Shapita 63

Madingi Makwabo a Kwilemununa

YESU ne batumibwa bandi bakidi mu njibo mu Kapanama, besamba mwanda ungi mwishile na owa wadi wipatanya batumibwa, wa kuyuka i ani ukekala mukatampe kupita bonso. Uno mwanda wamwekele pobadi bajokela ku Kapanama, aye Yesu patupu’ye. Mutumibwa Yoano usekununa’mba: “Twamwene umo upanga bademona mu dijina dyobe, wakubulwa kulonda’tu na bātwe, netu twamukankaja, mwanda aye kadi[po] mu mulongo wetu.”

Bine, Yoano umwene amba batumibwa kyo kisumpi kimo kete kya bantu bapelwe kyepelo kya kubelulañana. Papo ulanga’mba uno muntu ulonga bintu bya nkuo mu muswelo wakubulwa kufwaninwa, mwanda ke wa mu kisumpi kyabopo.

Ino Yesu waleta’po madingi amba: “Kemukimukankajai ke-kuntu kutupu muntu, nansha umo, wakukalonga kilongwa kikatampe mu dijina dyami, kadi akayūke kala kungalamukila bukidi bukidi kauntuke, mhm. Ino yewa wakubulwa kwitulonga bibi nabya wituloñanga biyampe. Mwanda kadi yewa wakwimupa byakutoma, nansha lubaya lwa mema mu dijina dyami, mwanda wa kunena’mba: Mudipo bene Kidishitu; i binebine byo nemunena’mba aye kakabudidilwapo mpalo yandi nansha patyetye.”

Kekyadipo kilomba’nka poso uno muntu alonde bidi Yesu penepa kaikala ku mutamba wandi, ehe. Kipwilo kya bwine Kidishitu kyadi kekyashimikilwe, o mwanda kuleka kwikala mu kisumpi kyabo kekishintululapo kala amba i wa mu kipwilo kingi. Uno muntu wadi na lwitabijo mu dijina dya Yesu, o mwanda wabwenye kupanga bademona. Wadi ulonga bintu bidingakene na byobya byanene Yesu amba, bifwaninwe kupadilwa muntu mpalo. Yesu walombola’mba, yewa ulonga uno muswelo kakabulwepo mpalo yandi.

Ino kyadi kya kwikala namani shi binenwa ne bilongwa bya batumibwa byaikele kukukaja uno muntu? Longa i mwanda mukatampe! Yesu unena’mba: “Yewa wakukoleja kamo konka ka totwa twakungitabija, longa kyamunengele pakatampe nansha dibwe dya kupela bukula, shi dyamukobekelwe mwishingo bamwela pa mema a dijiba.”

Yesu wanena’mba balondi bandi bafwaninwe kutalula kintu kyo-kyonso kikokeja kwibakukaja mu būmi bwabo, nansha kikale kilēme namani pamo bwa dikasa, kinyantyilo nansha diso. I kipite buya kubulwa kino kintu kilēme inoko watwela mu Bulopwe bwa Leza, kupita’ko kūminina kwibilama abe waelwa mu Ngehena (ñenge ya mudilo mwādi mwelwa bityakuku kupwipi na Yelusalema), yelekeja konakanibwa kwa lonso.

Yesu webadyumuna kadi amba: “Dyumukai [kemukapēlulai] kamo ka totwa tutyetye, amiwa-mwine-muntu, nemunena’mba, bamwikeulu bāto, badi mūlu babandilanga mpala ya Tata udi mūlu.” Kupwa, walombola bulēme bwa “totwa tutyetye” na kuleta kifwa kya muntu ujimije mukōko umo mu mikōko katwa yadi nayo. Yesu washintulula’mba, uno muntu ukashiya mikōko 99 kakakimbe umo ujimine, shi eumone, ukeusangela mpata kupita’ko yoya 99. “Enka namino,” ye Yesu ufula kunena, “ne mwa Shenu udi mūlu kekiswilwe’mba kamo ka totwa tutyetye kakoneke.”

Padi Yesu ukyela mulafwe ku mwanda wadi wipatanya batumibwa, webasoñanya’mba: “Nenu mwikale bwa mwepo, kadi ndoe mwikale nayo bānwe bene na bene.” Mwepo utobajanga bidibwa byadi bitalala. I amo, mwepo wa kyelekejo walamunanga binenwa bya muntu ke bipēla kwitabija. Kwikala na mwepo wa uno muswelo kudi na bukwashi mu myanda itala kulama ndoe.

Eyo, lupotopoto lukokeja kutamba’ko mu bitatyi bimobimo mwanda wa kubulwa kubwaninina kwa bu muntu. Yesu waleta misoñanya ya mwa kupwijija’lo. Amba: “Shi mwanenu akupye mambo, nabya enda bidi konka ukamupityilemo kwa bunka bwenu, shi akakwivwane nankyo ubamunekenya ke ōbe.” Yesu wasoñanya kadi amba shi kakwivwenepo, “nabya ukasele, nansha umo, nansha babidi, amba mu kyakanwa kya tumoni tubidi, nansha tusatu, binenwa byonso bifikilemo.”

Wivwane uwalonga ino miswelo yonso ino kwitabija mpika, Yesu unena’mba, kyamfulo katūle mwanda ku “kipwilo,” ku batadi badi na kiselwa kya kulela kipwilo babwanya kutyiba mambo. Yesu wafule kishima’mba shi uno kipya-mambo wapele kwitabija buno bwabo butyibi, nankyo “mulekei akālamuke kudi bānwe ke muJentaila kadi ke usonkeja-musonko.”

Batadi bafwaninwe kulamata byabinebine ku misoñanya idi mu Kinenwa kya Yehova mu kutyiba mambo kwabo. Wivwane abamujingulula i mulube binebine, ufwaninwe kupebwa mfuto, nankyo buno butyibi ‘i bukutwe kala ne mūlu mwine.’ Kadi kyokya ‘kyobakutulula pano panshi,’ ko kunena’mba, pobabingija yewa wakubulwa mwanda, i ‘kikutululwe kala ne mūlu mwine.’ Mu butyibi bwa uno muswelo mo munena Yesu amba “po bakabungakena bonso mu dijina dyami, shi babidi, shi basatu, nami ngidi monka mubukata mwabo.” Mateo 18:6-20; Mako 9:38-50; Luka 9:49, 50.

▪ Mu mafuku a Yesu, mwanda waka kekyadipo kilomba enka kumulonda?

▪ Mwanda waka i bibi kukukaja koka katyetye, ne Yesu walombola mvubu ya totwa tutyetye muswelo’ka?

▪ Mobimwekela, i kika kyatonona Yesu ashilule kukankamika batumibwa bekale na mwepo umbukata mwabo?

▪ ‘Kukuta’ ne ‘kukutulula’ kudi na nshintulwilo’ka?