Bafadiseo Abalondalonda Muntu Wadi Mpofu

Bafadiseo kebetabijepo amba Yesu wapūtula meso a muntu wadi mubutulwe mpofu, o mwanda abaite bambutwile bandi. Bambutwile bayukile amba babwanya “kupangwa mu shinankonka.” (Yoano 9:22) Kupangwa mu Bayuda kubwanya kuletela kino kisaka makambakano mu būmi na bantu ne mu myanda ya misokwe.

Bafadiseo abaipangula bipangujo bibidi amba: “Lelo uno’u ye wenu mwana omunena’mba wabutwilwe mpofu? Le penepo wamone namani?” Bambutwile abalondolola amba: “Kuyuka’ko tuyukile amba uno i wetu mwana, ne amba wabutwilwe mpofu. Ino mwakamwena pano ketuyukilepo, ne wamupūtula meso mwine ketumuyukilepo.” Nansha wabo mwana byawebalombwele byalongekele, bambutwile abalondolola na budyumuku amba: “Mwipangulei. Ke mutame. Enenene aye mwine.”​—Yoano 9:19-21.

Penepo, Bafadiseo abaite monka muntu’wa ne kumuzakaja amba bayukile bu Yesu i muntu mubi. Abamunena’mba: “Tumbija Leza; tuyukile amba uno muntu i kipya-mambo.” Pa kupatana byobanena, muntu wadi mpofu’wa wanena’mba: “Shi kadi i kipya-mambo, nkiyuka.” Kadi wabweja’ko amba: “Ino kyondyukile’tu i amba nadi mpofu, ino pano kemone.”​—Yoano 9:24, 25.

Bafadiseo kebasakilepo ipwile pano, ababweja’ko amba: “Le wakuloñanga bidi bika? Lelo wakupūtulanga meso namani?” Uno muntu webalondolola na bukankamane amba: “Mwene nemulombolanga kala, ino kemwivwenepo. I kika kyomusakila kuteja’byo dikwabo? Le kemusake nenu kwikala bandi bana ba bwanga’ni?” Pa kuloba Bafadiseo abamunena’mba: “Abe ye mwanā bwanga wa yao muntu, ino batwe twi bana ba bwanga ba Mosesa. Tuyukile amba Leza wēsambile na Mosesa, ino uno muntu ketuyukilepo kwatambile.”​—Yoano 9:26-29.

Wa lulombo’wa webatulumuka na kunena’mba: “Bine kyakyo’ko i kya kutulumukwa, amba banwe kemuyukilepo kwatambile, aye papo wampūtula meso.” Ebiya muntu’wa walanguluka biluji bitala muntu wivwanwanga na Leza ne waitabije amba: “Tuyukile amba Leza kevwanangapo babipya-mambo, ino shi muntu utyinanga Leza ne kulonga kiswa-mutyima kyandi, yao ye waivwana. Tamba kala ketwaivwene kashā amba kudi ke mupūtule meso a muntu mubutulwe mpofu.” Kino kibamulengeja afudije na kunena’mba: “Shi uno muntu kadipo mutambe kwa Leza, kadipo wa kulonga kintu nansha kimo.”​—Yoano 9:30-33.

Bafadiseo pa kukomenwa mwa kupelela milangwe ya wa lulombo, abamushinika bishima’mba: “Abe muntu mubutwilwe mu bubi bonkabonka, kowitufundija?” Aba bamwela panja.​—Yoano 9:34.

Yesu pa kwivwana byalongeka, wakimbe muntu’wa ne kumwipangula’mba: “Le udi na lwitabijo mudi Mwanā muntu?” Muntu wabelwilwe walondolola’mba: “Le yao nandi i ani, a mfumwami, amba ngikale na lwitabijo mwadi?” Yesu wamunena patōtekelela’mba: “Kodi mumumone, kadi na bubine, ye aye uno wisamba nobe.”​—Yoano 9:35-37.

Muntu’wa walondolola’mba: “Namwitabija, Mfumwami.” Pa kulombola lwitabijo ne bulēme, muntu’wa wafukatyila Yesu, Yesu nandi wanena bino binenwa bya mushike amba: “Naile mu ino ntanda pa mwanda wa buno butyibi, amba boba kebamonangapo bamone ne boba bamonanga nabo bekale bampofu.”​—Yoano 9:38, 39.

Bafadiseo badi’po abo beyukile amba bamonanga. Ino le mwingilo wabo wa bu batulombwe ba ku mushipiditu nao? Abo abebingija’mba: “Batwe’ko ke twi bampofupo, mwene i amo?” Yesu amba: “Shi mwadi bampofu, longa kemudipo na bubi. Ino pano mubanena’mba, ‘Tumonanga.’ Bubi bwenu budi’ko nyeke.” (Yoano 9:40, 41) Shi kebadipo bafundiji mu Isalela, kupela kobapela Yesu bu Meshiasa kwadi kwa kwivwanika. Ino byobayukile Bijila, kupela kobapela Yesu i bubi bukatampe.