Shapita 30

Ulondolola Bamutopeka

BENDEJI ba mutōtelo wa Bayuda pa kutopeka Yesu amba ujilulanga dya Sabado, webalondolola’mba: “Tata wingilanga ne pano pene ne ami nami mo monka.”

Nansha Bafadiseo byobatopeka Yesu, ino mwingilo wandi i mwishile na mingilo ijidikilwe kwingilwa mu dya Sabado. Mwingilo wandi wa kusapula ne kubelula babela i mumupebwe na Leza, kadi i mulonde kifwa kya Leza, wiwingila difuku ne difuku. Inoko malondololo andi abakalabaja Bayuda, kebakimbe kumwipaya. Mwanda waka?

Ke enkapo mwanda bedikila Yesu bu ujilulanga dya Sabado, ino kadi banena amba utukanga Leza paetela bu Mwanā Leza wandiwandī. Inoko Yesu webalondolola pakubulwa moyo mwendele kipwano kyandi na Leza. “Shandi usenswe Mwana,” ye aye unena, “kadi umulombola byonso byāubanga aye.”

Yesu waendeleja’ko amba: “Monka musangwilanga Shandi badi bafu ke bōmi, Mwana nandi i monka, ku waswile aye mwine wamusangula ke mūmi.” Kyabine, Mwana usangulanga kala bafu ba kumushipiditu! “Yewa wakwivwana wami mwanda, kumwitabija yewa wantumine,” ye Yesu unena, “nankyo udi ne būmi bwa kulādila nyeke.” Eyo, waendeleja’ko amba: “Mwaka ukāyako’wa, ne pano pene ubapu kufika, ukēvwanapo ne bafu diwi dya yewa Mwan[ā] Leza, ino abo bakēvwana nankyo bakamona būmi.”

Nansha byokekudi nsekununi ilombola’mba Yesu kasangwile mufu kasha, ino wasapwila batopekañani amba lusangukilo ludi’ko. “Kemukatendelai pa kino’ki,” ye aye unena, “mwaka wiyako’wa bonso badi mu bibundu [bivulukwa, NW] bakēvwana diwi dyandi. Ne kutamba bakatambemo.”

Kufika ne pano, Yesu kayukenye kyepelo kikatampe kyapelwe mu mpango ya Leza patōkelela’tu bivwanikwa senene. Ino bano batopekañani batopeka Yesu ke bevwane bukamoni buvule pa bino bintu, kutentekela’po ne buno bwaebalombola aye mwine. “Banwe umbatume [bantu, NW] kudi Yoano,” ye Yesu wibavuluja, kadi nandi “wēsambe byonka bya bīne.”

Myaka ibidi kunyuma, Yoano Mubatyiji wasapwidile bano bendeji ba mutōtelo wa Bayuda myanda itala Yewa wa kwiya munyuma mwandi. Pa kusaka kwibavuluja bulēme bobadi bapele Yoano ukutyilwe pano mu kifungo, Yesu webasapwila’mba: “Bānwe mwasepelele ne mutyima tō monka mu kitōkeji kyandi ku kitatyi kityutyu.” Yesu wibavuluja bino byonso na kikulupiji kya kwibakwasha, eyo, kya kwibapandija. Ino kemaninepo pa bukamoni bwa Yoano.

“Mīngilo mīne yo nguba [kubadila’mo ne ya kingelengele kyaalonga panopano] yo īsambilanga ami’mba: I Shandi wamutuma.” Ke’nkapo bino, Yesu waendeleja’ko kadi amba: “Ne Tata wantumine mwine wisambilanga’nka ami.” Leza i mulete bukamoni butala padi Yesu, kifwa, kitatyi kya kubatyijibwa kwandi, amba: ‘Uno ye wami Mwana muswedibwe.’

Kyabine, bano batopekañani batopeka Yesu kebadipo na buluji bwa kumupelela. Bisonekwa byobanena amba bebibandaulanga, byo byonka bimubingija! Yesu wafudija’mba: “Shi mwaitabije kudi Mosesa, longa nankyo mwaitabije kudi ami, mwanda aye wadi unsonekele ami. Ino shi umbulwe kwitabija mu bilembwa byandi, penepo le mukētabija namani binenwa byami?” Yoano 5:17-47; 1:19-27; Mateo 3:17.

▪ Mwanda waka mwingilo wa Yesu keujilulapo dya Sabado?

▪ Yesu walombola muswelo’ka kyepelo kikatampe kyapelwe mu mpango ya Leza?

▪ Yesu watela bukamoni bwa āni mwanda wa kusaka kulombola’mba i Mwanā Leza?