Shapita 107

Kyelekejo kya Masobo a Butundaile

YESU watuluja basonekeji ne babitobo bakatampe na byelekejo bibidi, pano kebasake kumwipaya. Ino Yesu kapwile kwikoka nabo. Webela kyelekejo kikwabo, amba:

“Bulopwe bwa mūlu budingakana pamo na muntu, wadi mulopwe, watekele mwana wandi [masobo a butundaile]. Ino katalula bapika bandi kukēta bakwita ku [masobo a butundaile]; abo bapela.”

Yehova Leza ye Mulopwe utekēle wandi Mwana Yesu Kidishitu masobo a butundaile. Mwenda mafuku, mutundaile ubundilwe na balondi bashingwe-māni 144000 usa kukelunga na Yesu momwa mūlu. Babikalwa ba Mulopwe i bene Isalela bāpelwe mukenga wa kwikala ‘bulopwe bwa babitobo’ pa kutwejibwa’bo mu kipwano kya pa Bijila mu 1513 K.K.K. Nanshi mu kine kyaba’kya mo mobāpelwe lwito lwa ku masobo a butundaile.

Ino lwito lubajinji lwa boba bāityilwe lwādi kelwaelelwe lubila kufika ne ku bushipo bwa mu 29 K.K. mwāshilwile Yesu ne bandi bana-babwanga (bapika ba mulopwe) mwingilo wabo wa kusapula Bulopwe. Ino bene Isalela ba kungitu bāityilwe luno lwito na bapika tamba mu 29 K.K. kutūla ku 33 K.K., bāpelele kwitaba. Ebiya Leza wāpa uno muzo wa betwa mukenga mukwabo, ubanga Yesu amba:

“Ebiya wat[um]a bangi bapika’mba: Ke banenei bantu bakwita’mba: Monai bidi, byo napwa kutekeja bidibwa byami, ne ñombe yami iyatapwe, ne bikwabo byakununa mani, ino byonso bibapu kupya, iyai ku [masobo a butundaile].” Luno lwito lwa bubidi kadi lwa mfulo lwa betwa lwāshilwile mu Pentekosa 33 K.K. pāpungulwilwe mushipiditu sandu pa balondi ba Yesu. Luno lwito lwāendelele kutūla ne mu 36 K.K.

Ino bene Isalela bavule bāfutulula luno lwito. “Ke bēla mwenji,” ye Yesu unena, “wa pādi kafunduka kaī ku budimi bwandi, wa papa kaenda ku busunga bwandi. Bangi nabo bashelepo ne pa bapika bandi bene bebamwesha malwa, ne kwipaya bebēpaya.” “Penepo,” ye Yesu ukinena, “mulopwe mwine pa kwivwana wakalabala, watalula ne divita dyandi wakebonakanya boba, bebēpaīle, ne kibundi kyabo wekisoka mudilo.” Kino kyāfikidile mu 70 K.K. pāsadilwe Yelusalema na bene Loma, ne bantapani bene bāipailwa kumo.

Kupwa Yesu kashintulula byāfikile mu kine kitatyi’kya amba: “Ebiya [mulopwe] wanena bapika bandi bakwabo amba: [Masobo a butundaile a]bapu kupya, ino bētwa kebafwaninwe’[opo]. Endai konka ku mansanka a mashinda, bo mwakatāna bonso mwibēte ku [masobo a butundaile].” Bapika bakebeta, “penepo njibo ya masobo yayūlwa bētwa.”

Uno mwingilo wa kukongakanya bēni ba mu mashinda a panja pa kibundi kya betwa wāshilwile mu 36 K.K. Ba Konilusa mudyavita mwine Loma ne kisaka kyandi bo babajinji bākongakanibwe mu bakubulwa kwikala Bayuda bampikwa kwendejibwa kwisao. Kukongakanibwa kwa bantu bakubulwa kwikala Bayuda ba kupingakena pa bene bāpelele kwitaba ku lwito, kwaendelele kutūla ne mu myaka tutwa 20.

Mu bula bwa myaka tutwa 20 mo mwaikele kuyula njibo ya masobo a butundaile. Yesu usekununa mobyalongekele, amba: “Ino mulopwe pa kutwela monka, akebamone bakētwa, watēnemo muntu umo wampikwa kuvwala mutwelo wa pa [butundaile]. Ebiya kamunena’mba: Abe mukwetu, lelo [i] kika kyo watwelela abe wampikwa mutwelo wa pa [butundaile]? Nandi ne kyakunena kya[mubulw]a. Ke po pa kunena mulopwe ku bamīngilo bandi amba: Mukutei ku maulu ne ku maboko, mumutekune, mumwele panja pafīta fututu, ko kwakēkala ne madilo ne kwishenka meno.”

Muntu wampikwa mutwelo wa pa butundaile ufunkilanga pa bene Kidishitu ba dijina bitupu ba mu Bipwilo bya Ki-kidishitu. Leza kebayukilepo bu bantu badi na kiyukeno kyendele’mo kya bu bene Isalela ba kumushipiditu. Leza kebashingile kasha māni a mushipiditu sandu bu bampyana ba Bulopwe. O mwanda i belwe panja mu mfindi mobakonakanibwa.

Yesu wavuya kyelekejo kyandi amba: “Ke-bantu bakwitwa i bavule, ino bakutongwapo bo batyetye.” I kyabine, mu muzo wa Isalela mwādi betwa bavule badi ba kubadilwa mu kabumbo kabundile mutundaile wa Kidishitu, ino bene Isalela ba kungitu batongwe i batyetye. Bavule mu bano bēni 144000 bapalwa mpalo ya mūlu i bakubulwa kwikala bene Isalela. Mateo 22:1-14; Divilu 19:1-6; Kusokwelwa 14:1-3.

▪ I bāni baityilwe dibajinji ku masobo a butundaile, ne i kitatyi’ka kyobātambwile lwito?

▪ I kitatyi’ka kyaelwa lubila lwa lwito ku betwa, ne bapika badi bela lubila lwa lwito bene i bāni?

▪ I kitatyi’ka kyaelwa lubila lwa lwito lwa bubidi, ne kupwa bano, i bāni bakwabo baitwa?

▪ I bāni belekejibwe na muntu wambulwa mutwelo wa pa butundaile?

▪ Bavule betyilwe i bāni, ne batongwe batyetye i bāni?