Shapita 74
Kudingila Mata, ne Bulombodi Butala pa Milombelo
YESU ukingila mingilo mu Yudea, watwela mu kibundi kya Betani. Muno mo mushikatanga ba Mata, Madia ne mwanabo Lazalasa. Padi Yesu wemwene kala na bano basatu mu mwingilo wandi, ke mulunda nabo byabinebine. Yesu waenda kwa Mata, shi padi kendelwa’ka ketuyuka, watundailwa’nka biyampe.
Mata usasakata na kusobela Yesu bintu bilumbuluke byadi nabyo. Bine, kupempulwa ku njibo na Meshiasa wālailwe i ntumbo mikatampe! O mwanda Mata wekwata’ko na kutēka bidibwa binunka lunsense, koku uteakanya tubintu tukwabo twa busekwesekwe twa kushikatyija Yesu na nsangaji, mubwanwe shē.
Ino Madia, mwanabo na Mata, washikata ku maulu a Yesu kamuteje. Kepejijepo, Mata wafwena kudi Yesu kamunena’mba: “Abe Mfumwami, lelo kwakaminwepo mwanetu uno wandekela mīngilo bunka [b]wami? Bamunene bidi, ankwashepo.”
Yesu waube’tu talala, kanenepo Madia kintu nansha kimo. Ino kadingila’ko Mata upīpidile ku bintu bya kungitu. “A Mata, Mata!,” ye aye umudingila. “Abe wikambakanya ne kupitakanapitakana ku bintu bivulevule nankyo, ino kifwanyinwe kine i kimo kyonka tu.” (MB) Bino byanena Yesu bilombola’mba ke biyampepo kujimija kitatyi kilampe mu kutēka bidibwa bya kudinga masani mavulevule. Bidibwa bityetye, nansha’tu nsani umo, bibwene.
Milangwe ya Mata i miyampe, usaka kwikala mufikilwa wa kizaji. Ino kukambakena bintu bya kungitu kwandi kubamubudija kyaba kya kutambula misoñanya imutala iletwa na Mwanā Leza wandi wa kwibutwila! O mwanda Yesu wafudija’mba: “Madia aye watongela kyokya kiyampe kya kubulwa kumunyongololwa.”
Kupwa, mu kitatyi kikwabo, mwanā-bwanga umo waipangula Yesu amba: “Abe Mfumwetu witulombola mwakulombela monka mwālombwele Yoano bāna-bandi-babwanga.” Bibwanika padi uno mwanā-bwanga kadi’popo pafundije Yesu lulombelo lwa kulondela’po mu Busapudi bwandi bwa ku Lūlu kubwipi kwa mwaka umo ne kipindi kunyuma. Yesu wapituluka mu bulombodi bwandi, waleta’po ne kifwa kilombola mvubu ya kwipāna mu milombelo.
“Lelo [i] ani wa kwenu shi udi ne mulunda nandi,” ye Yesu washilula, “ebiya amwendele pa kankatyi ka bufuku kamunena’mba: Abe mulunda nami nsaka kwajime mikate īsatu. Mwanda wa mweni wamfikila kwami, wiya kulampe, ino nami nabulwe byakumutekela. Ebiya kwivwana udi mu njibo amutentulule’mba: Kokinkambakanya, mhm, ku kibelo i kushite ne twana twami ngidi nato pa butanda, ami nkidipo mwakulangukila nkupeko, mhm? Nanshi nemusapwila’mba, nansha kalangukile kumupela bulunda, ino i mwanda wa bukankamane bwandi ukalanguka kumupa byonso byābudilwe.”
Kuno kudingakanya kwa Yesu kekushintululapo amba Yehova Leza upelanga kulondolola ku milombelo, pamo bwa mulunda wa mu mānga yandi. Mhm, ino i kifwa kyaletele kilombola’mba, shi mulunda wa mutyima ulēma ulondololanga ku byobamulomba na kininga, penepo Tata wetu wa mūlu wa buswe ke pepi! O mwanda Yesu wabweja’ko amba: “Ebiya ami nemunena’mba: Mwikale kulomba nankyo kikemupebwapo; kadi mwikale kusaka, nankyo mukekimonapo; kadi mwikale kututula, nankyo kikemushitwilwapo. Ke-bantu bonso bakulomba bapebwanga kadi wakusaka umonangapo, kadi wakututulapo aye ushitwilwanga.”
Kupwa Yesu wesambila pa bashabana bakubulwa kubwaninina, babipya-mambo, amba: “Ebiya shi kudi bānwe mwana alombe mukate kudi shandi, amupe dibwe’ni, a? Kadi shi mwita ino amupe nyoka’mba ke mwita’ni? Ebiya pakwabo, shi alombe dī, kadi amupe kaminye? Lelo ino bānweko babi, muyūkile kupa bāna benu byakwibapa biyampe, lelo Shenu wa mūlu ke pepi, keye mwine ukakija kupana mushipiditu sandu ku bakumulomba?” Bine, Yesu wakankamika bantu bekale kwipāna mu milombelo. Luka 10:38–11:13.
▪ Mwanda waka Mata ukatakata na kutēkela Yesu bintu bivulevule nenki?
▪ I bika byalonga Madia, ne mwanda waka Yesu wamutendela pa kyaba kya kutendela Mata?
▪ I kika kyatonona Yesu apituluke mu bulombodi bwandi butala pa milombelo?
▪ I kifwa’ka kyaleta Yesu kilombola mvubu ya kwipāna mu milombelo?