Shapita 70

Wabelula Muntu Mubutulwe Mpofu

YESU katalukilepo mu Yelusalema pano pasaka Bayuda kumwasa mabwe. Ke mungya kala, aye ne bandi bana-babwanga benda bananga mu kibundi mu dya Sabado, abamone muntu mpofu tamba kubutulwa kwandi. Bana-babwanga abaipangula Yesu amba: “Abe Mufundiji, le byābutwilwe mpofu nenki, wabipije i ani? le i uno’ni, i ku bakumubutulako?”

Dimodimo bana-babwanga balanga bwa mulangila bafundiji ba Bafadiseo, amba muntu ukokeja kulonga bubi aye ukidi munda mwa inandi. Ino Yesu walondolola’mba: “Nansha uno’u nansha bakumubutula bene, kekudipo ulongele bibi, ehe, nanshi i ponka pa mīngilo ya Leza īsokokele padi aye.” Bupofu bwa uno muntu kebutambilepo ku kilubo kampanda nansha ku bubi kansangwa bulongele uno muntu nansha bulongele bambutwile bandi, ehe. I bubi bwa Adama, muntu umbajinji, bo buletele kubulwa kubwaninina mu bantu bonso, ko konka kutamba ne bulema, pamo bwa buno bwa kubutulwa mpofu. Pano buno bulema budi na uno muntu bubape Yesu mukenga wa kulombola patōka mingilo ya Leza.

Yesu walombola pano kampeja-bukidi kafwaninwe kwingilwa nako ino mingilo. “Kyo kyami kino na’mba: Ñingidile mīngilo ya yewa wantumine pakidi mwinya pano,” ye aye unena. ‘Ke-buntu bufuku bwiye nankyo muntu kakingilapo mingilo, mhm. Ponakidi mu ino ntanda pano, nakidi kitōkeji kya ntanda.’ Panopano ponka, lufu lwa Yesu lusaka kumutweja mu mfindi ya mu kibundu mwakabwanya kulonga kintu nansha kimo. O mwanda mu kino kitatyi ukidi bidi nsulo ya kitōkeji kimunikila ntanda.

Yesu upwa’tu kunena namino, wapela mata panshi, wavuba biloba na mata andi. Washinga’byo mpofu mu meso, amba: “Enda ukoye ku dijiba dya Sailoma.” Muntu’wa wakōkela. Aye pa kukoya, kamone! Wajoka musangale kashāa, mwanda tamba kasha ubutulwa, uno o musunsa wandi umbajinji kumona!

Bekalwa nabo ne bantu bakwabo bamuyukile abatendela. Kebeipangula’mba: “Le uno ke ayepo kadi wadi ushikete ulomba byakulomba?” Bamo’mba: “I aye enka.” Bakwabo bapatanya’mba: “Umwifwene bitupu.” Ino aye mwine amba: “I ami uno enka.”

“Le meso obe abakupūtuka naka?” bo bantu bepangula.

“I ku muntu wa dijina dya bu-Yesu ye wavubile biloba, wanshinga mu meso, waunena’mba: Enda ukoye ku dijiba dya Sailoma, nami ne kwenda naenda kukoya, ino o meso ano o namona.”

“Lelo aye mwine udi pi?” bo abo bamwipangula.

Nandi amba: “Nkiyūka.”

Penepo bantu kebenda na uno wadi mpofu kudi Bafadiseo, bendeji babo ba bipwilo. Nabo abamwipangula mwamuputukila meso. Uno mukelenge webashintulwila’mba: “Wanambile biloba mu meso ne koya nakoya ponkapo ne meso namona.”

Kunena kuyampe, Bafadiseo badi ba kusangala pamo na uno muntu walulombo wabelulwa! Ino abo batopeka’ko Yesu. “Muntu uno katambilepo kudi Leza,” bo abo babotakanya. Mwanda waka banena namino? “Ke-muntu aye kalaminepo dya Sabado.” Ino Bafadiseo bakwabo beipangula’mba: “Le ino muntu mubi ayūke namani kulonga biyūkeno bidi namino?” Enka namino, umbukata mwabo mubatambe kwilalulula.

Papo kebepangula uno muntu amba: “Le abe nobe ino wisambanga namani kudi yewa wakupūtwile meso’o?”

Nandi walondolola’mba: “I mupolofeto mwine.”

Bafadiseo abapele kwitabija’byo. Balanga’mba uno muntu i mumvwañane kala na Yesu mwa kongwela bantu. Mwanda wa kupwa lupata, abaityija bambutwile ba uno walulombo, kebebepangula. Yoano 8:59; 9:1-18.

▪ Bupofu bwa uno mwana-mulume butambile ku bika, ne kebutambilepo ku bika?

▪ I bufuku’ka kebubwanya muntu nansha umo kwingila?

▪ Bantu bayukile uno muntu abalonga kika pa kubelulwa kwandi?

▪ Bafadiseo abelalulula muswelo’ka pa kubelulwa kwa uno muntu?