Walonga Bingelengele, Ino Abamupele ne mu Nazala

Mu dino difuku Yesu i muvudilwe bya kulonga. Mu lwendo lwandi lwa kutamba ku Dekapodi, wabelwile’ko mwana-mukaji wa muyeye wa mashi ne kusangula mwanā Yelusa mwana-mukaji. Ino difuku kedyapwile. Patamba Yesu kwa Yelusa, bampofu babidi abamulonda bela mabila amba: “Witufwile’ko lusa, a Mwanā Davida.”​—Mateo 9:27.

Bano bana-balume pa kutela Yesu bu “Mwanā Davida,” abalombola lukulupilo lwabo amba Yesu i mpyana wa lupona lwa Davida kadi i Meshiasa. Yesu walonga bwa aye kebevwene, padi i mwanda wa kutala shi basa kwendelela na kwela mabila, nabo abaela’o bine. Yesu pa kutwela mu njibo, bana-balume babidi’ba nabo abatwela’mo. Yesu webepangula’mba: “Le mwitabije amba nkokeja kulonga kino?” Nabo bamulondolola na kikulupiji amba: “En-en, Mfumwetu.” Ponka’po Yesu watenga meso abo kanena’mba: “Kimulongelwe monka mwendele lwitabijo lwenu.”​—Mateo 9:28, 29.

Na mu kukopa kwa diso, kebamone! Monka mwaadi usoñaninya bakwabo, Yesu webasoñanya baleke kusapwila bantu byaalonga. Abo na nsangaji, abakasapula myanda yandi koku ne koku.

Bano bana-balume babidi pa kutaluka, bantu abamuletela muntu umo kabwanyapo kwisamba mwanda i mukwatwe na ndemona. Yesu wapanga ndemona’wa ne muntu’wa kaesambe. Bibumbo bibatulumuka uno mwanda, kebinena’mba: “Kashā kintu kidi namino kekyamwekele mu Isalela.” Bafadiseo nabo badi’po. Kebabwanyapo kutuna bingelengele, o mwanda abashilula monka matope abo a kwine kutamba bukomo bwa Yesu amba: “I mulopwe wa bandemona wapanga nandi bandemona.”​—Mateo 9:33, 34.

Kupwa’tu papo, Yesu wakajokela kwabo ku Nazala pamo ne bandi bana ba bwanga. Mwaka umo kunyuma, wafundije mu shinankonka ya mu kibundi’mwa. Dibajinji bantu batendele byaadi unena, ino mwenda mafuku abapele bufundiji bwandi kebakimbe kumwipaya. Ne pano kadi Yesu walonga bukomo bwa kukakwasha bantu bobadi bashikata nabo.

Wajokela mu shinankonka kukafundija mu dya Sabato. Bavule abatulumuka kebepangula amba: “Le uno muntu wamwene tuno tunangu ne bino bilongwa bya bukomo kwepi?” Kebanena’mba: “Le uno’u ke ayepo mwanā sendwe wa mbao? Mwene inandi i Madia, ne banababo bana-balume i ba Yakoba, Yosefa, Shimona ne Yudasa? Ne banababo bana-bakaji nabo mwene tudi nabo bonso muno? Le penepo uno muntu wamwene bino bintu byonso kwepi?”​—Mateo 13:54-56.

Bantu abalanga’mba Yesu i enka mwanā kibundi. Kebanena’mba, ‘Twamumwene paadi utama, penepo waikala Meshiasa namani?’ Kupwa, nansha byobadi na bukamoni​—kubadila’mo ne tunangu tukatakata twa Yesu ne bilongwa bya bukomo​—ino abo bamupela. Byobadi bebidile Yesu, ne babutule bandi bene, o mwanda abakukala pa mwanda wandi, kibamulengeja anene amba: “Mupolofeto ulēmekwanga konso, ino kalēmekwangapo’nka mu yabo ntanda ne mu njibo yandi aye mwine.”​—Mateo 13:57.

Inoko Yesu watulumuka pa kubulwa lwitabijo kwabo. O mwanda kalongele’mopo bingelengele monka “poso’nka kutenteka makasa babela bamobamo ne kwibabelula.”​—Mako 6:5, 6.