Shapita 32

I Kika Kifwaninwe Kulongwa mu dya Sabado?

KE MU dya Sabado dikwabo, Yesu wakapempula shinakoka idi kubwipi na Dijiba dya Ngadilea. Mudi muntu umo udi na kuboko kwa lundyo kūmu. Basonekeji ne Bafadiseo kebatale Yesu sō, basa kumona shi usa kumundapa. Ku mfulo abamwipangula’mba: “Lelo i kijila’ni kūndapa mu dya Sabado?”

Bendeji ba mutōtelo wa Bayuda bayukile’mba muntu ufwaninwe kundapwa mu dya Sabado enka poso būmi bwandi budi mu kyaka. Kifwa, bafundijanga amba kulunga mukupa mutyumuke nansha kukuta owa mupene mu dya Sabado i kujilula kijila. Bano basonekeji ne Bafadiseo bepangula Yesu mwanda wa kukimba pa kumutopekela.

Aye Yesu papo muyuke kala milangwe yabo. Wamone amba abapityija’byo pa kipimo mu mumweno wabo wakubulwa kukwatañana na bisonekwa obamona mingilo ijilula kijila kya dya Sabado. Mwanda wa kulangula lupata, Yesu wasapwila muntu wa kuboko kūmu amba: “Taluka, imana muno mubukata.”

Pano Yesu waalamukila kudi basonekeji ne Bafadiseo, kanena’mba: “Lelo mukwenu ka, wakwikala na mikōko, ino shi umo uponene mu kina, abulwe kukeukwata, ēwabulemo monka mu dya Sabado?” Mukōko i kituntwa, kebakokejapo kwiuleka mu kīna kufika ne mu difuku dilonda’ko, kutyina amba shi ufwe, bakajimija lupeto. Bisonekwa kadi binena’mba: “Muntu moloke ubanga būmi bwa nyema yandi.”

Yesu wadingakanya amba: “Ino muntu nandi i muleme kutabuka mukoko! Mukanda wetu wa bijila witabije kulongela muntu biyampe mu difuku dya Sabado.” (MB) Bendeji ba bipwilo abakomenwa kuponeja uno mulangwe muluji, kadi wa kanye, kebakunkamene nyāa.

Yesu webatale bonso na meso a bulobo, webendejā sō, wafitwa mutyima fututu mwanda wa mityima yabo myumu. Kupwa wasapwila muntu’wa amba: “Olola bidi kuboko kobe.” Nandi waolola’ko, kuboko kwandi kubakoma ke kutuntulu.

Pa kyaba kya kusangala amba kuboko kwa uno muntu kubakoma, Bafadiseo abo abatambe tupolobela, kebakakute kitumba na balondi ba Heloda kya kwipaya Yesu. Mu kino kitango kya kipolitike mudi ne ba mu mutōtelo wa Basadusea. Myaka yonso, kino kitango kya kipolitike kikalanga mu mfika yokebedyumuna nyoka na Bafadiseo, ino pano abekutyila umbumo mwanda wa kulwa na Yesu. Mateo 12:9-14; Mako 3:1-6; Luka 6:6-11; Nkindi 12:10; Divilu 20:8-10.

▪ I mwanda’ka wakolomona lupata lwa Yesu na bendeji ba mutōtelo wa Bayuda?

▪ Le abo bendeji ba mutōtelo wa Bayuda banena namani, mungya mobayukile, pa mwanda utala kundapa muntu mu dya Sabado?

▪ I kyelekejo’ka kyaleta Yesu mwanda wa kuponeja milangwe yabo imbi?