Shapita 97

Bengidi mu Budimi bwa Mañanza

“BANGI bangi badi babajinji,” ye Yesu ukipwa kunena, “bakēkalanga kumfulo, bakumfulo nabo bakēkala ke babajinji.” Pano waleta kyelekejo mwanda wa kushotolola uno mwanda. “Bulopwe bwa mūlu,” ye aye ushilula, “budingakene pamo na muntu, mwin[ē] njibo wakukelela lubanga [bwē] kulemba ba mīngilo ya budimi bwandi bwa mañanza.”

Yesu wanena kadi amba: “[Mwinē njibo] waumvwangana na bengidi kwibapa [ndenadi] imo pa difuku. Webatuma ku bwandi budimi bwa bunganza. Watamba ku nsa ya busatu, watana bakwabo mwibulu, bemene bitupu. Webanena amba: ‘Nenu endai mu bwami budimi bwa bunganza, nkemupa mfutwa yendele mo. Nabo baenda ko. Watamba ne ku nsa ya busamba ne ku nsa ya kitema, walonga enka nabya. Ku nsa ya dikumi ne imo watamba kadi, watana bakwabo bemene, webanena amba: ‘Le kyo mwimanine bitupu dyuba dituntulu, kwingila mpika i ki ka?’ Abo amba: ‘Ke kudi po muntu witupele mingilo.’ Webanena amba: ‘Endai ne banwe mu budimi bwa bunganza.’” (BB)

Uno mwinē njibo, mwinē budimi, i Yehova Leza, budimi bwa mañanza i muzo wa Isalela. Bengidi ba mu budimi bwa mañanza i bantu batwejibwe mu kipwano kya Bijila; nakampata i Bayuda ba mu mafuku a batumibwa. Mpalo ya kwibapala i myumvwañanibwe’nka na bengidi bengila dyuba dyonso dituntulu kete. Mpalo mine i ndenadi imo ku dyuba dimo. Byoidi “nsa ya busatu” i nsaa ya 9:00 ya lubanga, nanshi boba betyilwe pa nsaa ya 3, 6, 9, ne ya 11 bakengila’nka nsaa 9, 6, 3, ne nsaa 1 kete.

Bengidi ba nsaa 12, dyuba dyonso dituntulu, belekeja bakulumpe ba Bayuda bengilanga nyeke mingilo ya kipwilo. Kebadipo bwa bana-babwanga ba Yesu badi bepēne bidi mu buluwe bwa lui ne mu mingilo mikwabo ya makasa mu kipindi kikatampe kya būmi bwabo. Abo batwela mu bushipo bwa mu 29 K.K., ‘mwinē njibo’ watume Yesu Kidishitu akongakanye bano’ba bekale bandi bana-babwanga. Enka namino, abaikala bengidi “bakumfulo,” ba ku nsaa 11 mu budimi bwa mañanza.

Ku mfulo, difuku dya mingilo dya kyelekejo disa kufula na lufu lwa Yesu, penepo kitatyi kya kupala bengidi nakyo kekibwana. Ino kufutwa kubaikala kwa muswelo ungi, ababadikila kufuta ba ku mfulo, enka na mokishintulwilwa’mba: “Ino kyolwa pa koloba kwivwana mwin[ē] budimi wanena muledi wandi amba: wibēte bamīngilo wibapale mpalo, ushilwile pa bakumfulo ne byōfika ku babajinji. Ino pa kwiya balembwa [pa nsaa dikumi ne imo] batambula muntu ndenadi īmo, muntu ndenadi īmo. Ebiya pa kwiya boba babajinji ke bafwatakanya’mba: Netu tusaka kutambwila pangi; nanshi nabo batambulanga pamo ponka, muntu ndenadi īmo, muntu ndenadi īmo. Ino pa kwiītambula ke bamwiuning[il]a mwine budimi, amba: Ne boba baiya ke kumfulo abaingila’tu sā īmo yonka, ino abe ubadingakenya pamo ne bātwe bēkokakoka, tuputuma na mīngilo, dyuba ne bukata, kyungutu nakyo, leka! leka! Kumvwana kwādi aye walondolola umo’mba: Abe mukwetu, ami nkikudyumukilepo, ehe, ke-pantu lelo ketwadipo tubētungila pa dyuba dimo ndenadi nayo īmo, a? Tekuna’tu yobe enda, mo naswila ami mwine kupana uno wa kumfulo i monka mo nakupela ne abe. Lelo i kijila’ni kulonga ami mwine mo nswelele pa mutyima ne byami ami mwine, a? Lelo dīso dyobe, abe, i dibi’ni, mwanda ami ne muyampe?” Pa kuvuya mwanda, Yesu wapituluka mu kintu kyanene kala, amba: “I enka nabya bakumfulo bakēkalanga babajinji, kadi babajinji ke bakumfulo.”

Kutambula ndenadi kekusapo kufika pa lufu lwa Yesu, ino kukafika mu dya Pentekosa 33 K.K., po apo pasa Kidishitu “muledi” kukapungulwila mushipiditu sandu pa bandi bana-babwanga. Bano bana-babwanga ba Yesu badi pamo bwa bengidi “bakumfulo,” ba pa nsaa 11. Ndenadi keyelekejangapo kyabuntu kya mushipiditu sandu kyobāpelwe. Ndenadi i kintu kingi kipelwe bana-babwanga amba bengidije’kyo pano pantanda. I kintu kya kwibaletela būmi, būmi bwanyeke. Bine, i dyese pa kwikala bene Isalela wa kumushipiditu, bashingwe-māni ba kusapula Bulopwe bwa Leza.

Panopano ponka, boba balembelwe dibajinji basa kumona amba bana-babwanga ba Yesu abapalwa, bebamona bengidija ndenadi yabo ya kyelekejo. Ino abo basaka bivule bitabukile mushipiditu sandu ne madyese a mu Bulopwe. Yabo miuningo ne lupata bisa kwalamuka ke kupangapanga bana-babwanga ba Kidishitu, bengidi “bakumfulo” ba umbudimi bwa mañanza.

Lelo kufikidila kwa kyelekejo kya Yesu kwa mu myaka katwa imbajinji ko konka kete, kekukidipo kufikidila kukwabo? Mhm, bendeji ba bipwilo bya Ki-kidishitu ba mu ino myaka tutwa 20 bo badi bengidi “babajinji” kulembwa bu ba kwenda mu budimi bwa kyelekejo bwa mañanza bwa Leza, mwanda wa bitenta byabo ne byepelo. Bamona basapudi bepāne belungile na Watch Tower Bible and Tract Society bu bantu “bakumfulo” bambulwa kipindi kyobapelwe mu mwingilo wa Leza. Ino kunena na bubine, enka bano bapunikwa na bendeji ba bipwilo bo bonka batambwile ndenadi—ko kunena’mba, ntumbo ya kwingila bu bantunguluji bashingwe-māni ba Bulopwe bwa Leza bwa momwa mūlu. Mateo 19:30–20:16.

▪ Budimi bwa mañanza bwelekejanga kika? Mwinē budimi, bengidi ba nsaa 12 ne ba nsaa 1 belekejanga bāni?

▪ Dyuba dya mingilo dya kyelekejo disa kufula kitatyi’ka, ne mpalo isa kupalwa kitatyi’ka?

▪ Mpalo ya ndenadi yelekejanga kika?