Shapita 48

Wataluka kwa Yelusa, Kakapempula Monka Nazala

BINE, Yesu wadi na mingilo mivule mu dino difuku—watambe ku Dekapodi lwa mema, wabelula mwana-mukaji wa muyeye wa mashi, wasangula ne mwanā Yelusa mwana-mukaji. Ino difuku kedyapwile. Yesu wataluka kwa Yelusa, bampofu babidi bana-balume nabo bamulonda kunyuma, benda bela lubila’mba: “Abe mwan[ā] Davida, witufwileko lusa.”

Bano bantu pobeta Yesu bu ‘Mwanā Davida,’ abalombola patōka lukulupilo lwabo, amba Yesu ye mpyana wa lupona lwa Davida, Meshiasa mwine wālailwe. Inoko Yesu udi bwa aye upumpunya kwabija kwabo, padi usaka bidi kutompa luzenzo lwabo. Ino abo nabo kuleka’byo mpika. Abalonda Yesu tululū ne kwashikete, aye utwela mu njibo, nabo abamulonda monka.

Yesu webepangula’mba: “Lelo mwitabije’mba nkokeja kwikilonga?” (MB)

“Eyo! Vidye, Mfumwetu,” bo abo betabija.

Penepo Yesu watenga meso abo, webanena’mba: “Mwendele kwitabija kwenu ne kino kimumwekele monka.” Ponka’po kebamone! Kupwa Yesu webakome’mba: “Kemusapwila muntu nansha umo.” Abo na mwididi wa nsangaji, abailwa musoñanya wa Yesu, kebenda basapula myanda yandi mu ntanda monso.

Abo bano bana-balume bataluka benda, bantu nabo batweja mwana-mulume mukwatwe na mudemona, mumusele ne diwi dyandi dine. Yesu wapanga mudemona, pamo’nka bwa aye ukaile, uno muntu kanena. Bibumbo bibatendela bino bingelengele, amba: “Kekyamwekelepo kasha namino umbene Isalela.”

Bafadiseo nabo badi ponka. Bibebapu bunwa ne mwa kupatenya bino bingelengele, ino pa mwanda wa kupela kwitabija kobapelela ku nshikani, abashilula kufutulula monka nsulo kutamba bukomo bulonga nabo Yesu bintu bya bukomo, amba: “Upanga bademona konka ku bukomo bwa mwin[ē] bademona.”

Kitatyi kityetye kupwa kwa bino binkumenkume, Yesu wajokela kwabo ku Nazala, mu luno lwendo udi pamo ne bandi bana-babwanga. Kubwipi kwa mwaka umo kunyuma, Yesu wakapempwile shinakoka, wafundija’mo ne kufundija. Nansha bantu byobatendele dibajinji binenwa byandi bisangaja, ino kupwa kebafutulula bufundiji bwandi ne kukanina kumwipaya. Ino pano Yesu waiya, na lusa lwandi, utompa kukwasha bano badi bekalwa nandi.

Mu bifuko bikwabo, bantu batūtyikanga, benda kudi Yesu, ino muno, kebailepo bavule. O mwanda waenda kukafundija ku shinakoka mu dya Sabado. Bavule mu bano bamuteja abatendela. Kebepangula’mba: “Lelo uno’u i kwepi le kwāleta īno ñeni, ne bino byālonga bikatampe? Le uno’u ke aye po mwanā sendwe wa bibalupo kadi? ne inandi kebamutelangapo dya bu-Madia, ne bāna babo nabo ke ba Yakobapo, ne Yose[f]a, ne Shimona, ne Yudasa kadi? ne bāna babo bakwabo bāna-bakaji ketudipo nabo kuno bonso a? Lelo penepo kadi, kwāleta bino byonso’bi i kwepi?”

Balanga’mba ‘Yesu i muntu wa muno monka pamo’nka bwa batwe. Utama batwe tumumwene, ne kisaka kyandi twikiyukile. Mwine uno ekale Meshiasa namani?’ O mwanda, nansha byobamwene biyukeno byonso—tunangu twandi ne bingelengele—ino abamupele. Ne ba mu kisaka kyandi bene bakimwalakana, mwanda i bēibidile nandi bininge, abafikija Yesu ku kunena’mba: “Mupolofeto kabulwepo ntumbo, mhm, poso i muntanda mwabo [ne mu balongo bandi] ne munjibo mwabo.”

Bine, Yesu watulumuka kuno kubulwa lwitabijo kwabo. O mwanda waleka kulonga’mo bingelengele, watenteka’tu enka bantu babala-banga maboko ne kwibabelula kete. Mateo 9:27-34; 13:54-58; Mako 6:1-6; Isaya 9:7.

▪ Bano bampofu pobeta Yesu bu ‘Mwanā Davida,’ kilombola’mba bakulupile kika?

▪ I bushintuludi’ka bwaleta Bafadiseo pa bingelengele bya Yesu?

▪ Mwanda waka i pa lusa pajokela Yesu kwiya kukwasha badi mu Nazala?

▪ Yesu watambulwa namani mu Nazala, ne mwanda waka?