Shapita 71

Bafadiseo Abapele Kwitabija

BAMBUTWILE ba uno wadi mpofu walulombo abatuyuka pa kwitwa ku meso a Bafadiseo. Bayukile amba nsambu ke mityibwe kala, amba yewa yense waketabija Yesu ukapangwa mu shinakoka. Kutyibwa uno muswelo ku kisense kya na bekalwa nabo kuleta makambakano makatampe, nakampata shi kisaka i kilanda. O mwanda bano bambutwile abakosoka.

“Lelo uno ye wenu mwana o munenanga’mba: Wabutwilwe mpofu’ni?” bo Bafadiseo bepangula. “Le i kika kyamumwesha meso pano’pa?”

“Kuyūka tuyūkile’mba, uno’u i wetu mwana, ne kubutula twamubutwile mpofu,” bo bambutwile betabija. “Ino k[wine] kwākasokwele meso’ku ketukiyūkile[’kopo], nansha wamupūtwile’ou, bātwe ketumuyūkilepo.” Na bubine, wabo mwana kabudilwepo kwibasapwila monso mobyadi bipityile, ino bambutwile abatontola’mba: “Mwipangulei bidi aye mwine wapu kukula. Usa kwisamba aye mwine.”

Bafadiseo abaite monka uno muntu. Pano batompa kumuzakaja amba tuyukile kala myanda mivule ya bupolapola yenda ilenga Yesu. “Tumbija bidi’nka Leza,” bo abo bamuningila. “Kuyūka tubapu kuyūka uno muntu i kipya-mambo.”

Muntu wadi mpofu kapatenyepo buno bwabo bubela, ino wanena’tu amba: “Shi ēkale kipya-mambo ami nkiyūka.” Ino wabweja’ko amba: “Kyo nayūka i kimo kyonka kino, ami wadi mpofu kala, ino pano namone meso.”

Bafadiseo bakimba kuboya kilubo mu byanena, abamwipangula kadi amba: “Le ino wakulongele’o bidi namani? Le wakupūtwile’o namani meso?”

“Kinemusapwilapo kala kadi,” ye uno muntu katompola, “ino bānwe ne kwivwanija mpika, le i bika kadi byo musaka mwivwane dikwabo?” Webepangula na aye uzaula, amba: “Lelo ke musake nenu mwalamuke ke mudi bāna-bandi-babwanga’ni, a?”

Kino kilondololwa kibakalabaja Bafadiseo. “Abe enka ye mwana-wandi-wabwanga,” bo abo bafuna, ino “bātwe tudi bāna-babwanga ba Mosesa. Bātwe tuyūkile kala’mba Leza wēsambile na Mosesa, ino uno ketumuyūkilepo ne kwātamba kwine.”

Uno walulombo mulume nobe watulumuka, amba: “E-e! nanshi popo kīkadile kintu kya kutendelwa kino’ki po kemumuyūkile kwātamba ino wampūtula meso.” Pano kyamfulo i kika? Walulombo waleta’po mulangwe muluji, amba: “Nanshi tuyūkile’mba: Leza kēvwanangapo bipya-mambo, mhm, ino shi muntu ēkale wakumutōta Leza, ne kumulonga muswidile mutyima wandi, nabya ye waivwanako. Ino kino kekyaivwenwepo nansha pangalwilo pēne kya muntu wakubutulwa mpofu amba wapūtulwa meso na mukwabo.” Nanshi kyamfulo i kino: “Shi uno wadi wampikwa kutamba kwa Leza, longa nankyo kayūkilepo kulonga kintu, nansha kimo kīne.”

Bafadiseo abakomenwa kya kunena pa uno mulangilo muluji wakubulwa kafinda, kadi upēla kwivwanija. Abakomenwa mwa kupatena buno bubinebine, kebapunika’ko uno muntu: “Lelo abe wabutwilweko mu bubi witufundije bātwe’ni?” Papo abamutambijijija panja, mobimwekela abamupanga ne mu shinakoka mwine.

Yesu waivwana lupupuji lwa byobalongele, pa kutulukila uno muntu, wamwipangula’mba: “Abewa lelo ubaitabija Mwana Leza’ni?”

Muntu wadi mpofu walulombo walondolola na aye wipangula’mba: “Le i ani le, Mfumwami, mwitabije?”

“Ubapu kumumona, wisamba nobe uno i aye enka,” ye Yesu ulondolola.

Uno mwana-mulume wafukatyidila ku meso a Yesu kanena’mba: “Abe Mfumwami, naitabija.”

Ino Yesu washintulula’mba: ‘I pa mwanda wa buno butyibi bonaila mu ino ntanda: amba boba kebamonanga bamone, ino boba bamonanga bekale bampofu.’

Papo Bafadiseo bamuteja kebepangula’mba: “Le ne bātwe tudi bampofu nanshi a?” Shi badi beyukile amba i bampofu mu ñeni, longa kuno kukalakanya kobakalakanya Yesu kubebafwilwa lusa. Yesu webasapwila’mba: “Shi mwadi bampofu, longa nankyo kemudipo na mambo.” Ino na mityima yabo myumu, bafwila’nka kwibingija amba ke bampofupo, bine kebadipo mvubu na kitōkeji kya kumushipiditu. O mwanda Yesu webanena’mba: “Nanshi pano byo munena’mba: Tudi ne meso; penepo ne mambo mēne mudi nao ne pano.” Yoano 9:19-41.

▪ Mwanda waka bambutwile ba mpofu walulombo abatuyuka pa kwitwa ku meso a Bafadiseo, ne abalondolola bya bukosoke muswelo’ka?

▪ Bafadiseo abatompa muswelo’ka kuzakaja uno muntu wadi mpofu?

▪ I mulangwe’ka muluji waleta uno muntu wakalabaja Bafadiseo?

▪ Mwanda waka kukalakanya kwa Bafadiseo kobakalakanya Yesu kekwibafwilwapo lusa?