Shapita 52

Yesu Udisha Tununu twa Bantu mu Kingelengele

BATUMIBWA 12 abaenda lwendo lwa busapudi bukatampe mu Ngadilea. Pano, kinondanonda na kwipaibwa kwa Yoano, abajokela kudi Yesu kebamusekunwina bintu byakutulumukwa byobakamwene. Yesu webamone i bakōke, ne bantu baselakana abavula, ababulwe ne kitatyi kya kudya kine, webanena’mba: ‘Twitolwelei bidi pafula mwitūkije.’

Abaikila mu bwato, mobimwekela i kubwipi na ku Kapanama, abeleleka kebenda kungi, kutunduka kwa munonga wa Yodano bobwa bukila bwa Beseda. Ino bantu bavule abebamone pobataluka, nabo abakasapwila bakwabo. Bano bonso ababadikila lubilo bobwa bukila, abo bashīka’tu bwato, abatana’ko kala bantu bebatengele.

Aye Yesu wabuka mu bwato, wamone kibumbo kyungwidile, lusa lubamukwata, mwanda bano bantu badi pamo bwa mikōko yampikwa mukumbi. Ebiya kaebabelula misongo yabo ne kushilula kwibafundija bintu bivule.

Dyuba dibai, bana-babwanga ba Yesu abaiya kwadi kebamunena’mba: “Muno i muntanda mutuputupu ino dyuba ke dyenda. Wibatalule, bende ku mutamba wa madimi ne mu bibundi bakēpotele abo bene byakudya.”

Ino Yesu webalondolola’mba: “Ke bapei bānwe badye.” Papo Yesu ke muyuke kala kyasa kulonga, ino katompa Fidipa na kumwipangula’mba: “Le ko tusaka kukapota mikate ya kupa boba badye i kwepi?”

Fidipa waela’tu mulafwe wamone amba kebibwanikapo. I amo, mwanda kudi kisengele bana-balume 5000, shi tubadile’mo bana-bakaji ne bana, babwanya kubwana bantu 10000 ne kupita! Fidipa walondolola’mba: “Nansha mikate mipotwe ku tutwa tubidi twa ndenadi [papo ndenadi imo yadi mfutwa ya mwingilo wa difuku dimo] kwibapa, wa katyetye, wa katyetye, kebabwanwa’yopo.”

Padi, mwanda wa kulombola’mba kebibwanikapo kudisha bano bantu bavule, Andele wanena’mba: “Kudi mwanuke kuno udi ne mikate ītano ya mebele-abuluba, ne twitapo tubidi twalui,” wabweja’ko amba, “le ino byobya bīne byo bika, bantu bavudile nenki’ba?”

Byokudi ku muketeko, kitatyi kityetye kumeso kwa Pashika wa mu 32 K.K., kukidi biyombo bivule bibishi. Penepo Yesu wanena bandi bana-babwanga basapwile bantu bashikate pa biyombo mu bisumpi bya bantu 50 ne 100. Wakwata mikate itano ne tumwita tubidi’twa, watale mūlu, waesela’byo dyese. Kupwa washilula kutyumuna mikate ne kwabanya tumwita. Wape’byo bandi bana-babwanga, nabo kebābila bantu. Bine i kyakutulumukwa, bantu bonso abadi abaikuta!

Kupwa Yesu wanena bandi bana-babwanga’mba: “Komekei bibese byashala byo bakankalwapo kepakoneka nansha kamo.” Abaomeka bidibwa bishele, bibayula bilala 12! Mateo 14:13-21; Mako 6:30-44; Luka 9:10-17; Yoano 6:1-13.

▪ Mwanda waka Yesu ukimbila batumibwa bandi kifuko kya pafula?

▪ Le Yesu waenda na bandi bana-babwanga kwepi, ne mwanda waka kebabwenyepo kwitūkija?

▪ I bika binena bana-babwanga pa kumona’mba dyuba dibai, ino Yesu wakwasha bantu muswelo’ka?