Shapita 83

Waendelwa Bidibwa na Mufadiseo

YESU ukidi mu njibo ya Mufadiseo mutumbe, wapu kubelula muntu wadi na mpanga wa katatu. Pa kutala betwa bakwabo batonga bifuko bya bulēme, washilula kufundija kineñanine kwityepeja.

“Po waitwa na muntu ku masobo a butundaile,” ye Yesu ushintulula, “kokashikata pa kifuko kya kumeso, mwanda wa kunena’mba ungi ukukidile buleme i mwitwe. Ebiya aye wakwita abe, ne aye kumo, kufika kakunena’mba: Abe mupe kifuko’kyo; ebiya abe nobe ke bumvu pa kushikata ku kifuko kya kunyuma.”

Yesu waleta’po madingi, amba: “Nanshi pa kwitwa enda bidi ufikile ku kifuko kya kunyuma, ino mwine wakukwita pa kwiya akunene’mba: Abe mukwetu tundulukila kuno kumeso. Ebiya nabya ukayūkwa buleme kumeso a bakwenu [betwa] bōdi nabo.” Pa kuvuya mwanda, Yesu wanena’mba: “Ke-muntu aye wakwilemeka ukapelulwa, kadi wa kwipelula ukalemekwa.”

Kupwa, Yesu walombola Mufadiseo umwityile ne basonekeji mwa kwityila bantu bidibwa byanwa na Leza. Amba: “Pa kuteka bidibwa bya dyuba pa mitwe, nansha bya kyolwa, ko kēta bakwenu, nansha bamwanenu, nansha balongo, nansha bakwenu bampeta, mwanda wa kunena’mba bakakwita nankyo abakulubwila’byo kadi. Ino nanshi pa kuteka bidibwa, wikale kwita balanda, ne bilema[fu], ne basunkuta ne bampofu. Ebiya abe ukēselwa dyese, mwanda abo kebadi ne kyakukulubwila.”

Kupa balanda bidibwa bya uno muswelo kukabutula dyese ku mwine upāna’byo, na mwikishintulwila Yesu kudi uno umwityile, amba mwanda “ukamwenamo pa kusanguka kwa boloke.” Buno bushintuludi bwa bidibwa byanwa bwaleta Yesu bubaeleja mukwabo mwitwa mulafwe ku bidibwa bya muswelo ungi. “Keye wadyese yewa ukadya bidibwa umbulopwe bwa Leza,” ye uno mwitwa unena. Eyo, ino ke bonsopo bābilanga kino kyepelo kya dyese, pamo na mwikilombwela Yesu na kyelekejo.

“Muntu umo watekele bidibwa bingi, kadi waityile bangi bangi. Ebiya . . . watumine mupika wandi kwita bakwitwa’mba: Bāye, ke-bintu byonso bibapi pano. Ponkapo bonso ke bēkañanya kanwa kabo kamo. Kwivwana kudi mubajinji wakwitwa’mba: Nēsasapo kekupela, napotele budimi nsaka nkamone’bo. Kadi ungi amba: Nēsasapo bidi, nkipelele, nami napotele bañombe dikumi bamīngilo nkebatompe. Kadi mukwabo’mba: Nēsasapo bidi, kekupela, nanshi i mwanda wa mukaji o natundaile, ino nkidi mwakwīla.”

Bine, ano i makolamina bitupu! Mwanda budimi nansha nyema bibandaulwanga kumeso kwa kwibipota, nanshi i kutupu buluji bwiyumbilwa kukatala bintu ke bipotwe kala. Yewa watundail nandi monka na monka, kekukidipo kadi kimukala kuketaba ku lwito lukatampe namino. O mwanda mfumu pa kwivwana kuno kwisāsa, wakwatwa nsungu wasoñanya umpika wandi amba:

“Tamba bukidi, wende mu mikenza, ne mu tumpinda twa kibundi, ulete muno balanda, ne bilema[fu], ne basunkuta ne bampofu. Ebiya kūmvwana mupika’mba: Abe mfumwami, mo wanenena nalonga, ino kyaba kibashala monka. Ponkapo mfumwandi wanen[a] mupika’mba: Tamba, wende mu mashinda ne kuntanda kufula kufula, kebaningilei batwele’mba, njibo yami īyūle bā! . . . Boba bēkañenye pa kwitwa, kekudi nansha umo wakukadyako ku bidibwa byami [bya ku kyolwa].”

Kino kyelekejo kishintulula kika? Eyo, ‘mfumu’ utekele bidibwa i Yehova Leza; “mupika” wenda wita ba kwita i Yesu Kidishitu; “bidibwa bya ku kyolwa” i byepelo bya kubadilwa mu ba kukabikala Bulopwe bwa mūlu.

Babajinji kutambula lwito lwa kutwela mu Bulopwe kumeso kwa bakwabo bonso i bendeji bādi bemanine mutōtelo wa Bayuda mu mafuku a Yesu. Ino abo bāpela kwitaba ku lwito. Penepo, kushilwila nakampata mu dya Pentekosa mu 33 K.K., kwāelwa lubila lwa lwito lwabubidi mu boba bādi bapalankene ne mu tupwaipwai twa mu muzo wa Buyuda. Ino bāitabile kinsanka ku lwito, kebādingilepo bifuko byonso 144000 bya mu Bulopwe bwa Leza bwa mūlu. O mwanda kutamba mu 36 K.K., kupita kwa myaka isatu ne kipindi, lwito lwabusatu, lwine lwamfulo lwāelwa lubila mu bantu bampikwa kwendejibwa kwisao bakubulwa kwikala Bayuda, ebiya kukongakanya kwa bano bantu kukyendelela kufika ne mu ino yetu myaka. Luka 14:1-24.

▪ I bufundiji’ka butala pa kwityepeja bwafundija Yesu?

▪ Muntu ukokeja kuteka muswelo’ka bidibwa byanwa na Leza, ne mwanda waka bikamuletela dyese?

▪ Mwanda waka kwisāsa kwa betwa i kwa makolamina bitupu?

▪ I bika bisaka kunena Yesu mu kyelekejo kyandi kya “bidibwa bya ku kyolwa”?