Yesu Wabelula Muntu mu Dya Sabato

Bafadiseo bādi bashikilwe Yesu, kebakimbe pa kumukwatyila. Bānenene amba kafwaninwepo kubelula bantu mu dya Sabato. Mu difuku dimo dya Sabato, Yesu wātene mwana-mulume umo mpofu ulomba mu dishinda. Yesu wāsapwila bandi bana ba bwanga amba: ‘Talai bukomo bwa Leza mobusa kukwashisha uno muntu.’ Yesu wāvuba bitoto na mata, wāmushinga’byo mu meso. Yesu wāmulombola’mba: ‘Enda ukoye mu meso ku kyumbu kya Sailoma.’ Mwana-mulume’wa wāenda kukoya mu meso, kupwa wāshilula kumona, uno o musunsa wandi mubajinji kumona.

Bantu bābezemukile. Kēbanena’mba: ‘Le uno ye mwana-mulume wadi ushikatanga kwishinda ulomba’ni, nansha i muntu’tu obeifwene nandi?’ Mwana-mulume’wa wānena’mba: ‘I ami wabutwilwe mpofu!’ Bantu bāmwipangula’mba: ‘Le bupofu bobe bubapu namani?’ Aye pa kwibalombola byonso byalongekanga, bāmusela bākamutwalwa kudi Bafadiseo.

Mwana-mulume’wa wālombola Bafadiseo amba: ‘Yesu washingile bitoto mu meso, kupwa waunena ñende nkoye’byo. Nami nakoya’byo, nka papo nkemone.’ Bafadiseo bānena’mba: ‘Shi Yesu undapanga mu dya Sabato, nankyo bukomo bwandi kebutambengapo kudi Leza.’ Inoko bakwabo bānena’mba: ‘Shi bukomo bwandi kebwadipo butamba kudi Leza, kadipo wa kubwanya kundapa.’

Bafadiseo bāita bambutwile ba mwana-mulume’wa, kebēbepangu- la’mba: ‘I bika byalengeja wenu mwana anze kumona?’ Bambutwile bandi bākwetwe moyo, mwanda Bafadiseo bānenene amba yewa ense wa kwikala na lwitabijo mudi Yesu ukapangwa mu shinankonka. O mwanda bālondolwele amba: ‘Ketuyukilepo. Mwipangulei aye mwine.’ Bafadiseo bāipangula mwana-mulume’wa bipangujo bivulevule, kufika’nka ne byāebanenene amba: ‘Kendi kala mwimulombole byonso. Le i kika kyomungipangwila’nka kungipangula?’ Bafadiseo bāloba, bāmwela panja.

Yesu wākatene uno mwana-mulume, wāmwipangula’mba: ‘Le udi na lwitabijo mudi Meshiasa?’ Mwana-mulume’wa wānena’mba: ‘Shi nadi muyukile nadi wa kwikala na lwitabijo mwadi.’ Yesu wāmune- na’mba: ‘Amiwa ye Meshiasa.’ Bine, Yesu wādi muntu muyampe! Kaundapilepo’tu uno mwana-mulume bitupu, ino wāmukweshe ekale na lwitabijo.