Shapita 67

Abakomenwa Kumukwata

MASOBO a Bitanda papo akyendelela, bendeji ba bipwilo abatume bamudyavita kukakwata Yesu. Aye nandi kufyama mpika. Ino wendelela na kufundija patōka, amba: “N[a]kidi nenu bidi kakitatyi, ebiya nkajokele konka kudi wantumine. E po mukankimba, penepo ne kumonapo mpika, ino kokwa ko ndi ami bānwe kemukafikakopo.”

Bayuda kebevwanijepo, kebeipangula abo bene amba: “Le uno’u usaka kwenda pi le, ko ketukamutāna bātwe bano? Amba padi usaka kwenda kudi boba bapalakanine mu baNgidiki akebafundije na baNgidiki. Lelo uno mwanda udi namani wanena’mba: Mukankimba ne kumonapo mpika, kadi ne ko ndi ami bānwe kemukayūkakopo kufika, ehe?” Bine, pano Yesu wisambila pa lufu lwandi ne pa kusanguka kwandi kwa kwenda mūlu, kemubwanya kumulonda balwana nandi.

Difuku dyabusamba-bubidi kadi dyamfulo ya masobo dibafika. Lubanga ne lubanga pa masobo, kitobo umwañanga mema aatekele ku Kyumbu kya Sailoma, amba apunguluke kufika’nka ne ku kitako kya madabahu. Mobimwekela, Yesu wavuluja bantu kino kisela kiloñwanga difuku ne difuku, wanena na diwi dikatampe amba: “Shi muntu waivwana kyumwa āye kuno kwami atome. Wakungitabija, nankyo, monka mwānenene kyokya kisonekwa, ne munda mwandi mukamutamba minonga ya mema a būmi.”

Pano Yesu ulombola bintu bikatampe bikalongeka pakapungululwa mushipiditu sandu. Mwaka ulonda’ko, kuno kupungululwa kwa mushipiditu sandu kusa kumweka mu dya Pentekosa. Mo musa kupunguluka minonga ya mema a būmi kitatyi kisa kushilula bana-babwanga 120 kusapwila bantu. Ino pano kekwaikele mushipiditu, mwanda i kutupu mwanā-bwanga wa Kidishitu nansha umo wakishiñwanga māni a mushipiditu sandu nansha wityilwe kukekala momwa mūlu.

Bamobamo pa kwitaba ku bufundiji bwa Yesu, abashilula kunena’mba: “Uno’u i yenka aye mupolofeto,” bamwanya’mba i mupolofeto mukatampe wālailwe kwiya utabukile’ko Mosesa. Bakwabo amba: ‘Uno ye Kidishitu mwine uno’u.’ Ino bakwabo bapatanya’mba: “I! le Kidishitu akatambe mu Ngadilea? Le kyokya kyalembelwe kekinenangapo amba: Kidishitu wiyanga ku musuku wa Davida mu Betelema, kibundi kyāikelemo Davida?”

Enka namino kibumbo kibelalulula. Bamo basaka Yesu akwatwe, ino kutupu umolwela kuboko. Bamudyavita pa kujoka bampikwa Yesu, babitobo bakatampe ne Bafadiseo abebepangula’mba: “Le [k]yo kemumuletele i kika?”

“Nansha pa kalā pēne, kutupu muntu wakunena namino,” bo bamudyavita balondolola.

Bendeji ba bipwilo abayulwa bulobo, abekwata’ko na tufutululo, na kibengo ne na mutonko. Kebebapunika’mba: “Le ne bānwe bene nanshi wemongwela kumo, a? Nanshi le umbamone umo mbikavu, nansha muFadiseo, wamwitabija? Ino kino kibumbo kyampikwa kuyūka mukanda-wabijila i kifingwe mafingo.”

Papo Nikodema, Mufadiseo kadi mbikavu wa Bayuda (umo wa mu Sanhedrini), watompa kunenena’ko Yesu mayampe. Mubwanya kuvuluka, myaka ibidi ne kipindi kunyuma, Nikodema waile kudi Yesu bufuku, welombola amba i mumwitabije. Pano Nikodema watentulula’po amba: “Le uno mukanda-wetu-wabijila uponejanga muntu bitupu [mwene] poso mwamwivwana bidi, mwamuyuka ne byalonga?”

Po pene Bafadiseo abakalabela’ko, pa kwivwana umo wa mu abo witabila Yesu. “Le abe wi wa ku Ngadilea’ni?” bo abo bamufunina. “Kimbamo usa kumona mu Ngadilea kemukatambepo mupolofeto, mhm.”

Nansha Bisonekwa byokebilombwele patōka’mba mupolofeto ukatamba mu Ngadilea, inoko i bilombole amba Kidishitu ukatamba’mo, mwanda binena’mba “kitōkeji kikatampe” kinenwe kumonwa mu uno mwaba. Pakwabo napo, Yesu i mubutwilwe mu Betelema, kadi i wa ku musuku wa Davida. Byobyamweka bu Bafadiseo i bayuke uno mwanda, nanshi kebadipo mwa kubudilwa kulambikwa bimyanda bya mabela binena bantu pa mwanda utala Yesu. Yoano 7:32-52; Isaya 9:1, 2; Mateo 4:13-17.

▪ I bika biloñwanga lubanga ne lubanga pa masobo, ne mobimwekela Yesu wakokela milangwe ya bantu ku bino bintu muswelo’ka?

▪ Mwanda waka bamudyavita abakomenwa kukwata Yesu, ne bakulumpe ba bipwilo abalonga’po kika?

▪ Nikodema i ani, udi namani na Yesu, ino i mumonwe na Bafadiseo bakwabo muswelo’ka?

▪ I bukamoni’ka budi’po bulombola amba Kidishitu wadi kala wa kutamba mu Ngadilea?