Shapita 41

Yesu ke Kipateno

KITATYI kityetye kupwa kwa kutundailwa’ye ku njibo ya Shimona, Yesu washilula lwendo lwandi lwabubidi lwa busapudi mu Ngadilea. Mu lwendo lwandi lubajinji mu uno mwaba, wadi na bandi bana-babwanga babajinji, ba Petelo, Andele, Yakoba ne Yoano. Ino mu luno, udi na batumibwa 12 pamo ne bana-bakaji bamobamo. Kubadila’mo ne Madia Madaleni, Susana, ne Njoana, mwinē mulume kalama wa Mulopwe Heloda.

Ao mwingilo wa Yesu wenda ushinsakana, lupata lutala pa mwingilo wandi nalo lwenda luvula. Abaletela Yesu mwana-mulume umo mpofu kadi kamāma, mukwatwe na mudemona. Yesu pa kumubelula, wamulupula mudemona, uno muntu kanena, kadi kamone, bantu bongwidile bibumbo abatendela. Kebanena’mba: “Lelo uno’u ke mwana Davidapo a?”

Bibumbo bibaungwila lubulubu ku njibo kushikete Yesu, aye ne bandi bana-babwanga abakomenwa ne mwa kudīla bidibwa. Kutentekela pa boba balanga amba i ‘Mwanā Davida’ wālailwe, padi kadi ne basonekeji ne Bafadiseo batambile ku Yelusalema, konso’kwa ne bula mwanda wa kwiya kumupunikija. Ino balongo ba Yesu pa kwivwana katūtu kongwidile Yesu, abaiya kumusela. Mwanda wa bika?

Bine, nansha ke banababo na Yesu bene kebaitabije ne pano amba i Mwanā Leza. Kadi lupotopoto ne byungwe byaenda ulenga bishidile mpata na mwikadilo wa Yesu obadi bamuyukīle pa kutama kwandi mu Nazala. O mwanda abalanga’mba Yesu wabela tunzumbidi. Papo bakimba kumukwata bamusele, ñeni iyebafule, amba: “Kasake kubela bulubi.” (MB)

Inoko i kimweke patōka’mba Yesu wakomeja muntu wadi mukwatwe na mudemona. Basonekeji ne Bafadiseo bayukile amba kebakokejapo kupatanya uno mwanda. Ino pa kusaka kupunikija Yesu, abasapwila bantu amba: “Uno’u nanshi kapañangapo bademona bitupu, mhm, poso ku bukomo bwa Belezebuba, mulopwe wa bademona.”

Yesu wayuka milangwe yabo, waityila basonekeji ne Bafadiseo kwadi, kanena’mba: “Bulopwe bonso bwa kwilala abo bwine, nabya bubēsala, ne bibundi nabyo monka, nansha kimo kikēlalepo akyo kine kadi, kikamone kushimatapo, ehe, ne njibo nayo monka. Shi Satana kadi k[a]ēpanga aye Satana, nabya wēlala aye mwine, ino le bulopwe bwandi akebubikale namani?”

Bine, uno i mulangwe muluji wa kwibaponeja nao! Biyukile Bafadiseo amba kudi balongo babo bapañanga bademona, Yesu webepangula’mba: “Ino le ami shi byo mpangila bademona ku bukomo bwa Belezebuba, le bāna benu nabo bebapangilanga ku bukomo bwa ani?” Kino kishintulula amba matope obatopeka Yesu afwaninwe kwibatopeka ne abo. Kupwa Yesu wanena’mba: “Ino shi ngikale nebapangilanga bademona ku [m]ushipiditu wa Leza, nabya bulopwe bwa Leza bubaponena ko mudi.”

Yesu pa kusaka kwibemvwanija’mba kupanga bademona kwandi i bukamoni bulombola amba utabukile Satana bukomo, wanena’mba: “Lelo muntu i byepi? Amone kutwela munjibo mwa kilobo, amututemo bidimo, poso wabadikila kumukuta mwinemo kilobo, ebyobiya, shandji! katuta munjibo monso. Yewa kadi wakubulwa kunonga biyampe nankyo unoñanga bibi, kadi wakubulwa kukongakanya kudi ami, nankyo upalakanyanga.” Kekukidipo utatana, Bafadiseo abashikwe Yesu, bine abesokola abo bene bu bengidi ba Satana. Bapalakanyanga bene Isalela kwadi.

Kulonda’ko, Yesu wadyumuna bano babinkwa nandi bengidi ba Satana amba “kutuka mushipiditu ako kekukalekelwapo bantu, ehe.” Washintulula’mba: ‘Yewa yense ukanenena Mwanā muntu bibi, ukalekelwa, ino yewa ukanenena mushipiditu sandu bibi kakalekelwapo, nansha dimo, nansha mu ino ngikadilo ya bintu nansha mu yoya ikāya’ko.’ Bano basonekeji ne Bafadiseo abalonga bubi kebukebalekelwa, pa kutela na mutyima umbi bingelengele bilongwa na mushipiditu sandu wa Leza amba i bya ku bukomo bwa Satana. Mateo 12:22-32; Mako 3:19-30; Luka 8:1-3; Yoano 7:5.

▪ Lelo lwendo lwabubidi lwa Yesu mu Ngadilea i lwishile na lubajinji muswelo’ka?

▪ Mwanda waka banababo na Yesu basaka kumukwata?

▪ Lelo Bafadiseo abatompa namani kupunikija bingelengele bya Yesu, ino Yesu webakalakanya muswelo’ka?

▪ Lelo Bafadiseo bafwaninwe kulambikwa bika ne mwanda waka?