Shapita 82

Yesu Kaenda Kadi ku Yelusalema

KEPEJIJEPO, Yesu wakute kadi lwendo kaenda ufundija mu kibundi ne kibundi, kikatampe ne kityetye. Mobimwekela udi mu bulolo bwa Pelea, bobwa bukila bwa Munonga wa Yodano shi utamba ku Yudea. Ino kwaenda kwine i ku Yelusalema.

Filozofi ya Bayuda i ya amba i bantu babala-banga kete bo bakapanda, kekubulwe padi yo yonka yatonona muntu umo kaipangula’mba: “Abe Mfumwami, lelo bakupanda i batyetye’ni?” Yesu waleta’po kilondololwa kilomba bantu balanguluke pa kyokya kisakibwa ku muntu amone kukapanda, amba: “Mwikale kwikankamika [ko kunena’mba, kwiningisha nansha kwikonda] pa kutwelamo mu kibelo kityetye.”

Kuno kwiningisha i kwa kampeja-bukidi, “ke-pantu” Yesu wendelela’mba, “bangi bakasaka kukatwelamo, [ino] ne kumona kutwelamopo mpika.” Mwanda waka bakatunya kutwela’mo? Washintulula’mba ‘pakataluka mwinē njibo kushita’ko kinjilo, bantu bakemana panja nzulanzula kebakokola’mba: “Abe Mfumwetu! Betushitwilepo bidi.” Ino aye ukebatentulula’mba: “Nkimuyūkilepo ne ko mufundukile kwine, nanshi mfundukilei papo bānwe bonso bakulonga bibi.”’

Mobimwekela, bano bantu bashityilwa panja i bafike pa kitatyi kyobadi bafwatakanya bu kyo kiyampe mungya abo. Ino abatana kibelo pa kutwelela ke kishite kala minkonkole. Badi amba bafikile kumeso kwa kitatyi, longa i batwele, nansha shi kitatyi kyadi kekyabwene mobasakila. I bine, boba bapela kutūla mutōtelo wa Yehova bu kintu kibajinji mu būmi bwabo batengele kufikilwa na musala!

Yesu i mutumwe kukwasha Bayuda, ino bavule bene abapityija kyaba kilumbuluke kyobadi ba kwitabija mpango ikwete Leza ya lupandilo. O mwanda Yesu unena’mba bakadila ne kushenkenya meno pobakelwa panja. Ku mutamba mukwabo, bantu “bakāya kutunduka ne kushika, kadi ne kunshi ne kuntenta,” i amo, boba bakatamba mu mizo yonso “bo bakashikatanga [ku meza] mu bulopwe bwa Leza.”

Yesu wabweja’ko amba: “Talaipo, ba kunyuma [bantu bapunikwa bakubulwa kwikala Bayuda, ne Bayuda banyantyilwa panshi] bakēkala ba kumeso, kadi ba kumeso [Bayuda bashikete pa mfuko mu būmi bwa kungitu ne mu mutōtelo] bakēkala ba kunyuma.” Kwikala kunyuma kwabo kishintulula’mba bano bantu ba mulēle, bampikwa kubanga biyampe bibalongelwa kebakekalapo mu Bulopwe bwa Leza nansha dimo.

Papo Bafadiseo abaiya kudi Yesu kebamunena’mba: “Funduka, enda, mwanda aye Heloda [Antipese] usaka kukwipaya.” Bikokejika padi Heloda washilula luno lupupuji mwanda wa kunyemeja Yesu mu uno mwaba. Kepabulwe padi Heloda wakwatwa moyo wa kutwela mu myanda ya lufu lwa mupolofeto mukwabo wa Leza pamo na mwaatwelele mu ya kwipaibwa kwa Yoano Mubatyiji. Ino Yesu wasapwila Bafadiseo amba: “Endai kasapwilei wao muzeu, amba: Talapo byo mpanga bademona, ne byo ñundapa bambá dyalelo dino’di, ne dya kesha, ebiya dya busatu dikwabo nkapwididila’tu ne nko!”

Yesu wapu mwingilo wandi kuno, kalunguluka na lwendo lwandi ku Yelusalema, monka mwasapwila aye mwine amba “kekiswele’mba mupolofeto ōnekele pangi, mhm, poso monka mu Yelusalema.” Mwanda waka bifwaninwe kala kulangilwa’mba Yesu usa kukepailwa ku Yelusalema? Mwanda mu Yelusalema mo mwipata mudi bantu 71 babundile kidye kikatampe kitelwa bu Sanhedrini, kadi mo monka mwelelwanga bitapwa bya banyema. Nanshi kekudipo kukwabo kulangilwa kukepailwa “Mwana-mukōko wa Leza,” i’nka mu Yelusalema.

“Yō! Yō! Abe Yelusalema! Yō! Yō! Abe Yelusalema, wipayanga bapolofeto, wibāsa mabwe bakutuminwanga. Yō! bya mwiko bitupu!” ye Yesu utompola. “Mafuku ne mafuku o nadi nsakile na’mba nemubungakenye pamo bwa nzolo na twana twandi mu mapapa, ino bānwe kuswa mpika. Talaipo kadi, njibo yenu yemushīlwa, ke masala onka.” Bine uno muzo ubaponejibwa mu kidye, mwanda ubapele Mwanā Leza!

Yesu ukinanga mu Yelusalema, waitwe ku njibo ya mukulumpe wa Bafadiseo. I mu dya Sabado, papo mityima ya bantu idi’nka kwadi, mwanda kudi muntu umo ubela mpanga wa katatu, pakwabo maboko ne maulu abamuyula mema bā. Yesu waipangula Bafadiseo ne bapotolodi ba Bijila badi’po amba: “Lelo kūndapa mu dya Sabado i kijila’ni?”

Ino bonso abaube nyāa. Penepo Yesu wabelula uno muntu, wamusoñanya’mba wiendele. Kupwa waipangula’mba: “Lelo i ani wa kwenu shi kimbulu nansha ñombe yandi īponene mu kina, ino abulwe kwiyabulamo panopano, monka mu dya Sabado?” Kadi kutupu muntu nansha umo umulondolwele. Luka 13:22–14:6; Yoano 1:29.

▪ I kisakibwa’ka kya kupandila’po kyalombola Yesu, ne mwanda waka bantu bavule abashityilwa panja?

▪ “Ba kunyuma” baikala ke ba kumeso ne “ba kumeso” baikala ke ba kunyuma i bāni?

▪ Mobimwekela, i kika kyanenenwa’mba kepabulwe padi Heloda wadi usaka kwipaya Yesu?

▪ Mwanda waka kebibwanikapo mupolofeto kwipailwa panja pa Yelusalema?