Nkasampe Mwana-mukaji ke Mūmi Monka!

Yelusa wamone amba mwana-mukaji wa muyeye wa mashi wabelulwa na Yesu. Nanshi, Yesu ubwanya kubelula ne wandi mwana, inoko pano ulanga bu ‘panenwa pano wandi mwana mwana-mukaji ye uno wafu.’ (Mateo 9:18) Le uno nsongwakaji ubwanya kubelulwa?

Yesu paakisamba na mwana-mukaji wabelulwa, bantu bamo batamba kwa Yelusa abamulombola’mba: “Obe mwana mwana-mukaji wafu!” Ababweja’ko amba: “Le kyokambakenya monka Mufundiji i kika le?”—Mako 5:35.

Uno musapu utyumuna mu bidyoma! Uno muntu ulēmekelwe bininge na bantu, pano bukomo bubamupu. Wandi mwana mwana-mukaji umo kete wafu. Ino Yesu waivwana dya kulampe musapu, waalamukila kudi Yelusa ne kumukankamika amba: “Kokakwatwa moyo, abe lombola’tu lwitabijo.”—Mako 5:36.

Penepo Yesu waenda na Yelusa ujokela kwandi. Abo pa kufika, abatana ke lunwa’lo. Bantu kashā badila, bayoyokota, bekonda na njia. Yesu watwela mwinjibo ne kunena’mba: “Uno mwana kafwilepo ino ulēle.” (Mako 5:39) Bantu pa kwivwana kino, kebasepa Yesu bya kibengo. Bayukile amba nsongwakaji i mufwe bya bine. Ino waingidija bukomo bumupēle Leza, mwanda wa kulombola’mba bibwanika bantu bafwe kujokejibwa ku būmi pamo bwa abo balangulwa mu tulo twa bukū.

Yesu watambija bonso panja, washala’nka na Petelo, Yakoba, Yoano, ne bambutwile ba ufwile. Yesu wasela bano batano ne kwenda nabo kulādikilwe nsongwakaji. Yesu wamukwata ku kuboko ne kunena’mba: “‘Talita kumi,’ kushintulula ko kunena’mba: ‘A nsongwakaji, nakunena’mba, “imana!”’” (Mako 5:41) Ponka’po walanguka kaenda. Fwatakanya’po mwatulumukila na nsangaji ba Yelusa ne wandi mukaji pa kumona uno mwanda! Pa kulombola’mba mwana i mūmi bine, Yesu wasoñanya bamupe byakudya.

Mafuku kunyuma, Yesu wadi unena boba babelula baleke kusapwila bantu byaebalongela, ye byaalombola ne bano bambutwile. Nansha nankyo, pa mwanda wa nsangaji bano bambutwile ne bakwabo abasambakanya mwanda’wa “konsokonso mu yoya ntanda.” (Mateo 9:26) Le shi i abe wamona abasangula bantu bosenswe, ubulwe’po kulombola’mo bantu na nsangaji? Ino i nsekununi ya bubidi ya lusangukilo lwalonga Yesu.