Shapita 106

Webatuluja na Byelekejo bya Budimi bwa Mañanza

YESU udi ku tempelo. Wavutakanya bendeji ba bipwilo ñeni badi basaka kuyuka umupele lupusa lwalonga nalo bintu. Abo kebetūkije ñeni ibavutakene, Yesu webepangula’mba: “Le mulanga namani?” (BB) Kupwa kupityila ku kyelekejo, walombola mobekadile binebine i bantu ba muswelo’ka.

“Muntu umo wādi na bana babidi,” ye Yesu ubanga. “Wāenda kudi umbajinji, wānena’mba, ‘Mwana, enda ukengile dyalelo mu budimi bwa mañanza.’ Wālondolola’mba, ‘Nsa kwenda, mukelenge,’ ino ne kwenda mpika. Wāfwena wa bubidi, wāmunena monka. Uno wālondolola’mba, ‘Nkisapo kwenda.’ Kupwa wāshilula kwialakanya, ebiya wāenda. Lelo i ani pa bano babidi wālongele kiswamutyima kya shandi?” (NW) ye Yesu wipangula.

Balwana nandi amba: “I wa mfulo.” (NW)

Yesu webanena’mba: “Bine nemusapwila’mba basonkeji ba musonko ne babwitwa abemubadikidila mu bulopwe bwa Leza.” (NW) Basonkeji ba musonko ne babwitwa bapelele dibajinji kwingidila Leza. Ino ku mfulo abaalamuka pa mutyima bwa mwana wa bubidi, kebamwingidila. Ku mutamba mukwabo, bendeji ba bipwilo betela bu bengidila Leza bwa mwana umbajinji, ino Yesu webanena’mba: “Yoano [Mubatyiji] wemwīdile mu dishinda dya boloke, nanshi bānwe kumwitabija mpika, ino basonkeja-musonko, ne babusekese bo ke bamwitabija, ino bānwe byo mwamwene nabya ne kwalamukapo mpika nenu pa mutyima, mwamwitabija.”

Yesu walombola kadi amba kukankalwa kwa bano bendeji ba bipwilo ke’nkapo kuzobolola kwingidila Leza, mhm. Ino i bantu babi, banshikani. “Kwadi muntu umo, nandi mwin[ē] kipango,” ye Yesu ubanga, “wadimine budimi bwa mañanza, kadi webusaila ne lusao konso wajokoloja, wakolamo ne kyengelo kya kwengelamo vinyu, ne kitala washimika ponka, ebiya webushīla bakalama, aye kaendaenda kulampe kwine. Ino ke pa mwaka wa kwela bipa wat[um]a bapika bandi amba: Endai ku bakalama mukayateko bipa bya mu budimi bwami. Ino bakalama nabo bakwata bapika bandi, umo bamukupila, ungi bamwipaya, kadi mukwabo nandi bamwasaasa mabwe. Ebiya wat[um]a bangi bakwabo bapika bavule, nabo bebōba monka’nka nabya.”

“Bapika” i bapolofeto bādi batumwa na Yehova Leza ‘mwinē kipango’ ku “bakalama” ba “budimi bwa mañanza.” Bano bakalama i mitwe yendeja muzo wa Isalela, utelwa mu Bible bu “budimi bwa mañanza” bwa Leza.

“Batulama” byobasusulanga “bapika” ne kwibepaya, ye Yesu ushintulula: “Ino ke kumfulo [mwinē budimi bwa mañanza] webatumine mwana wandi amba: Bakalemekako uno mwana wami. Nanshi boba bakalama pa kumona mwana ke bēsambe abo bene’mba: Uno ye mpyani mwine, twende tukamwipaye, tuyate bupyani bwandi ke bwetu. Penepo bamukwata, bamukokela panja pa budimi, bakamwipaīla ponka.”

Pano Yesu unena bendeji ba bipwilo, webepangula’mba: “Lelo binebine pa kukafika mwin[ē] budimi boba bakalama ukebōba namani?”

“I babi,” bo bendeji ba bipwilo balondolola, “ukebonakanya’tu byamalwa, ne budimi bwine akebushīle bangi bakalama bakumupa bipa byandi pa mwaka wabyo, pa mwaka wabyo.”

Enka namino abetyibila nsambu abo bene kuyuka mpika, mwanda nabo babadilwa mu “bakalama” ba muzo wa Isalela, “budimi bwa mañanza” bwa Yehova. Kipa kisaka Yehova ku bano bakalama i lwitabijo mudi wandi Mwana, Meshiasa wabine. Byobakankalwa kupa bino bipa, Yesu webadyumuna’mba: “Lelo kemwatangile mu bilembwa [mu Mitōto 118:22, 23]’mba: Dibwe dya kupelwa ku bashimika dyo dīne dya[a]lamuka ke mutwe wa difinko. I Yehova walonga kino namino, kadi i kyakutendelwa mu meso etu. Po pa mwanda o nemunena’mba: Bulopwe bwa Leza bukemunyongo[lo]lwa bukapebwa ku muzo [wa] bantu bakupana bipa byabo. Ino yewa muntu wakaponena pa dyodya dibwe ukētyumuna, ino yewa wakaponen[w]a nadyo dikamupotakanya pote! pote! pote!”

Pano basonekeji ne babitobo bakatampe abeyuka’mba Yesu wibanena abo, kebasake kumwipaya, aye ‘mpyana’ impolo. O mwanda madyese a kwikala baludiki mu Bulopwe bwa Leza asa kwibanyongololwa mu muzo onso mutuntulu, apebwe muzo mupya wa ‘bakalama ba budimi bwa mañanza’ usa kubundwa, ukalupula bipa biyampe.

Bendeji ba bipwilo byobatyina bibumbo bya bantu bikulupile amba Yesu i mupolofeto, abaleka kumwipaya pa kino kyaba. Mateo 21:28-46; Mako 12:1-12; Luka 20:9-19; Isaya 5:1-7.

▪ Bana babidi ba mu kyelekejo kibajinji kya Yesu belekejanga bāni?

▪ Mu kyelekejo kya bubidi, i ani welekejibwe na ‘mwinē kipango,’ “budimi bwa mañanza,” “bakalama,” “bapika,” ne ‘mpyana’?

▪ ‘Bakalama ba budimi bwa mañanza’ basa kwikala namani, ne i bāni basa kwibapingakena?