Shapita 58

Mikate ne Kiyūjo

BIBUMBO bikatampe bibatūtyikila kudi Yesu mu Dekapodi. Bantu bavule i bende lwendo lulampe, abaiya kumwivwana ne kubelulwa bulema bwabo mu uno mwaba mushikete Bajentaila bavule. Baselele bisaku ne ntapa mobaselanga mpao shi kebenda mu matanda a Bajentaila.

Yesu wakunkamana’po, ku mfulo waite bandi bana-babwanga kaebasapwila’mba: “Nebakwatyilwa lusa bano bantu badi kibumbo, mwanda abashikilwa nami ino mafuku ke asatu bampikwa ne kadibwa kene. Kadi wivwane nebatalule ne nzala bende kwabo, nankyo bakapungila mu dishinda ke-bantu bamo bamo ko bafundukile i kulampe.”

“Lelo ko tukeīmona i kwepi mikate ya kwikutyija bano badi namino muno muntanda mutuputupu?” bo bana-babwanga bepangula.

Yesu webepanguja’mba: “Lelo mikate yo mudi nayo [i īnga]?”

‘Isamba-ibidi, ne twita’po twa lui tutyetye,’ bo abo balondolola.

Yesu wasoñanya bantu bashikate panshi, watekuna mikate ne twita’to, kalombela kudi Leza, webityumuna, wape’byo bandi bana-babwanga. Abo nabo abebyabanya ku bantu, bonso abadi abaikuta. Ku mfulo ababoya nsubukila ishele, ibayula bisaku bisamba-bibidi bituntulu, nansha bantu badīle byobadi kintu kya 4000, bana-balume, bana-bakaji ne bana batyetye!

Yesu walundula bibumbo, waikila umbwato ne bandi bana-babwanga, kebakabuka bukila bwa kushika kwa Dijiba dya Ngadilea. Kwine kuno, Bafadiseo ne bantu ba mu katangotango ka Basadusea abaiya kutompa Yesu, kebamulombe alonge kiyukeno kya mūlu.

Yesu wanañuna’mba bano bantu baidile kuntompa, webalondolola’mba: “Kyolwa pa koloba mwamona mūlu mwatyila pyā, munenanga’mba, Bukakyanga biyampe. Ebiya kibanga nakyo pa kututyika momwa pyā, makumbi kūlu fututu: ke munena’mba, Kebukipo biyampe dyalelo, mhm. Yō, bānwe banzazangi! I bine muyūkileko kuboya ñeni ya dikumbi, nanshi pa kuyūkapo biyūkeno bya īno myaka’pa na butulu.”

Penepo, Yesu webete bu lukongo lubi, lwa makoji, kupwa webadyumuna, enka na mwaadyumwinine Bafadiseo, amba kekudipo kiyukeno kikemupebwa, poso’nka kiyukeno kya Yona. Watalukididila, aye ne bandi bana-babwanga abaikila mu bwato kebenda ku Beseda, bobwa bukila mu bwikike bwa kungala ne kutunduka kwa Dijiba dya Ngadilea. Abo ke batakamane mu lwendo, bana-babwanga abeela mūlu amba tubailwa kusela mikate, pano tudi’nka na mukate umo kete.

Yesu waela mulafwe ku kwitana kwa mfulo kwaetana na Bafadiseo ne Basadusea betabila Heloda, kadyumuna bana-babwanga’mba: “Dyumukaipo; mwikale kudyumuka kiyūjo kya mikate kya baFadiseo ne kya Heloda kīne kumo.” Yesu pa kutela kiyūjo kya mikate, bana-babwanga abalanga’mba kyanenena nenki i mikate yotubailwa, abashilula kwipatanya pa uno mwanda. Yesu wamone kubulwa kwivwanija kwabo, webanena’mba: “Lelo [i] bika byo mupatanina’mba: I mwanda wa kubulwa mikate?”

Panopano ponka, Yesu walupwile mikate mu kingelengele ya kudisha tununu twa bantu, kepadi shi difuku dimo shi abidi kete. Badi ba kuyuka amba ke mwandapo wa mikate ino idibwa unenena’po Yesu. “Lelo kemuvulukangapo’ni, a?” ye aye wibavuluja. “Po natyumwine mikate ītano ku bantu tununu tutano, lelo bi[saku] biyūle bya bibese byasubukilepo, mwatekwine binga?”

“Dikumi ne bibidi,” bo abo balondolola.

“Kadi pa īsamba-ībidi napo ku tununu tuná twa bantu, lelo bisaku biyūle bya bibese, mwatekwine binga?”

“I bisamba-bibidi,” bo abo bonka balondolola.

“Lelo i mwanda ka kadi o kemuyukila?” ye Yesu wibepangula namino. “Lelo i bika byo kemuyukile’mba, nkimunenenepo byakudya, mhm, nanshi i amba dyumukai kiyūjo kyokya kya baFadiseo, ne kya baSadusea”?

Ko kwanza bana-babwanga abaivwanija. Kiyūjo, bwanga bwa kusashika ne kutatukija nabo mukate, i kishima kyobādi bengidija pa kutela kintu kya kyonakanya. Bana-babwanga pano abaivwanija’mba Yesu uletele kyelekejo kya kwibadyumuna belame ku “lufundijo lwa baFadiseo ne baSadusea,” ludi na lupusa lubi lwa kyonakanya. Mako 8:1-21; Mateo 15:32–16:12.

▪ I kika kyaselela bantu bisaku biselwanga’mo mpao?

▪ Kupwa kutaluka ku Dekapodi, Yesu waenda kwepi lwa bwato?

▪ I kwitupa’ka mu kwivwanija kwitupile bana-babwanga mu binenwa bya Yesu bitala pa kiyūjo kya mikate?

▪ I kika kisaka kunena Yesu pa kutela kishima “kiyūjo kya baFadiseo ne kya baSadusea”?