“Bubi Bobe Bubakulekelwa”

Bantu ba kulampe abaivwana myanda ya Yesu. Bangi abataluka kwabo abaiya mwanda wa kumwivwana ne kumona bingelengele byandi. Ino, kupwa kwa mafuku matyetye, wajokela mu Kapanama kitako kyandi kya mwingilo. Kujoka kwandi kubayukana kala bukidibukidi mu kino kibundi kidi ku nkunkujo ya Dijiba dya Ngadilea. Ku mfulo, bantu abaiya ku njibo kwaadi ushikete. Mu bano bantu mudi ne Bafadiseo ne bafundiji ba Bijila batambile monso monso mu Ngadilea, mu Yudea, ne mu Yelusalema mwine.

“Penepa bantu bavule bene babungakena kwine’kwa, ne kyaba kyabulwa, enka ne ku kibelo kwine, nandi washilula kwibasapwila kinenwa.” (Mako 2:2) Pano ke kulongeka kintu kitendelwa. I kintu kitukwasha tuyuke amba Yesu udi na bukomo bwa kutalula bine bilengeja masusu a bantu ne kujokeja bukomo bwa ngitu ku bonso batonga.

Yesu pafundija mu kibumbo, bantu baná abamuletela muntu wa bulebe ulēle pa kakitanda. Bakimba Yesu ondape mulunda nabo. Ino pa mwanda wa kibumbo, abakomenwa “kumufikija kudi Yesu.” (Mako 2:4) Bine abatyumukwa mutyima. Abakanda pa musaka wa njibo ne kutubula kipunzu pa matailoshi. Kupwa abatūkijija’po wa bulebe mu njibo.

Le Yesu walobe pa kumutyiba byalonga? Aa, ino watulumuka pa lwitabijo lwabo kupwa wasapwila wa bulebe amba: “Bubi bobe bubakulekelwa.” (Mateo 9:2) Ino le Yesu ubwanya bine kulekela bubi? Basonekeji ne Bafadiseo abakomeja mwanda, kebenena’mba: “Le uno muntu kyaesambila uno muswelo i kika? Utukanga Leza. Le i ani mukwabo ubwanya kulekela bubi shi ke umopo kete, Leza?”​—Mako 2:7.

Yesu pa kuyuka milangwe yabo, webanena’mba: “I kika kyomufwatakenya bino bintu mu mityima yenu? Le kipēla kutabuka i kyepi, le i kunena wa bulebe amba, ‘Bubi bobe bubakulekelwa’ni,’ i kunena’mba, ‘Imana, tekuna kakitanda kobe wende’?” (Mako 2:8, 9) En-en, Yesu ubwanya kulekela muntu bubi, kupityila ku kitapwa kyasa kupāna kumeso.

Kupwa Yesu wasapwila kibumbo, kubadila’mo ne badi bamufutulula, amba udi na lupusa lwa kulekela bubi pano pa ntanda. Waalamukila kudi wa makopo kamunena’mba: “Nakunena’mba, Imana, tekuna kakitanda kobe, wende kobe.” Ponka na ponka muntu’wa waimana, wasela kakitanda kandi kaenda bantu bonso bamumwene. Bantu ababezemuka! Kebatendela Leza amba: “Kashā ketwamwene kintu kidi namino”!​—Mako 2:11, 12.

Mubamone amba Yesu watela bubi na misongo ne kulekelwa bubi nako na bukomo bwa ngitu. Bible witufundija’mba mbutwile wetu mubajinji, Adama, wālongele bubi netu twapyana bipa bibi bilupuka ku bubi, ko kunena’mba, misongo ne lufu. Ino mu buludiki bwa Bulopwe bwa Leza, Yesu ukalekela bubi bwa boba bonso basenswe Leza ne bamwingidila. Misongo ikatalulwa’ko lonso.​—Loma 5:12, 18, 19.