Kamweno Kadi Mu Kulekela

Petelo waivwana madingi a Yesu a mwa kupwijija myanda īpya banabetu na kulonga bukomo bwa kupwija’yo bidi abo bene na bene. Ino Petelo usaka padi bamutungile bungi bwa misunsa ya kulekela muntu.

Petelo waipangula’mba: “A Mfumwetu, i misunsa inga le īmpya mwanetu mambo yomfwaninwe kumulekela? Lelo i kufika ne pa misunsa isamba-ibidi?” Bendeji bamo ba bipwilo bafundijanga amba muntu ukokeja kulekela mukwabo misunsa isatu kete. O mwanda Petelo wemone bu udi na buntu bininge shi walekela mwanabo “misunsa isamba-ibidi.”​—Mateo 18:21.

Uno mulangwe wa kulama kino kibalwa kya bubela ke aopo udi mu bufundiji bwa Yesu. O mwanda walemununa Petelo amba: “Nakulombola’mba, ke enkapo kufika ne pa misunsa isamba-ibidi kete, aa, ino i kufika ne pa misunsa 77.” (Mateo 18:22) Mu muneneno mukwabo i kulekela kwampikwa mfulo. Petelo kafwaninwepo kwikala na kibalwa kya kwimanina’po pa kulekela mukwabo.

Kupwa Yesu wape Petelo ne bakwabo kyelekejo kikomeneja mobadi mvubu ya kulekela. I kitala umpika umbi wakomenwe kwiula mfumwandi wa lusa. Mulopwe usaka kupwija myanda na bapika bandi. Umpika umo wamwapwile bivule, talenta 10 000 [ndenadi 60 000 000] pano waletwa kwadi. Kadipo na muswelo wa kufuta ano mapu. O mwanda mulopwe wanena umpika’wa amba usa kupoteja wandi mukaji ne bandi bana mwanda wa kufuta mapu. Ponka’pa, umpika waponena ku maulu a mfumwandi kamuzenze amba: “Ntūkijije’ko mutyima, nsa kukufuta byonso.”​—Mateo 18:26.

Mulopwe pa kumukwatyilwa lusa, wamulekela bitupu mapu makatampe. Mulopwe upwa’tu kumufwila lusa, uno umpika waenda kudi umpika mukwabo wadi umwapwile ndenadi 100. Wakwata umpika mukwabo wamufina lukono ne kumunena’mba: “Futa byonso byoungapwile.” Ino uno umpika mukwabo wapone ku maulu a umpika waapwile’wa, kamuzenze amba: “Ntūkijije’ko mutyima, nsa kukufuta.” (Mateo 18:28, 29) Ino uno umpika walekelwe mapu andi na mulopwe, kewilepo mfumwandi. Wakatwala mu kifungo umpika wadi umwapwile’tu mityetye bininge kufika ne byajokeja mapu.

Yesu usekununa’mba bapika bakwabo bamwene kino kilongwa kya kubulwa lusa baenda kukasapwila mfumu, nandi waloba ko kwityija umpika’wa amba: “Abe umpika mubi, ami nakulekēle mapu obe onso powanzenzele. Lelo nobe kufwaninwepo kufwila umpika mukwenu lusa monka monakufwidile lusa?” Mulopwe waeleja na bulobo uno umpika wampikwa lusa mu kifungo kufika ne byafuta mapu andi onso. Yesu wavuya’mba: “Ne Tata wa mūlu nandi ukemulonga enka namino shi umo ne umo mu bukata mwenu kalekelangapo mwanabo na mutyima umo.”​—Mateo 18:32-35.

Bine buno i bufundiji bwitufundija kwikala na lulekelo! Leza i mwitulekele mapu makatampe a bubi. Nansha shi mwanetu mwine Kidishitu wetulubila, i kutupu kifika pa mapu etulekēle Leza. Kadi Yehova ketulekelepo’nka musunsa umo ino i misunsa keibadika. Le tubulwe’po kulekela banabetu misunsa mivule nansha shi tudi na mwanda wa kwitompwela? Monka mwafundijije’kyo Yesu mu Busapudi bwandi bwa ku Lūlu, Leza uketulekela “mapu etu, monka motulekela netu boba betwapwile.”​—Mateo 6:12.