo bine Yesu ukokeja kulekela ba bubi? Bafadiseo ne basonekeji kebalangapo nankyo. Bafwatakanya mu mityima yabo amba: “Lelo uno nandi i kika kyānenena nenki? Nanshi utukanga Leza! Lelo i ani uyūkile kulekela[ñana bubi], poso Leza enka?”

Yesu wayuka milangwe yabo, webanena’mba: ‘Lelo i bika byomupatenya nankyo munda mwenu? Lelo nanshi kipēlele’po kunena i kika, i kunena uno ubela bulebe amba: Bubi bobe bubakulekelwa’ni, nansha’ko i kunena’mba: Languka, tekuna kitalu kyobe wende?’

Papo Yesu wape kibumbo, ne bamufutulula bene kumo, kyaba kya kumona kintu kya nkuo kilombola amba udi na lupusa lwa kulekela ba bubi pano pantanda ne amba aye ye muntu mukatakata wa kasha ne kashele. Wavundamukila kudi wabulebe, wamunena’mba: ‘Būka, utekune kitalu kyobe, wende ku njibo yobe.’ Waimana ponka na ponka, watekuna kitalu kyandi kaenda, bantu bonso bamumwene! Bantu ababezemuka, kebatendela Leza amba: “Ketwekimwenepo kasha, kya kudingakana pamo na kino.”

Lelo ubajingulula’mba Yesu watela kukwatañana kudi pa bubi ne misongo, kulekelwa kwa bubi ne kwalujibwa bukomo mu ngitu? Bible ushintulula’mba mbutwile wetu umbajinji, Adama wālubile, ebiya batwe bonso twi bapyane byamalwa bitamba ku buno bubi, kifwa misongo ne lufu. Ino mu Bulopwe bwa Leza, boba bonso basenswe Leza ne bamwingidila, Yesu ukebalekela bubi bwabo, ebiya misongo yonso ikafundulwa’ko. Bine bikekalanga bilumbuluke kashāa! Mako 2:1-12; Luka 5:17-26; Mateo 9:1-8; Loma 5:12, 17-19.

▪ I bika byalongeka’ko kumeso kwa kumweke mwanda wa nkuo?

▪ Wabulebe wafika kudi Yesu muswelo’ka?

▪ Mwanda waka batwe bonso twi babipya-mambo, ino i muswelo’ka watūla’ko Yesu lukulupilo lwa amba kwitulekela bubi bwetu ne kwitupa bukomo bubwaninine bwa ngitu i kintu kibwanika?