Shapita 39

Bamitatulo ne Betyepeje

YESU wapu kwanya bulumbuluke bwa Yoano Mubatyiji, pano kakokela milangwe pa bamitatulo, bantu balamukaalamuka bamujokolokele. “Luno lukongo,” ye aye unena, “ludyingakene bwa twana tushikete mu lubanza twisamba ato twine’mba; twimōmbela ne bānwe kuja mpika, kadi twimuyoyokweta, ino bānwe ne kwipapa pa mutyima mpika.”

I kika kisaka kunena Yesu? Washintulula’mba: “Yoano kwiya waiya pano bidibwa kadī, byakutoma katome, kadi ke bamunena’mba: Nanshi udi ne mudemona. Ino Mwanā muntu aye waiya, udya, utoma, kadi ke banena’mba: A-ā! muntu kidyedyedye ne kutoma vinyu, mulunda ne basonkeja-musonko na babipya-mambo.”

Kusangaja bantu i kukomo. Kekudipo kintu kyobanya. Yoano udi na būmi bwa bu mwine Nazila, bwa kujilajila bya kujila, ulamine kinenwa kyālaile mwikeulu amba “kakatomepo nansha vinyu, nansha byakukolwa, mhm.” Ino abo bantu amba udi na mudemona. Aku nako Yesu, udi’nka mwikadile bantu bonso, kadipo na bya kujilajila, ehe, abo kadi amba nandi wapityija’byo.

Po apo pakomene kusangaja bantu! Mwanda badi pamo bwa twana tombelwa nshiba, ino ato tupela kuja, nansha tobayoyokweta, ino ato kudila mpika. Ebiya Yesu wanena’mba: ‘Tunangu tubabingijibwa na byato bilongwa.’ I byabine, bukamoni—bilongwa—bo bwalombola patōka’mba matope atopekwa Yoano ne Yesu i a bubela.

Yesu washilula kutopeka bibundi bisatu, Kolezeni, Beseda, ne Kapanama, mwaloñanga bilongwa bya kwakamwa. Yesu amba shi nadi amba noñanga bino bilongwa mu Tyila ne mu Shidona, bibundi bya mu Fenisea, longa bekadi babyo ke bālamuke pa mutyima, ke bavwale nkōlwa ne kwitūta buto. Yesu watopeka Kapanama, kibundi kyadi kimweka bu kyandi kité kitatyi kya mwingilo wandi, amba: “Oa malwa a ntanda ya Sodoma i matyetye mu dyodya difuku dya kidye, ino ōbe akatabukamo bukatampe.”

Kupwa Yesu watendela Shandi wa mūlu ku meso a bantu bonso. Walonga namino mwanda Leza wabudija bantu batunangu ne bafunde bubinebine bulēme bwa kumushipiditu, ino wasokwela bino bintu bilumbuluke ku boba betyepeja, badi bu twana twa lukeke.

Ku mfulo, Yesu waela lubila lwa lwito, webalonge’mba: “Iyai kwami bānwe bonso bakuputuma na mīngilo, ne bakulemenwa nabya nami nkemutukija’byo biyampe. Twela[i] mu lupungu lwami lwa bu-umpika, muboīle manwa kudi ami, ke-ne-muntu, amiwa ne wakukōkela, kadi ngidi ne bumvu pa mutyima, ebiya nabya mukamonanga mityima mitūke biyampe. Mwanda lupungu lwami lwa bu-umpika ludipo biyampe ne kiselwa kyami nakyo kyonka kipela.”

Lelo Yesu webatūkija mityima namani? I na kwibanyongolola mu bupika bwa biselwa bilēma bya bisela bibatwikile bendeji ba bipwilo, kifwa, bijila bya kaninga-mpo bya kulama dya Sabado. Walombola ne muswelo wa kutūkija mityima ya boba bamweshibwa malwa na mabikavu a balupusa ba kipolitike, ne boba balēmenenwa na bubi bwabo bwibavutakanya mutyima wa mundamunda. Walombola bano bonso bajondwa mityima amba bubi bwabo bubwanika kwibalekelwa, bakokeja kwikala mu kipwano kilēme na Leza.

Lupungu luyampe lupāna Yesu i kwipāna abe yense kudi Leza, kwingidila Tata wamūlu, wa kanye ne lusa. Kiselwa kipāna Yesu ku boba bāya kwadi i kukōkela ku misoñanya ya Leza imwenwa’mo būmi, ko kunena’mba, mbila Yandi isonekelwe mu Bible. Kulonda’yo ke kiselwapo kilēma nansha kulēma kwine. Mateo 11:16-30; Luka 1:15; 7:31-35; 1 Yoano 5:3.

▪ Bantu bamitatulo, balamukaalamuka ba mu lukongo ludi’ko mu kitatyi kya Yesu badingakene muswelo’ka na twana tutyetye?

▪ Mwanda waka Yesu waikala kutendela Shandi wamūlu?

▪ Lelo bantu i balēmenenwe na biselwa’ka, ne Yesu webatūkija mityima muswelo’ka?