Shapita 47

Impolo Ibaalamuka ke Kusepelela Kukatampe

YELUSA pa kumona mwana-mukaji wa muyeye wa mashi wabeluka, kikulupiji kyandi mu bukomo bwa Yesu bwa kulonga bingelengele kibaninge. Yesu wadi waitwe na Yelusa mu lubanga, ende akakwashe wandi mwana mwana-mukaji wa myaka 12 udi kubwipi na lufu. Ino pano, kyadi kyakaminwe Yelusa kibamweka. Papo Yesu wisamba na mwana-mukaji, amba batale bana-balume bamo abafika, kebasapwila Yelusa mu mīsongwa’mba: “Mwanobe wapu kufwa, lelo kadi i bika byōkambakenya Mufundiji pano?”

Bine, i musapu utyumunañana umbidyoma kashāa! Langa’po bidi: Uno mukelenge mulēmekibwe mu kibundi nenki, pano kakotoka kitumbuzaji kya musapu wa lufu lwa wandi mwana. Yesu waivwana byobanena. Waalamukila kudi Yelusa kamunena’mba: “Kokizakala abe, itabija’tu.”

Yesu waenda na uno muntu mupungile, tululū ne kwandi. Abo pa kufika, abatana muyoa wa madilo ne mitompwe. Bantu papo bongwidile kibumbo, ke kudila i kwipēpa’tu. Yesu watwela umbukata mwabo, waipangula’mba: “Lelo i bika byo mulengela lunwa mudila le? Mwana kafwilepo i mu tulo mwādi.”

Abo pa kwivwana namino, kebasepa Yesu bya kapuni, mwanda bayukile amba kano kana-kakaji i kafwe byabine. Ino aye Yesu amba kalēle bitupu. Yesu usa kwingidija bukomo bwandi bumupele Leza, mwanda wa kwibalombola’mba bantu bakokeja kulangulwa mu lufu bipēla byonka, pamo’nka na mulangwilwanga muntu mu tulo twa pū.

Pano Yesu watambija bantu bonso, washala’mo enka na Petelo, Yakoba, Yoano, ne inandya nsongwakaji ufwile, au ke shandi. Kupwa waenda kulēle uno nsongwakaji na bano batano. Yesu wamukwata ku kuboko, wamunena’mba: “Talʹi·tha cuʹmi,” ko kunena’mba: “Abe nsongwakaji, nakunena languka”! Ponka na ponka, mwana waimana kaenda! Bambutwile pa kumona namino, abasangala byamwiko, kisengele babele tulubilubi.

Yesu wanena ba Yelusa ne wandi mukaji amba pai mwana bidibwa adye, kupwa webakome amba kemukolwa kusapwila muntu nansha umo bino byalongeka. Ino nansha byanena Yesu namino, ao mwanda uwasambakana mu ntanda yabo yonso. Uno ye muntu wabubidi wasangulwa na Yesu. Mateo 9:18-26; Mako 5:35-43; Luka 8:41-56.

▪ I myanda’ka yasapwilwa Yelusa, ne Yesu wamukankamika muswelo’ka?

▪ Pa kufika ku njibo ya Yelusa, abekutana namani?

▪ Mwanda waka Yesu wanena’mba uno mwana ufwile ulēle’tu bitupu?

▪ Bano batano batenwe pasangula Yesu mwana i bāni?