Shapita 84

Kiselwa kya bu Mwanā-Bwanga

YESU ke mutaluke ku njibo ya Mufadiseo mutumbe, umweka bu umo wa mu Kidye Kikata kitwa bu Sanhedrini, kaenda ku Yelusalema. Ne bibumbo bikatampe byenda bimulonda. Ino bimulondela bika? Lelo i bika bisakibwa kubwanya pa kwikala mulondi wandi wabine?

Monka mu lwendo mobenda, Yesu watadila kudi bibumbo, kekubulwe padi webifityija mityima pa kunena’mba: “Wivwane muntu āye kudi ami ne kushikwa shandi ne inandi mwine, ne mukaji wandi ne bāna ne bamwanabo, bāna-balume ne bāna-bakaji, mpika, ne muya wandi mwine kumo, ino nankyo kadipo mwana-wami-wabwanga.”

Le Yesu usaka kunena bika? Yesu kanenepo amba balondi bandi bafwaninwe kushikwa balongo babo pa bute pa bute. Ino banenwe kwibashikwa mu buluji bwa’mba bakebaswa bityetye ino aye bamuswe bikatampe. Yakoba nkambulula wa Yesu uvulukwanga’mba ‘wāshikilwe’ Lea wāswa’ko Letyela, kino kishintulula’mba Lea wādi muswedibwe bityetye kupita’ko nkasandi Letyela.

Yuka kadi kino, Yesu wanena’mba mwanā-bwanga ufwaninwe kushikwa “ne muya wandi mwine kumo,” nansha būmi bwandi. Kino kishintulula monka’mba mwanā-bwanga wabine ufwaninwe kumuswa Aye bikatampe mpata kupita mwaswidile būmi bwandi. Nanshi Yesu wakomeneja’mba, kwikala wandi mwanā-bwanga i kiselwa kilomba kusumininwa. Ke kintupo kitabijibwa pampikwa kubandaulwa binebine.

Mu kwikala mwanā-bwanga wa Yesu mudi bikoleja ne kupangwapangwa, monka mwalombwela’mba: “Yewa wampikwa kusela [mutyi wandi wa masusu, NW] kunonda, nanshi kadipo mwana-wami-wabwanga.” Nanshi mwanā-bwanga wabine unenwe kwitabija kusela kitundu kya kufutululwa kyauminine Yesu, pakwabo ne kufwa ku makasa a balwana na Leza, pamo na musa kufwila Yesu panopano.

Nanshi kwikala mwanā-bwanga wa Kidishitu i mwanda ufwaninwe kubandaulwa senene na bibumbo byenda bimulonda. Yesu wakome uno mwanda na kuleta’po kyelekejo. “Mwanda,” ye aye unena, “lelo wa kwenu i ani wa mutyima wa kushimika kiteba, kabadikile kubala lupeto mwakukapwila’kyo’ni? Mwanda wa kunena’mba pa kwikyalula padi kakikamwene byakupwija’kyo, ebiya bonso bakutala’kyo ke bamusepa na kibengo. Amba uno wālwile kushimika pa kwikipwapo na butulu.”

Pano Yesu wape bibumbo bimulonda kyelekejo kilombola’mba kumeso kwa kwikala bandi bana-babwanga, bafwaninwe bidi kusumininwa byabinebine mwa kubwaninya byonso bikebalombwa, pamo bwa muntu usaka kūbaka kiteba, kumeso kwa kushilula lūbako, ubwanyanga bidi lupeto lwandi mwa kuvuila’kyo. Yesu waletela’po kyelekejo kikwabo, amba:

“Nansha i mulopwe ka, pa kukatamba mulopwe mukwabo divita, lelo abulwe kushikata bidi kawīpangula munda’mba: Le ami ngidi ne tununu dikumi nkēkume ne aye wakuntamba ne tununu makumi abidi? Kūmvwana mutyima’mba: A-a, mhm. Penepo watuma mikendi, aye ukidi kulampe, kasake amusambe kipwano.”

Kupwa Yesu waimanina pa mwanda mwine mukatampe udi mu byelekejo byandi, amba: “Mo monka [ne] bānwe bonso, shi ani kadi kalekelelapo byonso byādi nabyo, aye nankyo kakōkejapo kwikala mwana-wami-wabwanga, mhm.” Kino kyo kinenwe kulonga na mutyima tōo bibumbo byenda bimulonda, ne muntu yense wifunda kuyuka Kidishitu. Banenwe kwitabija kupāna bintu byo-byonso byobadi nabyo—byonso bibatelelwa, ne būmi bwine—shi basaka kwikala bandi bana-babwanga. Lelo wi mwitabije kulonga uno muswelo?

“Mwepo i muyampe,” ye Yesu ukinena. Wanene mu Busapudi bwandi bwa ku Lūlu amba, bandi bana-babwanga i “mwepo wa panopantanda,” ko kunena’mba badi na bukomo bulama bantu, monka mulaminwanga bintu bishingwe mwepo. “Ino shi [mwepo] wadiuluka ukeutobaja kuka le?” ye Yesu uvuya mwanda. “Mhm, nanshi keufwaninwe, nansha pa nshi, nansha mwanda wa kufitwila’o, mhm, bēla’o bitupu. Ebiya wa matwi a kwivwana ēvwane.”

Nanshi Yesu walombola’mba, ne boba bene bekalanga kala bandi bana-babwanga tamba kitatyi kampanda kebafwaninwepo kuzoza mu kusumininwa kwabo kwa kwendelela kumeso. Ino shi bazoze, bakekala bampikwa mvubu, ba kuzawilwa na ino ntanda, babituputupu ku meso a Leza, bine, ne kupunikija Leza pamo. O mwanda nanshi bakelwa panja, eyo, bakonakanibwa’nka bwa mwepo keutobala, mwepo mudibuluke. Luka 14:25-35; Ngalwilo 29:30-33; Mateo 5:13.

▪ Muntu ‘kushikwa’ balongo bandi ne kwishikwa aye mwine kishintulula namani?

▪ I byelekejo’ka bibidi byaleta Yesu, ne bishintulula bika?

▪ I mwanda’ka mukatampe udi mu binenwa bya mvuyo bya Yesu bitala pa mwepo?