Shapita 64

Bufundiji Butala pa Kwilekela

MOBIMWEKELA, Yesu ukidi mu njibo mu Kapanama na bandi bana-babwanga. Wibasapwila mwa kupwijija myanda ya ba mwana na mwanabo, Petelo waipangula’po amba: “Abe Mfumwami mwanetu shi wampya mambo, kadi wampya mambo, ami le nkamulekela dinga?” Bafundiji ba mu mutōtelo wa Bayuda bafundijanga kulekela muntu kufula pa misunsa isatu, padi o mwanda Petelo wamone amba i kipite buya nanshi kutēlelela’tu amba “i pasamba-pabidi’ni?”

Ino uno mulangwe onso ulaminwe bu pa kulondela i wa bubela. Yesu walemununa Petelo amba: “Nkikunenepo amba i pasamba-pabidi, ehe, poso ponka pasamba-pabidi pa makumi asamba-abidi.” Walombola’mba kekudipo kibalwa kya misunsa kitūngilwe bu kya kukadikila’po Petelo mu kulekela mwanabo.

Pa kusaka kukoma bana-babwanga balame kiselwa kyabo kya kulekela bakwabo, Yesu webape kyelekejo. Kya mulopwe umo usaka kupwija myanda na bapika bandi. Abamuletela umo udi na mapu mavule, a ndenadi 60000000. Kadipo na muswelo wa kwialubula. Yesu washintulula’mba, kupwa, mulopwe wasoñanya’mba mupotejei aye ne wandi mukaji ne bana bene, mungalwije mapu ami.

Umpika pa kwivwana namino, wafukata ku maulu a mfumwandi kamwisāshila: “Abe mfumwami bantūki[ji]je bidi mutyima, nkakulubwila byonso.”

Mfumwandi wamukwatyilwa lusa, wamulekela mapu mavule. Yesu wabweja’ko amba, ino aye uno umpika upwa’tu kufwilwa lusa, waenda kukakimba mukwabo umpika umwapwile ndenadi 100 kete. Uno muntu wabangila umpika nandi mu midibu kamufina lukono, amba: “Ndubwile kyo wangapwile.”

Ino uno umpika mulume nabo kadipo na lupeto. Wafukata ku maulu a umpika mwapulwa, kamwisāshila: “Ntūkijije bidi mutyima nkakulubwilanga byonso.” Uno umpika kadipo na lusa pamo bwa mfumwandi, waeleja mukwabo umpika mu kifungo.

Yesu waendelela’mba, bapika bakwabo bamwene mobipityila abaenda kukalombola mfumwabo. Nandi waityija umpika bya bulobo. Amba: “Abe mupika mubi nakulekela byobya byonso byo wāpwile, pa mwanda wa kwisasa ko waunsashila. Lelo abe i namani kufwaninwe kukwatyilwa lusa ku mukwenu mo mumuninwe, monka mo nakukwatyilwa ami lusa?” Mfumwandi wakwatwa nsungu, wamupāna kudi ba kumumwesha malwa kufika ne pakafuta mapu onso.

Kupwa Yesu wafudija’mba: “I enka namino ne Tata wa mūlu, aye ukemulongela monka, shi kadi bānwe bonso ku muntu, ku muntu, kemukalekele ne mutyima wa binebine mambo a bamwanenu.”

Bine, i bufundiji bulumbuluke mpata butala pa kwilekela! Mwanda shi tudingakanye mapu mavule a bubi bwitulekelanga Leza, mambo o-onso akokeja kwitupya banabetu bene Kidishitu i matyetye bininge. Kupityidila, Yehova Leza witulekelanga misunsa tununu ne tununu. Pavule tulekelwanga’tu, ne kuyuka kwine mpika bubi botulongele ku meso andi. Shi ke pano, lelo twabulwapo netu kulekela mwanetu misunsa kampanda nansha shi tudi na bubinga bwa kumwimukija? Vuluka mwafundijije Yesu mu Busapudi bwa ku Lūlu, Leza ‘uketulekela mapu etu shi enka poso netu tulekelanga boba betwapwile.’ Mateo 18:21-35; 6:12; Kolose 3:13.

▪ I kika kyatonona Petelo epangule uno mwanda utala kulekela mwanabo, ne mwanda waka wamone amba mulangwe wandi wa kulekela muntu misunsa isamba-ibidi i muyampe?

▪ Byadi bilongele mulopwe pamuzenzele umpika wandi i bishile muswelo’ka na bino byalonga umpika pano pamuzenza mukwabo umpika?

▪ I bika byotwefunda mu kino kyelekejo kya Yesu?