Shapita 68

Bufundiji Bukwabo mu Difuku Dyabusamba-Bubidi

DIFUKU dyamfulo, dyabusamba-bubidi dya Masobo a Bitanda, dikyendelela. Yesu wikwete’ko ufundija mu kyumba kya mu tempelo kitelwa bu “kilambwilo.” Mobimwekela, kino kyumba kidi mu kipindi kītwa bu Kipango kya Bana-bakaji mudi masanduku mutūlanga bantu byabuntu byabo.

Mu kino kipindi kya mu tempelo mudi kitōkeji kyeñenya bufuku bonso bwa masobo. I mutūlwe bibikwa binanu biná bikatakata, kimo ne kimo kidi na ngeso iná miyule māni. Kitōkeji kitamba ku bino bimuni byakijibwe na māni a mu ino ngeso 16 kimunika bininge kokwa ne kuno bufuku bonso. Byanena Yesu pano bibavuluja bantu bino bimuni. ‘Ami uno ne kitōkeji kya ntanda,’ ye Yesu unena. ‘Yewa wa kunonda kakendapo mu fukutu, ino ukamona kitōkeji kya būmi.’

Bafadiseo abamupatanya’mba: “Nanshi wisambilanga abe mwine, ne mīsambo yobe yo wisamba ke ya binebinepo.”

Yesu nandi kishima tentu amba: “Shi kadi ami nēsambilanga ami mwine, nabya mīsambo yo nēsamba īno i ya binebine, ke-ne-muntu ndyūkile ko natambile ne ko ñenda. Nanshi bānwe ne kuyūkapo mpika ko ntamba ne ko ñenda.” Wabweja’ko amba: “Amiwa nēsamba ami mwine, ne Tata wakuntuma aye wisambila’nka ami.”

“Le Shobe mwine udi pi?” bo Bafadiseo bepangula.

Yesu webalondolola’mba: “Kemuyūkile ami, ne Tata mwine kemumuyūkilepo, mhm. Shi mwangyūkile ami, longa nankyo umbayūka ne Tata mwine kumo.” Nansha Bafadiseo byobasaka kukwata Yesu, ino i kutupu umutenga nansha umo.

“Ami ke ñenda,” ye Yesu unena monka. “Ko ñenda ami bānwe kemukafikakopo.”

Pa kunena namino, Bayuda abashilula kwiipangula: “Le usa kwitapa aye mwine’ni? Mwanda unena’mba: Ko ñenda ami bānwe kemukafikakopo.”

‘Banwe mwi ba muno munshi,’ ye Yesu ushintulula. ‘Ino ami ne wa mūlu. Bānwe mwi ba ino ntanda, ami nkidipo wa ino ntanda.’ Kupwa wabweja’ko amba: “Shi kemwitabijye ami uno’mba: E yenka aye; nankyo mukafwila mu bubi bwenu.”

Pano Yesu wisambila pa būmi bwandi bwaādi nabo kumeso kwa kwiya’ye pano pantanda kwikala bu Kidishitu, Meshiasa wālailwe. Ino abamwipangula byonka bya mwenji amba: “Le abewa wi ani?”

Yesu pa kumona mwenji obamwela, walondolola’mba: “Ne enka aye o nemusapwidile pa kushilula.” Ino wanena monka’mba: ‘Yewa untumine i wabine, ami nami byonenanga mu ino ntanda i byonka byonāivwene kudi aye.’ Yesu waendelela’mba: “Po mukamwimika Mwanā muntu, e ponka po mukayūka’mba, nanshi i yenka yewa. Ne byo nkīlongelangapo ka ami mwine nansha katyetye, ino byonka binombola Tata byo byonka byo nēsamba. Ne untumine mwine tudi nandi. Tata kandekelepo bunka bwami, ehe. Ke-ne-muntu ami nami noñanga byonka bya kumutōkeja ku mutyima wandi mafuku onso.”

Yesu pa kunena bino bintu, bantu bavule abamwitabija. Webanena’mba: “Wivwane mūminine mu mwanda wami, nankyo binebine mwi bāna-bami-babwanga, ne kuyūka kwine mukayūkidijanga [bubinebine, nabo] b[u]kemukūlanga ke mudi bāna-pabo.”

“Tudi nkunwa ya Abalahama,” bo babinkwa nandi besakwija, “ketwamuninwepo na muntu nansha umo. Le bika byōnena abe’mba: Mukakūlwangapo ke mudī bāna-pabo?”

Nansha Bayuda byobabikalwanga na matanda angi misunsa ne misunsa, ino kwibevwanapo beta nansha dimo muntu wibasusula bu mfumwabo. Bapela kwitwa bu bapika. Ino Yesu webalombola patōka’mba bine mwi bapika. Mu buluji’ka? “I binebine byo nemunena’mba,” ye Yesu wibanena, “Bantu bonso bakulonga bubi i bapika bamunwe ku bubi.”

Bayuda abetūla mu kyaka, mwanda bapela kutelwa bu bamunwe na bubi. “Mupika kēkalangapo mu njibo nyeke na nyeke, ehe,” ye Yesu wibashintulwila, “poso mwana e enka wikalamo nyeke na nyeke.” Umpika udi mu kyaka kya kupangibwa kitatyi kyo-kyonso, mwanda kadipo na kyepelo kya kupyana bintu. I enka mwana mubutwilwe mu njibo nansha ulelelwe’mo ye wikalanga’mo “nyeke na nyeke,” myaka yonso yadi mūmi.

“Shi Mwana wemukūla ke mudi bāna-pabo,” ye Yesu ukinena, “nabya nankyo umbamone bu-bwāna-pabo bwa binebine.” Nanshi bubinebine bupa bantu bwanapabo i buno bwisambila padi Mwana, Yesu Kidishitu. I enka kupityila ku kitapwa kya būmi bwandi bwa bu muntu mubwaninine kukakūlwa bantu ku bubi buleta lufu. Yoano 8:12-36.

▪ I kwepi kufundija Yesu mu difuku dyabusamba-bubidi? I bika bimwekanga’ko bufuku, ne bino i bikwatañane muswelo’ka na bufundiji bwa Yesu?

▪ Yesu wetela amba i mutambe kwepi, ne kino kifwaninwe kumuyukanya bu ani?

▪ Bayuda i bapika mu buluji’ka, ne i bubinebine’ka busa kwibapa bwanapabo ku buno bupika?