Shapita 77

Mwanda Utala bya Bupyane

MOKIMWEKELA bantu abayuka’mba Yesu udya bidibwa mu njibo ya Mufadiseo. Abaungwila panja tununu ne tununu, belaija Yesu atambe. Bano bantu baidile kwivwana Yesu na katentekeji ne kumutendela, kebadipo bwa Bafadiseo badi bamukalakanya, bakimba anene kintu kampanda kilube bamukwatyile’po.

Dibajinji Yesu waalamukila kudi bandi bana-babwanga, kanena’mba: “Dyumukai bānwe kiyūjo kya baFadiseo kyokya i kya buzazangi.” Bine, mutōtelo wa Bafadiseo i muyule buzazangi bonka, monka mokyadi kibalombwelwa kala pa kudya. Nansha bubi bwa Bafadiseo byobudi bufyame mu bilongwa byobalonga bya bwine Leza, ino mwenda mafuku bukasokokela patōka. “Kutupu kyakupūtyibwa, nansha kimo amba kekikasokolwapo,” ye Yesu unena, “kadi nansha kyakufībwa’mba kekikayūkibwa, mhm.”

Yesu ukipituluka mu madingi a kwibakankamika aapele boba 12 paebatumine mu lwendo lwa busapudi mu Ngadilea. Amba: “Kemukikwatwa moyo boba bakwimwipaya ngitu, mhm, ke-bantu bēpaya’nka ngitu kubapu, kutupu kikwabo kyo bemulonga.” Yesu wakome balondi bandi amba Leza kakebelwapo, le musolwe mwine o musolwe kewilwa, longa’po abo. Webanena’mba: “Ebiya po bakemuleta mu shinakoka, ne ku balelantanda, nansha bakatampe balupusa, . . . [m]ushipiditu [s]andu a[o] ukemulombola, mu dyodya dyuba dyonka byakufwaninwa kukanena.”

Amba evwane, muntu umo wanena mu kibumbo na diwi ditunduke. “Abe Mufundiji,” ye aye uzenza, “nanshi banenene mwanetu twiabile nandi byakupyana.” Bijila bya Mosesa binena’mba mwanabute uyatanga bipindi bibidi bya bipyanwa, kepadipo kya kuleta lupata. Ino mobimwekela, uno muntu usaka kupyana bintu bivule kutabuka bimufwaninwe mungya bijila.

Yesu wapele kwikuja mu bino bimyanda. “Abe muntu lelo i ani waumbīka ke ndi muketansambu yenu wakwimukalañanya?” ye Yesu umwipangula. Kupwa waleta kino kidyumu kikatampe ku kibumbo, amba: “Dyumukai, mudyumuke bikatampe mankomwameso a kusanswa bupeta, mwanda bumi bwa muntu kebudipo mu bungi bwa byabupeta byandi.” (MB) Bine, muntu nansha wapeta namani, i monka na monka, mwanda usa kufwa webishiya. Yesu wakome uno mwanda na kuleta’po kyelekejo kilombola’mba kubulwa kwikimbila dijina diyampe ku meso a Leza i bulembakane. Washintulula’mba:

“Budimi bwa mpeta umo bwamwitabile bumeni bwa ntanda ne ntanda. Ino wadi ufwatakanya munda mwandi’mba: Le ngube namani, ke-ne-muntu nabulwe ne mwakwibyomeka bidibwa byami? Ebiya kūmvwana kudi aye’mba: Nanshi imana, nkalonge namino, nkatūte bitala byami’bya, nkashimikepo bikwabo bikatampe, ino e mo nkebyomeke bidibwa byami, ne bintu byami byonso biyampe. Ebiya nkanena [muya] wami’mba: Abe [muya] pano kōdi ne bintu bingi bingi binengele byakubīkwa myaka ne myaka, kēkale bitupu pamo, kadyepo, katomepo, kēkale kusepelelapo. Ino kwivwana padi Leza’mba: Abe kileletwa kwa bonka buno bufuku nanshi [muya] obe ubasakibwa, ino le byobya byāmwene dimo dyonka, lelo bikēkalanga pano byani le?”

Ku mfulo Yesu wanena’mba: “Kadi i enka namino mo mwikadile ne yewa wakwibīkila aye mwine lupeto, ino kudi Leza kebupetapo.” Nansha shi bana-babwanga balanga bu kebakokejapo kupya mu dino dikinga dya bulembakane bwa kufwila kwikala bafuke ku makasa, ino nansha ke mu kusasaketa būmi bwa difuku ne difuku bakokeja kulabikwa bipēla byonka, baleka kwingidila Yehova na muya wabo onso. O mwanda kino kyaba Yesu wamone mukenga wa kwibapitulukila mu madingi malumbuluke aebapele kala mu Busapudi bwa ku Lūlu kepadi kubwipi kwa mwaka umo ne kipindi. Watadīla kudi bandi bana-babwanga, kanena’mba:

“Kemukikambakanya mutyima, mwanda wa būmi bwenu’mba: Lelo kyo tukadya i kika? Nansha ku mubidi’mba: Lelo byo tukavwala bidi kwepi? . . . Ino, talaipo ku binkombe bya mūlu, kukusa kebikuse, kwangula kebyangula, kadi kitala kebimone, nansha dieya mpika, nanshi Leza udishanga’byo, . . . Ino talaipo, ku maluba amityi mo atamina. Kuputumina mu mīngilo keaputuminapo, nansha kujinga butonge keajingepo nanshi nemunena’mba: Nansha Solomone mu ntumbo yandi yonso kavwikilwepo nansha kimo kiyampe kya kufika pamo nao, mhm. . . .

“Kadi bānwe kemukīkala kukimba’mba: Le tudya bika? nansha’mba: Le tutoma bika? kadi kekwikala ne mityima ībidi. Ke-pantu byobya byonso basenji ba panopantanda basaka’byo, kadi Shenu uyūkile byo mubudilwe’byo. Nanshi mwikale [kwendelela na] kusaka bulopwe bwa Leza, ebiya byobya byonso bikemutentekelwapo.”

Bino binenwa bya Yesu bifwaninwe kutebwa’ko mutyima bininge, kupityidila mu kitatyi kya kupumbwa lupeto. Muntu uselasela mutyima kūlu pa mwanda wa bisakibwa byandi bya kungitu, ne kushilula kuzobolola bintu bya kumushipiditu, na bubine wabulwe lwitabijo lwa kukulupila amba Leza udi na bukomo bwa kukwasha bengidi Bandi. Luka 12:1-31; Kupituluka 21:17.

▪ Mobimwekela, mwanda waka uno muntu waipangula myanda itala pa bupyane, ne i kidyumu’ka kyaleta’po Yesu?

▪ I kyelekejo’ka kyaleta Yesu, ne kidi na buluji’ka?

▪ I madingi’ka apituluka’mo Yesu, ne mwanda waka i mafike’po?